Sálmos 51 - Dupade Uruode

Piradé udaque gajnesṍri u piradedie irajasṍripísi. David ipesudé Sálmo udaque iji Dupade júsõri Natán quigade uje uté chatata David isijnaringuéone ome uje moji Betsabé gari.

¹ Osṍrape yu, Dupade á, ome bajnoraquédatéi uté. Ome bosongaqué dipeséode ga ãro yipesudode cucha gajnarécho udore.

² ¡Ga aru yu aja jnumi ome yipesudode cucha gajnarécho jnese! ¡Ga apésu yúringai icha ome yipesudode cucha dacate noñácho udore to!

³ Uje yiraja yate gajnaréngone udore uje yagu baruode aja, ga yisijnaringuei uté déji yedominone iquei gatuaque.

⁴ Yisijnaringuéone gajnesṍri tupúsu ua, enga gusu ua, uje yipésu yate noñángone udore iji benominone. Jecute jé tiógara jetiga apijógome baruode udore úringane ũréo uje bãrarare, ga báringai padode ajirisõre ũré pijoque ome bajiritigade udore ore.

⁵ Jé ũré uje yibase nanique eti jé sijnaque yu. Yúringai cucha gajnaréngone ipesusõre cuse uje quene yugúsiji ité ajei ome uaté úringa jeque.

⁶ Urénga, bapotigádi tupúsu ujetiga cucha uréone déji yocajépisi. Bacate yu ome payuquetotiguei quigode iji yáyipie uaté ajépisi.

⁷ Be ga ajna pamatadé gajnúraque uje i tu hisópo jeta aru yibai ome ga yúringai ichápise jogadi u jne. Aru yu ga póroropise yu jne, ga yujnué ebe quedéjnanie nieve gai ome úringanie póroroi.

⁸ Apésu ga yudúdapo pininaquei, pachietaquei ore isocade rĩ. Ga a jé u ujetiga bamocherane yajnoquecho ore nína re jne.

⁹ Ajire ti ome yipesudode udore cucha gajnarécho, enga ãro yisijnaringuéone udore jnese.

¹⁰ Urénga, Dupade á, be ga apésu páyipie icha ome yu, ga asiapome yáyipie ajépisi ujñapetáringai ome yu rĩ.

¹¹ Jé ca ajócãre yu iji benomitique, enga jé ca ajna Bajopié Iyiejna iji yari.

¹² Atire yirasitíga casica yibai uje garani tu báringai Piquetasõre. Apésu ga yóji gaté ome baroquéode úringáringo pipesucho ga a uajate yu iji udore jne.

¹³ Enga a jé u jne ujetiga yacate badode ome sijnángone udore ore, enga cucha gajnaréngone ipesusórone udore a ore chajni babai jne.

¹⁴ Urénga, aqueta yu, Dupade á, Yiquetasṍri Yudupá, uje máraque yu ome yúringai chigóca. Enga yarei a jé ca chacho ijñecáca jne ome báringai ũré uté.

¹⁵ Pangarádejná, be ga achẽre yibijnani gai, ga yibijnani uté a chatata bacotaqué gajnéone cucha udore.

¹⁶ Que ajnátu cuchiso pẽrapáitique ome ua. A urásu, ga a yĩrírase údi ome ua. Mu que cuchiso piboritígo udore pésu baninaquei gotique to.

¹⁷ Cucha pẽrapáidode udore uje Dupade chimesẽre u ujetiga gosi cho derani cucha iji dáyipie ajépisi uje pimocherã uaté. Que adojnóngaja gosi ujetiga cuchade chusũrurase uté áyipie, jé aja ujetiga gosi cho dáyugu re ome date gajnaréngone udore, Dupade á.

¹⁸ Ome báyipie ueradedie ga apésabu Sión uaté úringa aregue jne. Ga apésu ore ujuyaquéode udore iji Jerusalén eruéode aja gaté rĩ.

¹⁹ Enga a quene jogadi u jne jeta barasique ua ome cucha pẽrapaite uréone udore ome ua, jetiga pipotame udore ome ua, jeoga pipotame cuchiso pẽrapáitique ome ua jne uje pioi chejnapise ore. Enga a jé u jne ujetiga pẽrate aquirájna ape choquíode udore ore iji baseradéjnai uté gai.