Sálmos 44 - Dupade Uruode

Piradé udaque gajnesṍri u piradedie irajasṍripísi. Coré abode gajné Sálmo udaque.

¹ Urénga, e yudúco ome yocangoninguinone, Dupade á, uje yocayode ore chatata bapesudode cucha pitijabácho iji dajade nanique, iji dire iyajmane udore iji yoquiquigáningo.

² Bajmainie upúsu uje bajócãre purása quedéjnane udore ore iji ore unirone ga bacha yocáquiode ore aja udore ore jogadode. Uje babéro punirone unirisórone udore ore, jé basa ga bapésu barasade udore ore iquéraningai.

³ Que yocáquiode ore õráchatique u nanique ujeta ore cho dajnenguíji jnumi uté, jé aja uje que ore chinguíra udore ore aja dajmanecade jeta ore chise dáringáringo pujnuéngaisóño. Mu bajmana bãrachua tu, jé aja bajmanecai, benochai idírecaringuéi ore. Bapésu cuchade udore ome ore nanique gu uje bajnóra ore.

⁴ Yeduguéjna Cuchábi tu ua, Yudupá. Be ga apésu Jacob urasade ore úringáringo pujnuéngaisóño.

⁵ Ua u gu uje yijoco yocumajosórone udore ore, ga ome bei ueradi uté yuchiejnángo yoquetesórone udore iji jnumi uje ore chiringare re aja gaté ome yoque.

⁶ Que yi ga yangureta yoji ome yu gotique, jeoga yijnosocoi uté u, mu que chisíome yúringárique pujnuéngaisṍre ome yu.

⁷ Mu ua u uje bapésu ga yujnuéngo yocumajosórone udore ore gai. Ua upo rĩ uje banguíra dipoi taja yoquetesórone udore ore.

⁸ Yoco dicotárerigo ome yocajéchietaringuéi uté iji deréjnai údode, mu gusu yoquisígai tu Pangarádejnai uté isocade ome yoque, ga a jecucha yicotágo bei ueradi uté jne iji deréjna pitade gatuaque.

⁹ Mu e bṍra yógaja ti yui, ga basíome pajegátigai ome yoque. Ga que opo bajõra iji yoque rĩ aja pocaningane.

¹⁰ Ga ua u uje basi ome yocumajosórone ore jeta ore chose yoque, ga yayógome udore ore. Ga yoquetesórone udore ore chajnose yoque ga ore jno yocugúchade údi aja dajesúode.

¹¹ Enga bapésu ga yocajnunie u áyasadie uje yungóremétique chujé udire. Ga basite yógaja quedéjnane iji purása quedéjnane ore ujade.

¹² Ga bẽra barasade ore ga que ese ore oréraque, enga que o badíji udore oréraque gotique.

¹³ Bapésu ga yocajnéone u yoquejominórone yocujo ayoré ore ichietabáitigade. Yocujode ayoréo iji yoquirosadode ore dojnóngaja yoque enga ore cana yoquibáyode.

¹⁴ Bapésu ga purása quedéjnane ore cho daboti cucha iji yoqui uté uje ore chĩ́care yoqui uté; ga ore idaisórone udore chungurase datoidie iji ome yoque.

¹⁵ Yúringai ajegátaque déji yedominone iji guedé batigade udore jnese, enga que chimoque. Enga yedodie cho pepeque piguidíji dipoi uté ome dáringanie dipóguei.

¹⁶ Ga dipónguerã yu gu ore ujñiequéode ome yu, uje ore uruode gajnarécho ome yu ga ore pojna yúdode, ga gose yumajosórone udore ore, uje ore gaidi u dáringáringo jnutácho.

¹⁷ ¡Ga cucha dacadode udore jnese tṍraji ome yoque uje que yicadíjoi ua mu! ¡Chimo jóroque re uje que aringáca yógome baru iyiejnane quigode uje basíome yocáquiode ore nanique mu!

¹⁸ Que yocáyipieraque cho caru ome ua, ga que yoquirídade chicai quedéjnarique ome bajesu ũrei uté gotique to.

¹⁹ Mu bapésu yoque ga ejaque yóguiji jnumi, ga bẽra yógome cuchiso chagúrigo ore iji ore jogadébei iji erãpe eyutiguei uté. Ga bacha yógaja ijnangunu cuchábedie ajã́ro uje pitoringai uburúdi tu.

²⁰ Ujetiga jé ũré ga yicadíjorasi Yocudupade uté i, jeoga yicórasi ga yarangoi yoquijmanecade iji gatéode ome dupa quedéjnarique yui,

²¹ ¿ama ca Dupade uté chuchẽri cuchade udore iji guesode a? uje uté chirajapise páyipie pipoguiédedie udire quigode jnese.

²² Yoco yoquiba badode, uje pitoringai socárome yoque iji deréjnai údode. Ga yocajnunie u áyasadie uje yungóremétique chujé udire.

²³ Be ga ãriji, Pangarádejná. ¿Cuchárique u gu a uje bamo? Ãriji, enga jé ca o betéguiji yoque iji deréjna pitade.

²⁴ ¿Cuchárique u gu a uje bapógu bedodie, ga bacadique yocúringai áyuguhebátaque, jé aja uje yejnárejo cuchade isagode gatuaque?

²⁵ Uje yitecucóji jnumi ome yocúringane eyúcho, ga yocaode catája jnumi uté.

²⁶ Pangarádejná, be ga ayáguena yoqui ome báringai Yocátajasṍre; ga aqueta yoque gu bajnoraquédatéi uté.