Sálmos 43 - Dupade Uruode

¹ Urénga, Dupade á, be ga ajire yadode enga ãrarare yúringai ũré gai ome puniri uté uje que idaisórone ore anguretique dupa cuse. Be ga ajnime yu iji aringácachoquíode, jé aja jnani ate gajnaréngone udore ore jmainie rĩ.

² Ua u gu yetotiguei guẽrasõre Dupa. ¿Cuchárique u gu a uje bacha yu aja ti yui ome ua? ¿Ga gotique gu a uje áyuguhebátaque yu aja yajesúode ome yumajosórone udore ore uje jecucha ore cho dajosipié ome yu?

³ Be ga aroque badírecaringuéi uté aja yu, jé aja basoca uréone udore ore, ga apésu jeta ore cho yiquique. Apésabu ga ore jno yúdi aja bajogapi cucarãte puyaque uté, aja pijogadi uje bapúsi uté.

⁴ Enga jé u jne ujetiga yise Dupade gaseradéjnai iji uté, ga Dupade uté u uje guẽrate yininaquei ome yu, ga yajmaráni tupo uté ome yu rĩ. Urénga, a yujé yi árpa jne ga yicota ua, Dupade á, Yangureni Dupá.

⁵ Yáyipie á, ¿Chimo jóroque re uje cuchade na ua aja jnumi? ¿Cuchárique u gu a uje áyuguhebaté ua? Angureta Dupade uté yui ome ua. Uje a jé yejna yu aja ujetiga yicota uté. ¡Uje Yiquetasṍri u uté, ga Yangureni Dupa upo uté rĩ!