Sálmos 49 - Dupade Uruode

Piradé udaque gajnesṍri u piradedie irajasṍripísi. Coré abode gajné Sálmo udaque.

¹ ¡Angáchopísi udojo, pidai idaisórone uaque jnese é! ¡Achayo uacangoninguinone aja gadoi, erámi jogosórone uáguiji erámi údode jnese!

² Ga uaque u jnese, jeoga ayoré gajnaréngone uaque, jeoga ayoré ibijógode uaque; ga jé cho ñane jetiga ugucharane u, jeoga jmatágode u.

³ A yibijnani júdi u payuquetotiguei jne, ga yáyipie uaté a chejna raja pirajatigai quigode jne.

⁴ A yorei yangoninguini iji ore acãrájarigo cucha provérbios udore. A yujé yi árpa uté jne, ga a yo yáyipie ibiredie quigome uaque ujetiga udore choqui guesi ome uaque iji yiradé achachagútigo.

⁵ ¿Cuchárique u gu a ujetiga yitodo jeta dire gajnaréngone chise yu, jeta yajnapaisórone udore chaparu yibai iji yiyaridi ome dajosipiedie ome yu?

⁶ Udore ore u uje ore ichajapite danguretigai aja dáringane atácho, ga ore chisi dabai ome dagúcha dipeséode udore.

⁷ Que toc ujetiga gosi doi ga jé iquetaque dojórique dojo ayoré uté, jeoga chimate Dupade ome daplátaraque ga gosi chise dáringárique piquetaque ome udire.

⁸ Uje oreranguipise gosi ucuecaringuei uté, ga que plátaraque déji gotique ujetiga pigaite pucuecaringuei oréraque ome udire, uje jecucha chiságui.

⁹ Ga que toc jeta gosi cho doré ga ecárasiji deréjna pitade jnese, ga jé ca chimo dáringárique tarataque to ome re jne.

¹⁰ Uje uté pañaji uje áyuquetotingueráne udore ore toi to; ga jé chome táyipiegode jé aja áyipie eyúgode ore uje ore patĩ́ora ñane iji dode, enga ore timiningara dagúcha uási ome uñane iji daquigade.

¹¹ Iji ore áyipie ajei ga ore jos eti ore iguíjnane chuságaja deréjna pitade jnese, jeta ore charidode udore jé ca eruénique cuse ga jé chuságaja ore ájnape disi ejode gatuaque. Enga ore cho danuchúji déode iji danirone.

¹² Mu a iplátarã́que gosi marínga, que togójma go. Ga jé cho cuchisode ore uje ore chaquesu re jnaque.

¹³ Enga jé táyipiegode udore ore isocade jé u udojo, jé aja udore ore uje ore chajna ore quigade, ga ore chimesẽre ore arecujaidie quigode.

¹⁴ Ga ore gajnunie u áyasadie uje ore chorei ore iji ore cachodi yúode, enga ore irodisõre dugai tu pitoringai ome ore. A chise direjnímei jne ga jnani ate arégode udore ore a e chimate ore aja dádi ome dáringáringo pujnuéngaisóño jne. Uje udore ore enocha goningane a base jne, ga taratácho ore iji dódedie, ga idája ore iji ore charite ueradi casodé.

¹⁵ Mu a Dupade chijnime yucuecaringuei iji pitoringai uté cutejmai etotiguejna jmainie, ga a chijna yu aja dari jne.

¹⁶ Jecute ca atodo jeta gosi chise dáringárique ugúcharã́que ga jé chajnerame daguíjnai omitigai údi.

¹⁷ Uje a chise gojni jeta uté toi jne enga que chijna gojnia dagúcha casodica uñeque aja dajesúrique. Enga que ipesudedie daguíjnai irárai dopoi ga chisínapo uté rĩ iji ode ajei.

¹⁸ Uje uté qué eca ica enga jé cho pininaquei gajnesõre iji re; enga jé ũré uje jnanione a ore chisi babai jne jeta amate ua aja báringárique ugúcharã́que.

¹⁹ Mu a chise dínique jetiga uté jé cháta raja dáqui gatéode udore ore irabade ore, uje que ore chimópo dírecaringuérique to rĩ.

²⁰ Ujetiga iplátarã́que gosi mu que irajatigárique cuse, ga jé chopise cuchisode udore ore uje ore chaquesu re jnaque.