Sálmos 57 - Dupade Uruode

Piradé udaque gajnesṍri u piradedie irajasṍripísi. David ipesudé Sálmo udaque uje chayome Peduguéjnai Saúl uté, ga chacája cucarã́tedó.

¹ Osṍrape yu, Dupade á, osṍrape yu. Uje yáyipie angureni tu ua ome báringárique yãrésõre. A yácariji bajnóngone uburúdi ga yo yãrésõri iji udore jé aja yajnéone cucha dacate gajnareque udore eruénique.

² A yibidi Dupade Gatajnoquei Achamisõre ome yu jne, ga yojningai Dupade uté u uje pésu dáyipie quigode ome yu jnese.

³ A uté chiroque dáringai Piquetangore aja yu jne uje tṍraji gatajnoquei ome yu. Ga uté dojnóngaja udore ore uje ore cho dájninga ga ore chajna yu aja quedéjnane. ¡Dupade a chiroque dajnoraquédatéi, dáringai ũré aja yu jne!

⁴ Uje yumajosórone ore socárome yu ga cho jetiga yugúsi caraté quedéjnanie udire ujade. Yimóji jnumi iji udore ujade uje ore cho darosipéguiji ayoréode ore, ga jnanione udore ore patarane u asórenie, docojodie ore. Ga ore arei cho quesé asícorique.

⁵ Urénga, Dupade á, yajéode u ujetiga pijosique ua iji gaté ome cuchade jnese iji gatajnoquei. ¡Ajuéga ga bangoningájnai pijóguiji jnumi udé gai jnese!

⁶ Ore chungare enuéone udore iji dajuyadie jetiga dimane ome yirípiedie yui, ga yáyipie tajia re ome dáyuguhebátigadatéi. Ore chijócha eruque cuchábi iji yiquei jeta yibasája uté, mu ore u uje ore basája dajnei eruque gatócoro ¡tínipe!

⁷ Dimane yáyipie, Dupade á, e yáyipie chidota re. Ga a yijñecare jne, enga a yujé yigode cucha jocarãtácho ome báringai picotaque jne.

⁸ Yáyipie á, ãriji. ¡Árpa, jé aja ore yugode cucha jocarãtácho uñane uaque á, ãrijíño to! Ga a yiringare dire icha di uté jne.

⁹ Urénga, Pangarádejná, a yisi babai jne iji pidáyode idaisórone ore ujade. A yijñecare ga yedoi tu ua jne iji punirone achamisórone ujade.

¹⁰ Uje querúpise bajnoraquei enga chise gatajnoquei. Jé cho báringai ũrepise uje uté chise atéta iji gaté uté.

¹¹ Urénga, Dupade á, yajéode u ujetiga pijosique ua iji gaté ome cuchade jnese iji gatajnoquei. Ajuéga ga bangoningájnai déji jnumi udé gai jnese.