Sálmos 35 - Dupade Uruode

David ipesudé Sálmo udaque.

¹ Pangarádejná, be ga ãrarare yibai ome udore ore uje ore cho yibáji cuchade. Ga be ga o bajocaningame udore ore uje ore cho dajocaningame uyu.

² Be ga o ayoré jõcaratátique ome doidé daguebé ome darosadode, ga átaja yu iji de.

³ Asa basõre, bõrachade ore, ga ayáguena yumajosórone udore ore yui uje ore chajna yu aja quedéjnane. Ango baruode aja yáyipie ujeta ósi tome uyu: –Baquetasṍri tu yu.–

⁴ Yipésupú ga pijosique udore ore iji jnumi uje ore pota yúringárique chuque, ga gusu jeta ore chimo pajegátigárique ome re; ga udore ore uje ore chayója ñane ome yúringárique pajnangarañaque yui, omitigai turásu ujetiga pijócãráque ore, ga ore chayo ome dáringane ajegátacho.

⁵ Ajuéga ga yumajosórone udore ore cho jnacaraque chiriritágode uje emi chorei udore iji quedéjnane, ga Pangarádejnai irótique gaté unirísõre u jeta tṍra udore ore aja quedéjnane.

⁶ Ajuégapo rĩ ga ore ajnai dajeque uté utata, ga ore guípiedie cho caru, caru iji uté, uje Pangarádejnai iroi gaté unirísõre uté ajnapaite ore iji jnumone.

⁷ Uje ore pógu ore ujuyágaidóde ducaricho ome gadoi uje que udore quitique cusipise ome yu, ga ore chijócha eruque cuchábi iji yiquei jeta yibasája uté mu que yiraja cucha dacatique iji uté, uje que yo yiba cuchárique ome udore ore gu.

⁸ Jé ueradi turásu ujetiga ore gajnei pujuyaqué chague ore gai iji uté ga chajuque ore aguté, jé aja ujetiga ore ujuyágaidóde ducaricho isaque ore ga chimate udore ore aja ajei uje ore pógu ome gadoi, ga jé ore basája dajnei eruque ¡tínipe! uje ore cachodi tu.

⁹ Enga a jé u jne ujetiga yáyipie nína re ome Pangarádejnai uté, ga yáyipie uaté a chajmárapúsu uté ate ueradode jne uje chiqueta yu.

¹⁰ A yejna yáyipie aja Pangarádejnai jne, ga yojningame jne: –Pangarádejná, ¿ga bajnúrique bojo ayoré jé déji a? Uje barota jmatágode ore ga bajnime ore iji ayoré uajádode ore josipiedie ome udore ore. Jé aja uje ore gaidi u pajnoñaquei ome udore uje cuchade chona ore ga bo barotaquei iji udore ome ayoré jmatágode ore uje bãrarare ore gai.–

¹¹ Pijogúsõre tágode ore chague ga ore chaguhéta cuchade yibai bisideque. Ga ore catecã́ri yu ome cuchade uje que yiraja quitique.

¹² Ore cho yoré iji cucha gajnaréngone uje que yujuseque udore ore gotique mu, enga jnusietépise yáyipie iji udore ore jmainie.

¹³ Mu uje dequejnaréngone ipatigayaque udore ore ga yigui yiguidé uje chichagu yibai tec, teque, uje pujnusiétigai imoto yiguidé uaté. Ga yijosi yu iji jnumi ome yúringai uyataque. Mu ¿chimo jóroque re gotique? uje que pichajnaite yicatecãráitigade udore go, ga yicatecãráitigade ore chajníja yibai.

¹⁴ Ga yirajũre yu iji jnumi ome yujnusiétigai, ga cho jetiga yijõrapísirique u jetiga jnusiétaque yu ome, jeoga yesatique u. Uje yajia yu iji yiyaridi uté ome yúringai ongáca, ga cho jeta yatéraque gajnei yagoyedie udire.

¹⁵ Mu uje yo caru iji yajnéone cucha dacate gajnarécho jmainie, ore chachietáji re, ga ore chayója ñane ome darasitigade udore. Sijnángone udore ore chamáta ñane ome yúringárique ducañerájma yui, mu que yiraja. Enga que ore cho daja ome dajutarétigai ome yu.

¹⁶ Udore ore cho Dupade anguresórojmane uje ore socárome yu, ga ore cho damitiguéome yu. Jé aja uje ore chigase dajúode ome yu to.

¹⁷ ¡Urénga, Pangarádejná! ¿Cho rique jetiga apáñaji ore atuátigade ome yu mu que ajnime yu iji udore ore josipiedie jmainie? Ga aqueta yucuecaringuei uje dugápise yucuecaringuei udé. Aqueta yu ome caraté quedéjnanie udire uje ore chachẽre yu.

¹⁸ Ga a yacãre babai jne iji gáguedatéi enominone. Enga a yicota ua jne iji ayoré dipeséode udore ore iquei.

¹⁹ Jé ca ajuéga jeta yumajósõre bisidégode udore ore nína rágome yu jne, uje que yiraja yiba gajnetique cucha iji ore. Enga jé ca bajuegádi tupo rĩ ujetiga yetésõre bisidégode udore ore chéngame dedógade ome yu uje ore chedo yu, uje que quitique cusipise ome yu mu.

²⁰ Uje que pajesereringárique déji ore urúrique gotique to, mu ore di daringaquéode údi ga ore chijnime darade ome pachamini udé achamisõre uréone udore, uje jnani parágode udore cho paráguiji erámi udé údode.

²¹ Ga ore pijnanone guesája yi uje ore chimo yu ga ore chósi tome ñane: –Jé ũré. E yimongopise uté isocade ome yoquedodie.–

²² Urénga, Pangarádejná, bamo udore ore ipesudode cucha ga jé ca o paraque ome udore ore. Ga jé ca apésu jeta idája ua iji yu, Pangarádejná.

²³ Be ga ãrijína bejode ome yu, Pangarádejná, ga ayáguena yi ome báringai yãrésõre, Yangureni Dupá. Apésu cucha uréone quigode ome yu jeta ãrarare yibai.

²⁴ Ajire yadode aja quigode ome bajiritíga uréone udore, Pangarádejná, Yudupá. Ga ca ajuéga ujetiga udore ore nína rágome yu iji dajosipiedie quigode udore.

²⁵ Jé ca ajuéga jetiga ore chósi tome yu iji dáyipiedie: –Yocáyipie quicho jé u udore ome uté.– Jeoga ore chojningárasa: –E yiníco uté gai pórecajna.– Mu ca ajuéga jetiga ore uruode u udore ome yu.

²⁶ Omitigai turásu ome udore ore jnese uje ore chachietáji yúringai áyuguhebátaque ga dipoi yore udore ore gai, ga jé ca ore chiraja dasocáringome re gotique. Udore ore jnese uje ore chosi riji gaté ome yu ga jé tiógara ujetiga pijosique udore ore iji jnumi, ga ore cho pepeque piguitíguiji pajegátigai uté.

²⁷ Gosode uje ore chirota yisoca arégode udore ore ga a ore dorási ga ore chinguírarása dabijnanone aja dejode ome daninaquei, darasitigade udore ore. Ga udore ore chojningárasa gatuaque: –Jé tiógarapísa Pangarádejnai uté úringai pisígai, uje uté u uje nína re uje cuchade uerachome daroi uté.–

²⁸ Enga ome yarei udé ga a yĩ́care ua ome báringai ũré jé aja bajnéone yicotaquéo gatuaque jne iji deréjnai údode.