Sálmos 45 - Dupade Uruode

Piradé udaque gajnesṍri u piradedie irajasṍripísi. Coré abode gajné Sálmo udaque jeta po quique gosi ome. Ore iradé qui tu pijnoraquei ome udore ore uje ore chóji ñane gari.

¹ Yujúdi uerate ga irágupúsu yáyipie ajei ome uté. Ga peduguéjna cuchábi uté gajnecho yuru ueradode udore jne, jeta yatata udore iji uté iquei. Uje yarei chopise jnanírique urusãratígo erásonique uje que cho parágome darusarane udore quigode.

² Ga yósi te: Urénga, uerate ua ome bojode jnani ore jnese. Uje barecujate ueradedie tṍraji babijnani ga pajmarácho udire iji babijnani. Jecute Dupade chacacãre ua iji deréjna pitade ome daru ueradode.

³ Urénga, jnani chaguesi á, ajmare boidi queségodóque aja bagarubi údi; ga o piguidé pibiéraque iji cutejmai bangoningájna, báringai nanganataque ore.

⁴ Bagúsi báringai ingoningarãque, ga be ga oru boruti uté ome báringai pujnuéngaisṍre, uje irotaque ua ome cucha uréone quigode, jé aja pipararinguei quigode, jé aja cucha ujñapetade udore quigode jnese. Be ga apésu bapesute cucha pitijabádode ome bãrachua uaté.

⁵ Bojodie udire ga eruéode carichei. Uje bacho peduguéjna cuchábi umajosórone ore ga bojodie íjnonguiji ore aróbojnane ga purása quedéjnane udore cṍraja bádi.

⁶ Urénga, Dupade á, báringai eduguéjna iji bayaripi cuchábi uté a jé ca piyaque eruénique jne iji deréjna pitade gatuaque. Docogué ũrepise tu bogué nanganatáguejna uaté, uje bapésupúsu cucha uréone quigode ome uaté.

⁷ Bajnóra cucha uréone udore quigode, jé basa ga betaque pate gajnaréngone úringáringo pipesucho. Jecute Dupade, Bangureni Dupa uté ajegaite ua ome bajorane ore jnese, ga chojne cucha ai unéri aja bójo uje pininaquédatéi gajneque cucha ai unéri uté.

⁸ Baguidedie udire uneréjna ai ome cucha ai unérone uje ore íode u: mírra, áloe, canéla udore ore. Iji baguíjna cuchape pórorojna uté uje pipesute uté iji marfil ga ore pésu baninaquei ome dajocayade cucha jocarãtácho iji uté ajei.

⁹ Eduguéjnane ore urodie tṍraji sona ga ore déji chequé ibijóguedie ore ujade iji barosadode. Ga iji bãrachua uaté ga bacoté déji uje cho dajnápeguiji óro uéguedie uje tṍraji ore jogadi Ofir uté.

¹⁰ Angarami yuruode, yurábia, adójnangapísa ga acha bangoninguini aja gadoi: Acadígui barasade, jé aja bajogasúode ore iji bayé iguíjnai.

¹¹ Chamáñaje eduguéjnai ajegaidé báringa ueradé gu. Uje beduguéjnai u uté, ga jé tiógara jeta achaga bagataidie aja jnumi iji uté iquei.

¹² Tírogosode ore eduguéjnai uro a di dẽrapáitigo cucha údi aja ua jne. Ga atade iji urasade ujade a ore chucué dáringárique pimeserángome ua to jne.

¹³ ¡Peduguéjna cuchábi uté uro uje déji igóchocoijná ajei ga tṍraji te ome domitígajnai! ¡Ore chuga uaté oidode ga ore chimere hílo iji uje pipesudé iji óro!

¹⁴ Ĩrararãcho uaté oidode ga cho nánga, nánga iji gai uje ore jno údi aja eduguéjna cuchábi iquei. Uaté joranie gapu paré ore nóna aja baquei, ga udire déji uaté quigade.

¹⁵ Ga ore di ore údi ome daninaquédatéi, dajéchietaquéode ore, enga jé u uje ore chacája peduguéjna cuchábi uté igóchocoijná uaté ajei.

¹⁶ A bape disi ejode a jé ore isoca jeta ore chácariji dáquiode ore úringa cásodicáite peduguéjna ore charidode uje peduguéjna ore to ica. Ga a ua u jeta apésu ore úringai peduguéjna iji erámi údode jnese jne.

¹⁷ Ga a yipésu bei jne jeta jé ca picadique ome disi ejórigo jnese iji piquigánique. Jecute a jecucha punirone idaisórone ore chicota ua gatuaque to jé iji deréjna pitade.