Sálmos 39 - Dupade Uruode

Piradé udaque gajnesṍri u piradedie irajasṍripísi uje i tu Jedutún. David ipesudé Sálmo udaque.

¹ Yojningame yu iji yáyipie: –A yujusípise yadode guio jne, jeta jé ca yipesutique cucha gajnareque tṍraji yibijnani, jé iji ate gajnaréngone udore ore edominone. Uje a yigaru yibijnani ome buricade pijnani erã́sore gajnui jne.–

² Uje yajnui tu pijnate paritique uje que toque darai ome uté. Enga yopise paraque. Enga que yĩrarare ome cucha onique quitique rĩ. Mu jé ate uje yáyuguhebátigade udore jno dádi.

³ Yáyipie iji yajei cho jeta piotique tagu gai ome yáyuguhebátigai. Yáyipie gaidode cucha jé chõre yáyipie úringa júruru iji yajei. Ga quene yarei narare, ga chósi te yuruode:

⁴ –Pangarádejná, be ga apésu ujetiga yiraja yajnéone dire udore amíningo ujetiga qué yiqueca, ga angongara yajnéone dire eruénique aja yu. Átaja yu jeta yiraja uje yucuecaringuemi cachi cucha abape.

⁵ Bẽrate yucuecaringuei ome yu uje utugudé yucuecaringuei iji erámi tudé. Que cucha yucuecaringuei gotique iji baquei, ga bagurite jnanione jnese uje ore ucuecaringuei gajnui tu pujñánique uje pijnimique iji guesi ga eruei jé upúsu uté iji erámi tudé.

⁶ ¡Jé ũrepise uje jnanione ore chaca ñane ome dáringane disorãque, ga ore gajnui tu purúdi uje jĩraque íjnoque! Uje gosi quejnapísi jórogome dagúcha orerãque dipeséode úringáringo chucho aja ñane gáyode, mu a uté toi to jne ga que pirajaque gosi jeta cho dajnecho iji uté imatade cucha uásejna udore iji uté gosi quigade.

⁷ Pangarádejná, ¿ama yiroditique cucha jetiga yirote uté yui ome yu a? Ua u uje yedu báringai pirodique yui ome yu.

⁸ Be ga ajnime yu iji yisijnaringuéone udore jmainie. Enga ca ajuéga jetiga táyipiegode udore ore cana yibai ome dajñiequérigo.

⁹ Yopise paraque, ga yajnui tu pijnate parigode, uje ua u uje bapesute cuchade udore gu.

¹⁰ Ayabu bejopode udore ome yu. Uje eyuque yu iji bejopode udore jmainie.

¹¹ Bapojna jnanione udore ore, ga baquesu ore údode ¡jnaque! gu ore isoca gajnaréngone. Bo ducúdabádie isocai uté uje bejna ore ajmaránone cucha orerã́cho jnese, uje ore ucuecaringuemi cachi cucha abape iji erámi tudé ga cho jetiga gosi tṍra dajñari aja guesi ga eruei jé upúsu uté iji erámi tudé.

¹² ¡Angarami yicatecãráitigade quigode udojo ome ua, Pangarádejná! Orei bangoninguini iji gadoi jeta angári yagoyedie iji bejode. Enga ca o parágome yeducadode udojo iji baquei. U gu uje yajnui tu ayorérique uje chapája dariguítigade ome ua, ga cachi urugu yu iji erámi udé, uje yáqui cásodicáite jnese ore jmapié jé u to nanique.

¹³ ¡Urénga, aya bu bajiritigade ome yu ga ajirape ti yui ome yu, ga yirasitigárique chajniápo yibai te rĩ ujetiga cáma yitoi, ga tita yu iji erámi!–