Sálmos 36 - Dupade Uruode

Piradé udaque gajnesṍri u piradedie irajasṍripísi. Pangarádejnai iroi David ipesudé Sálmo udaque.

¹ Ate noñai uté gosi ipesute gajnaréngone chingongarája yáyipie uje que uté gosi chiraja pisadodéringárique ome Dupade gotique iji dedominone.

² Uje uté cutejmai inejequéode ome re suru dedodie gai, ga que toc eti chiraja ipesudode cucha gajnareque udore úringane noñánguipíso.

³ Ga uruode uje tṍraji uté pijnani ga gajnarénguipíso enga tácho udore to. Enga e cha pésu payuquetotiguei, cucha arégode udore ore quigode to.

⁴ Uje uté gosi terẽtáji damochápi gai mu jĩraque áyipie déji pujuré pipesudéraque. Ga uté e chajo dáyipie aja dajei uté uje chorei uté iji ipesudode pisijnaringué udore, ga que chujna cucha gajnaréngone udore úringáringo pipesute ome re gotique.

⁵ ¡Urénga, Pangarádejná! Bajnoraquei cuchadaté enga chise gatajnoquei. Ga basoca uréone chuságaja gatajnoquei uté iji te uje atéta uaté iji gaté.

⁶ Báringai ũré jé cho cucarãte yoricode udore ore ome ore úringane cuchadatéo. Barecujate iyiejnanie udire gajnúone u yote quedéjna cuchábode ajedatéode to. ¡Urénga, Pangarádejná! Ua u uje bajuse jnanione ore guio, jé aja cuchiso ponáyone udore ore guio jnese.

⁷ ¡Orerã́quedatéi tu bajnoraquédatéi, Dupade á! Ayoré ponáyone ore abode iji erámi ore chise ua ome báringai Pãrésõre, ga bacha ore aja bajnóngone údi ome báringai Pañerasõre.

⁸ Ga ore úringane subudé jogadi u uje ore déji bari uje que cuchárique chona ua iji baguíjnai uté. Uje bapésu ga ore chóji iji batié ueradé uaté uje cucha pajmaránone déji.

⁹ Ua u gu uje pucuecaringuei uté garani simíjna déji ua. Ga dírecaringuéi pijógome yoque gu badírecaringuéi uté.

¹⁰ Ajnera bajnoraquédatéi údi ome barajasórone udore ore, ga basoca uréone ore nóna áyipie arégode udore ore aja quedéjnane.

¹¹ Jé ca ajuéga jeta dicotárechoquírique doi ga chuchiéjna yu iji jnumi ome darídai uté. Ga ca ajuéga jeta jnani sijnai gotique chucuase yu aja quedéjnane ome dajmanai uté.

¹² Cajicho cucha gajnaréngone ipesusórone udore ore to uje e ore cṍra ¡pac! ¡pac! Pucuayaque udore ore aja jnumi, ga que toc ujetiga ore nijiápo rĩ.