Sálmos 40 - Dupade Uruode

Piradé udaque gajnesṍri u piradedie irajasṍripísi. David ipesudé Sálmo udaque.

¹ Yidota yuja yirodítigai ome Pangarádejnai uté. Ga uté tajia gadoi jetiga tangári yagoyedie udire ome re.

² Uje yugúsiji erutique ajé carujnánguejnai, ga que toque guese pigaitique ome yu iji pacataringuei uté. Mu uté chijnime yuji uté, ga chicha yirídade aja cucarané timingue gai, enga que toc ujeta yirípieraque qué chopo caru iji uaté gai.

³ Ga uté chisíome pibijnate ichai ome yu rĩ, ga piradé icha tṍrapóji yibijnani rĩ uje picotaquei gajné uaté ome Yocangureni Dupade uté. Ayoré jiéode a ore chimo yu ga ore todo jne, enga a ore chicha danguretigai aja Pangarádejnai uté to jne.

⁴ Pininaquei gajnesṍri tu gosi uje cho dangureníji Pangarádejnai uté. Ga que uté chajire dicotárechoquíode udore ore yúrique gotique, jé aja udore ore uje ore angurenone u dupa quedéjnane udore ore.

⁵ Urénga, Pangarádejná, Yudupá, jiei bamaningone cucha pitijabácho. Jiépoi báyipie omenie quigode rĩ ome yoque ga que pejnai udire jeta pisecaranei. A yajéraso jeta yĩrarare ga yatata udore jnese, mu que toc jeta yejna udore úringáringo púcho.

⁶ Que ajnátu cuchiso pẽrapáitique ome ua jeoga cucha peranone uñeque, uje que ẽ́care udore to, mu bayo yangoroné údi ome yúringárique angoninguite guesaque uté. Uje que bacuei tu cuchiso piboritique to, jeoga peranone udore uñeque uje pipotame udore ome pisijnaringuéone úringáringo pĩrocho.

⁷ Jecute yojninga: –Yugúsiji dé. E yĩri, uje adi jé upúsu ore urusarane quigode ome yu uje purusãracho iji darujna aode uje pipocayaque aja ñane.

⁸ Urénga, yijnátu ujetiga yi bajegaidode cucha jne, Yangureni Dupá. Bacajnaquéode udore déji yáyipie ajei.–

⁹ E yatata cucha uréone quigode iji gáguedaté uaté. Baraja, Pangarádejná, uje yetéquetí yujuru yibijnani gai uje yatata bojningane cucha ũréo quigode udore.

¹⁰ Enga que yacose bate arégode iji yajei ome ore. Yatata ua uje ũré ua ome bojningane cucha jnese, ga yujúdi u báringai Piquetasõre to. Enga que yipógu báringai pijnorasõre ome barása dipeséode udore ore ga yatata báringai ũrepise ome ore gatuaque.

¹¹ Jé ca ãraque bosongaquei uté ome yu, Pangarádejná. Mu ajuéga ga jecucha bajnoraquédatéi, báringai ũré udore ore nóna yu aja quedéjnane gatuaque ome yúringai pañeraque.

¹² Yajnenie pujuré dipesei udire chaparu yibai uje que toc ujetiga pisecaranei ore. Jé aja yipesudode cucha gajnarécho uje ujuya yu, ga íjnoque yajirigode ome cuchade udore. Ga udore chãraja yatererodie ome dáringanie dipesei, ga nápusu yáyipie aja jnumi.

¹³ Urénga, Pangarádejná, be ga amesẽre jeta aqueta yu. Aquejname gadoi ome báringai Yátajasṍre, Pangarádejná.

¹⁴ Omitigai turásu ome udore ore jnese uje ore chucué yúringárique chuque, ga dipoi yore udore ore gai, ga jé ca ore chiraja dasocáringome re gotique. Ga udore ore jnese uje ore ipotigádi tu yúringai pajnangarañaque, ga omitigai turásu ujetiga pijócãráque ore, ga ore chayo ome dáringane ajegátacho.

¹⁵ Udore ore uje ore cho damitiguéome yu ome dáringane ijoyatácho ga jé tiógararása ujetiga ore gajnei pajegátiga uté chiborátaja tarétigárique ome ore.

¹⁶ Mu udore ore jnese uje ore ucuei tu ua, ga omitigai turásu ujetiga ore chachietáji re ome ua, ga pininaquei irágupúsu ore ajéode. Udore ore uje ore chijnóra báringárique ore iquetangore ga udore ore chojningárasa gatuaque: –¡Jé tiógarapísa Pangarádejnai uté úringai pijosiguíji gaté!–

¹⁷ Mu ayoré jmataque yu, ga que urénga yimo cucháringome yu. Mu yipésupú, ga Pangarádejnai áyipie chise yu to jõ. Ua u Yátajasṍri, jé aja Yiramesṍri uté. ¡Urénga, Yangureni Dupá, jé ca ãra ua iji cuchárique jeta átaja yu!