Sálmos 46 - Dupade Uruode

Piradé udaque gajnesṍri u piradedie irajasṍripísi. Coré abode gajné Sálmo udaque.

¹ Dupade u Yocãrésõri, jé aja yoquetotiguei guẽrasṍri. Uje jecucha dimane uté ome dáringai Yocátajasṍre uje yugúcoji yocajnenie pujurei jmainie.

² Jecute a jé ca yocáyipieraque déji pisadodéringárique jne. Ujetiga jnumi chécãre dasocárique, jeoga cucarãte cuchábode cṍraja yote quedéjna cuchábi jochai marínga, a jé ca yitodógo jne.

³ A yote quedéjnai usereréjna iji jnumi ga tṍra dajosé aja quedéjnane, jé aja jeta cucarãte cuchábode cho ta-ta-ta iji gatéode ome yodi uté úringai bayaque marínga, a jé ca yitodógo jne.

⁴ Tié déji uje jmainie chicáji sona ga pésu idaisórone ore irasitigai iji Dupade gajnei pidai uté, uje Dupa Pujnuéngaisṍri cho dayaridíji daguíjna ajé puyaguipísi uté.

⁵ Dupade jogadi u pidai gatócoro, jecute a ca cuchárique chijocase pidai uté jne. Dupade a chátaja pidai uté jne ujetiga guedé quene chipésosi guesi.

⁶ Purása quedéjnane ore tagu dejode ome dáringane ájningarã́cho, ga peduguéjnane ore úringane eduguéjna cuchábio chise dáringane pajnangarañácho aja jnumi. Dupade úringai dara tocade, enga jé u uje erámi uté nejñu ñane.

⁷ Pangarádejna Ujopíerãque Cuchábi déji yocari iji de. Jacob uté angureni Dupa u Yocãrésõri.

⁸ Boyóji te ga cajichope Pangarádejnai uté ipesudode cucha udore, uje uté di peyutiguei údi iji erámi.

⁹ Uje pésu ga íjnoque pocaningane iji erámi údode jnese. Ga uté chibéro docoji uté, ga chimochẽre asõre iji gatócoro. Enga chãru guebéquedatéode ore gai iji piogode.

¹⁰ Ga Dupade chósi te: "Oyo parácho, ga arajáyo uje Dupade u uyu. A pijosique uyu iji gaté ome punirone ore unirisórone jne, enga a yúringai pisígai jogadi tu erámi udé to jne."

¹¹ Pangarádejna Ujopíerãque Cuchábi déji yocari iji de. Jacob uté angureni Dupa u Yocãrésõri.