Sálmos 41 - Dupade Uruode

Piradé udaque gajnesṍri u piradedie irajasṍripísi. David ipesudé Sálmo udaque.

¹ Pininaquei gajnesṍri tu gosi uje chiraja posongaquei ome dojórique ayoré uje garósi gosi etotiguei; uje Pangarádejnai a chijnime osõratai uté gosi iji gajnenie pujuré jmainie to jne.

² A Pangarádejnai gãreque uté gosi ga suse uté ucuecaringuei guio jne. Ga a Pangarádejnai pésu uté úringai pininaquei gajnesõre iji erámi, enga a jé ca timiningara uté gosi ome umajosórone ore josipiedie udore jne.

³ A Pangarádejnai chisíome gosi uajatiguei ome jne rĩ jeta déji damochápi ome dejnarétigo. Ga a chiqueta uté gosi ome ejnaréngone udore jne enga chinoningase uté gosi ejnaréngone enga nóña ga ijõrápo gosi rĩ.

⁴ Uje yojninga diríca: –¡Urénga, Pangarádejná, be ga osṍrape yu! Ga aqueta yu ome yejnaréngone udojo, uje yiraja uje yipésu cucha gajnaréngone ome ua.–

⁵ Ga yumajosórone ore uruode gajnarécho ome yu uje ore chojninga: –¿Ga cho pírique jetiga toi, ga íjnoque uté i úringai pirajaque?–

⁶ Ga gosi tibágui yu jeta chimo yu, mu narare ome daringaquéode. Uje uté chajmitapise dajutarétiga gajnéone cucha jnese iji dáyipie ga e chise dajere iji guesi ga que pógupo udore rĩ ga jé u uje chedo yu iji udore, udore.

⁷ Yetesórone udore ore jnese chimáta ñane jeta ore chedo yu ome dabujadie. Ga ore jnátu yúringárique pajnangarañaque yui iji dáyipie gajnarénguenie quigode.

⁸ Ga udore ore chósi tome daruode ome yu: –Dequejnareque noñánguipísi tu uje yore uté gai, ga a jé ca pejñunguíji uté údode jne. Uje moji damochápi ga que tocápo chaguesírique ome uté rĩ.–

⁹ Yijõrápisi uje yangureta ome cuchade diríca, uje jecucha yacásãcoa ñane, mu uté nóña ga chuchiéjna yu ome dajadia.

¹⁰ Mu Pangarádejná, be ga osṍrape yu. Be ga aringare yu aja gaté ga jé u jeta yo yetesórone udore ore etétigade ujo ome yu.

¹¹ Yiraja uje e bamesẽre yu, u gu uje yumajosórone udore que ore nína re ome dáringáringo yujnuéngaisóño, ga que udore ore chigójna yibai.

¹² Mu uyu ga basa yu iji gaté ome yadode úringane arécho, enga jecucha bacha yu aja baquei gatuaque.

¹³ ¡Jé tiógarapísa Pangarádejnai uté úringai pisígai, uje israélgosode ore Angureni Dupa jé u uté, ga jé upúsu iji dirode udojo jé aja siqueré uásejnanie iji yoquiquigade, yoquiquei ore gatuaque! ¡Amén!