Sálmos 42 - Dupade Uruode

Piradé udaque gajnesṍri u piradedie irajasṍripísi. Coré abode gajné Sálmo udaque jeta po quique gosi ome.

¹ Yajnua tu erámoro uje chucué dajópitique iji tié uje uaté cajnóripísiji. ¡Urénga, yáyipie jnátupúsu báringárique pucueque, Dupade á!

² Uje yuyádi jiépisi ome Dupade, ome Dupade uté uje pucuecaringuei garani tu. ¿Chimo jóroque re dínique jne jeta yibasája Dupade uté iquei?

³ Yo yibotíji yeducadode udore iji dirode, dejade ore jnese. Iji deréjnai údode ga jnanione ore catecã́ri yu, enga ore chojninga: –¿Bangureni Dupade gotique, déji rique?–

⁴ Yujnusinamánone cucha u udojo, ga yáyipie eyugue iji jmainie: Iji dire omi casodica ga jecucha ayoré bujna uyoque yijínango ñane, ga ore cho dajñánguiji uyu aja Dupade iguíjnai uté yui. Ga jecucha yachietágoji yoquiqui uté yui ga yinguíraño yoquibijnanone aja yoquejode uje yicotágo Dupade uté aja yocajesui. Enga yipéco dire puyaque cuchábode iji uté nanique.

⁵ Yáyipie á, ¿Chimo jóroque re uje cuchade na ua aja jnumi? ¿Cuchárique u gu a uje áyuguhebaté ua? Angureta Dupade uté yui ome ua. Uje a jé yejna yu aja ujetiga yicota uté. ¡Uje Yiquetasṍri u uté, ga Yangureni Dupa upo uté rĩ!

⁶ Urénga, peyutiguei chise yáyipie uaté. Jecute a yujnusina ua jne, Pangarádejná, jé iji jnumi uje déji yote quedéjnai Jordán uté dosadode, jé aja cucarãte yoricode uje udore íode u Hermón, Mizar ore.

⁷ Yote quedéjna ajedatéode udore ore tibidi ñane iji bajnéone yote uo usereréjna jmainie. Ga que iyieque yote quedéjnai uté josé jé aja úringai bayaque, ga bapésu jetiga udore ore yore yibai jnese.

⁸ Iji diri enga Pangarádejnai chiroque dajnoraquei aja yu iji diri údode jnese, enga uté chisíome daradé ome yu, jeta nóna yu aja quedéjnane iji dejai údode, enga jé yicatecãraitigade qui tu ome Dupade uté uje yucuecaringuei gãrapiésõri u.

⁹ Yicatecã́ri Dupade, uje Yãreto Cucarané tu, enga yojningame uté: –¿Cuchárique u gu a uje bacadígui yu? ¿Gotique gu a uje áyuguhebátaque yu aja yajesúode ome yumajosórone udore ore uje jecucha ore cho dajosipié ome yu?–

¹⁰ Yajnoquéode udore ore chejnáreque re ome yute chagúode uje chise yajnoquéode udore ajei iji yumajosórone udore idojnóngamátigade jmainie. Ga ore chósi tome yu iji deréjnai údode: –¿Bangureni Dupa gotique, déji rique?–

¹¹ Yáyipie á, ¿Chimo jóroque re uje cuchade na ua aja jnumi? ¿Cuchárique u gu a uje áyuguhebaté ua? Angureta Dupade uté yui ome ua. Uje a jé yejna yu aja ujetiga yicota uté. ¡Uje Yiquetasṍri u uté, ga Yangureni Dupa upo uté rĩ!