Sálmos 53 - Dupade Uruode

Piradé udaque gajnesṍri u piradedie irajasṍripísi. David ipesudé u jeta po quique ore ome.

¹ Jnani táyipiei uté chojninga iji dáyipie: –Que Dupárique cuse gotique.– Noñánguipíso udore ore, enga que déji pajénique ore ate noñángone udore. Uje que gosi déji jeta pésu cucha ueratique gotique.

² Dupade uje déji gaté toji jnanione ore abode gai iji jnumi udé iji dádi, jeta chise uñeque iji udore ore ujade uje áyuquetotinguerã́que, jeta uñeque chucué Dupade ome re.

³ Mu jé ore isoca jnese uje ore chicáji quedéjnane ome uté, ga ore chopise ñane jnese ome dáringane isójna. Que uñeque déji gu jeta pésu cucha arégode. Que chojmarárique dépisi gotique.

⁴ ¿Ama payuquetotiguei chona cucha gajnaréngone ipesusórone udore a? Uje ore chejna yurasade ga yurasade udore ore gajnúone u arurégode úringane piboso ome ore. Ga udore ore etéquetí ore chutṍri Dupade ome re to.

⁵ Udore ore cho ta-ta-ta ome dáringáringo sadodéo, uje que pitãrarachúringai gajnetique cucha uñeque cuse marínga. U gu uje Dupade chisite udore ore ajnoquéode aja quedéjnane uje ore socárome ua. Bapésu udore ore úringane dipócho gu uje Dupade chujnapise udore ore.

⁶ ¡Yipésupú ga israélgosode ore iquetangónique tṍraji cucarani Sión ome ore jne jõ! Ujeta Dupade chécãre cucha dacadode ome darasade ore jne, ga a Jacob ájnape disi ejo udore ore achietaquei jogadi u jne, ga israélgosode udore ore nína re.