Sálmos 34 - Dupade Uruode

David ipesudé Sálmo udaque iji deréjnai uté uje cho ũruso iji re iji Peduguéjnai Abimelec iquei, ga pijócãráque David uté ome dasocade udore, ga jno.

¹ A yacacãre Pangarádejnai ome yuru omone jne iji deréjna pitade jnese. Ga a jecucha uté gajnéone yicotaquéo tṍraji yibijnani jne ome Pangarádejnai uté.

² Yo dicotárerique ome yirasitigade iji yáyipie, mu gusu yáyipie uaté isígai tu Pangarádejnai uté isocade ome yu. Ayoré áyuguhebátade a ore chudute udore ga ore nína re jne.

³ Beyoi ga yoquicotaquéode cho ñane ome Pangarádejnai úringai iménu uté, jé aja ujetiga yijocoi uté i ueradi iji gaté jnese.

⁴ Yucué Pangarádejnai uté ome yu, enga uté chajnai yu ga chirame yu iji yitódode cucha jnese jmainie.

⁵ Udore ore uje ore chajire Pangarádejnai uté yui, ga uté idírecaringuéi pijóguiji udore ore edodie, ga que toc eti ore chaco dedodie gáyode ome dáringáringo dipócho.

⁶ Jnani jmatai udé uje chácari te ¡paque! ga tibidi Pangarádejnai, enga uté chudute uté pijnane; ga chiqueta uté ome dajnéone cucha dacate gajnarécho udore jnese.

⁷ Pangarádejnai iroi gaté unirísõre chaparu darosójmasórone udore ore gai ome dáringai irodicáca, ga chiqueta udore ore.

⁸ Urénga, etingacho Pangarádejnai uté ga amóño uté cutejmai unéningai ome uaque. ¡Pininaquei gajnesṍri tu jnani uté uje chicha danguretigárique aja Pangarádejnai uté ome úringai Pãrésõre!

⁹ Atõroráñoja Pangarádejnai iquei, uaque jnese uje uté cho dajnenguíji uaque, uje a jé ca cuchárique chona udore ore jnese uje ore dosóñime uté.

¹⁰ Caraté ucatóguedie a ore potique cucha chona ore, ga ore chejnáreque dayaguhénique, mu que cucha onique chona udore ore gotique uje ore chucué Pangarádejnai ome re.

¹¹ Abáchoi uyu, pabode, pabidie uaque á; angachobi uyu ga yacate uágome cucha dacadi ujeta arajáyo Pangarádejnai úringárique pitote to.

¹² ¿Ama gosi iji uaque chijnóra dacuecaringuei iji erámi udé? ¿Jeoga gosi ipotigádi tupúsu ujetiga umare gajnéone dire udore, ga pota chimo cucha dacate ueradode ome re gatuaque?

¹³ Uté gosi gajnei tu ujetiga chidota dabijnani aja ñane jeta jé ca uru gajnaréngone udore tṍraji. Enga jé ca purupatáringárique chácariji uté pijnanane gatuaque.

¹⁴ Ajíome cucha noñángone iji te jmete. Mu apésu cucha arégode aja quigode. Acué pajesereringai gatuaque, ga ajna uté jeta jé ca amoque uté quigode.

¹⁵ Pangarádejnai uté edodie chajire ate arégode udore ore yui, ga uté angoninguinone guesa ome udore ore icatecãraitigade yui to.

¹⁶ Jé basa ga Pangarádejnai enochai chísajame pisijnaringuéone ipesusórone udore ore. Uje gaidi tu gu ujetiga chinoningase udore ore enga que páyipie gaidápo ore iji erã́tique rĩ.

¹⁷ Jnani uréone udore ore tibidi dejode, ga Pangarádejnai chudute udore ore, ga chijnimápo udore ore iji ore gajnenie pujuré jmainie rĩ.

¹⁸ Pangarádejnai idógosipísiji udore ore uje pajnangaráña ore áyipiedie aja quedéjnane, enga uté chiqueta udore ore uje cuchade na ore áyipiedie aja jnumi.

¹⁹ Jnani ũrépitique ujuré gajnéone cucha jiépisi marínga, Pangarádejnai u uje chajuque cuchade udore jnese iji gai.

²⁰ Ga uté charanguipise jnani ũré uté ajnoquéode úringáringo pimocherãcho iji uté údode, ga que juéga chojmarárique gotique jeta pimocherãque.

²¹ Jnani sijnángone udore jé ore guejnaque re ome dasijnaringuéone uje ore isijnaringuéone chajni ore gai. Ore u jnese jeta ore chetaque jnani ũrei ga udore ore chise dáringane pujuya jnese.

²² Pangarádejnai uté chiqueta darógode udore ore ucuecaringuei, enga a ca pujuya udore ore jne uje ore chicha danguretigai aja uté.