Sálmos 48 - Dupade Uruode

Piradé tu. Coré abode ore gajné Sálmo udaque.

¹ ¡Cuchadaté Pangarádejnai uté, ga jé tiógara dáringai pisígai iji Yocudupade gajnei pidai uté, iji cucarani uté uje uté chicha dáringai pirosobate aja uté!

² ¡Urénga, cucarani uté abubíe sogójma ueradé, ga jnumi jogosórone udore ore irasitigai garani tu Sión uté uje déji casaque garani yui. Ga Peduguéjna Cuchábi idai u uté.

³ Dupade jogadi u dayarite pãrésõri iji Jerusalén uaté, ga e chingo raja erámi uje pãrésõri u uté.

⁴ Peduguéjnane ore iji erámi ore cháta raja ñane. Ga ore pésu dapopei aja uaté yui jnese.

⁵ Uje ore chimo Jerusalén uaté ga chajuque ore agutedie. Ga ore cho ta-ta-ta-ta, ga jé u uje ore jĩraque chayo ome dagajñua.

⁶ Ore isadodéringai pésu ga ore edodie jarobei iji ore. Ga ore chisa dabade ome cucha dacadi uté uje chise ore ga ore cho chequéraque uje chisa dabade ome dabi achaminone.

⁷ Bajnangarase cucodatéode udore aja quedéjnane ome eme cuchábi uje tṍraji guedé garani yui, uje cucode udore garani tu ore idai uje i tu Társis.

⁸ Cuchade uje e yudúco ujnoméone ica ga yimóngopise udojo ome yoquedodie iji Pangarádejna Ujopíeránguejna uté idai, uje Yocudupade upusiédi guidai u uté. Ga Dupade u uje pésu Jerusalén uaté ga jecucha jogate iji deréjnane, siqueredie ore gatuaque.

⁹ Urénga, Dupade á, yocáyipie déji ua uje yugúcoji baguíjna cuchábi ajei, ga yocáyipie chejna raja bajnoraquédatéi ome yoque.

¹⁰ Urénga, Dupade á, báringai picotaque uté jé chirate bei pirosobádejnai uté aja isocai uté uje érãtique báringai picotaque eruénique pijogate cuse iji erámi. Bedu cucha uréone quigode ome bãrachu ujopíerẽ́ uaté.

¹¹ ¡Jé tiógara ujetiga Cucarani Sión nína re! ¡Jé aja pidáyode udore iji Judá uaté údode, jeta ore dorási ga ore tẽráchu ome daninaquei! Uje ũrépiso bajiritigade udore quigode gu.

¹² Beyoi ga arichóji Sión uaté ujuyaquéode dosadi, ga apacho gai. Ga asecãcho ore oragádedie iji uaté údode.

¹³ Adójnachopísa ore ujuyaquéode udore iji Sión uaté gai. Ga adójnachopó guiguíjna cuchábode to rĩ iji ore idai uté. Ga bagaidi u gu ujetiga atatayo jogosórone cucha ome uacape disi ejórigo ore.

¹⁴ ¡U gu uje yoquĩcarai Dupade u Yocudupade uté iji deréjna pitade gatuaque! ¡Ga uté a cho yoquiquique jne aja yocajesúode jé aja yoqueruénique!