Sálmos 32 - Dupade Uruode

Peduguéjna David uté ipesudé u Sálmo udaque uje cho ore quique.

¹ Pininaquei gajnesṍri tu jnani uté gosi uje e pinoningañaque uté isijnaringuéone iji, uje e pĩrocho uté gosi ate gajnaréngone jnese ga que dépoji páyipieraque rĩ.

² Pininaquei gajnesṍri tu gosi uje Pangarádejnai que chimo detépitique cucha iji uté gosi uje que chopo máranguiji uté rĩ, enga que paringaquérique déji uté gosi ajénique.

³ Uje cáma yatata yate gajnarétique ga que yute ajnoquetique cusapo rĩ, ga gose yujnacade ore, uje yijnaríji jnumone iji deréjnai údode.

⁴ Ga bajmanai pénu ome yu, uje chijna yu aja jnumi, jé iji dirode, dejade ore jnese. Ga yibeta uje yote gajnui íjnonguiji yúdode ga yajnui tu jnumi cajnóningárique iji árenie.

⁵ Mu yatata yipesudode cucha gajnarécho ome ua, ga que yipógusu yisijnaringué uñátique ome ua. Ga e yimate yáyipie, ga yojninga: –A yatata yate gajnaréngone ome Pangarádejnai uté jne.– Enga jé u uje jĩraque banoningase yúringai máraque ome yisijnaringuéone iji yu.

⁶ Jecute ate arégode udore ore jnese gajnenguírase ujetiga ore catecã́ri ua uje qué deréjnarique déji ujetiga piyaque ua iji uté. A gosi gajnenie pujurei jé chorase yote quedéjnadatérique ome úringai bayaque marínga, yodode udore a jé ca chise uté gosi ome dáringárique pirosobate jne.

⁷ Ua u Yãrésõri, uje bacose yu iji bayaridi. A ajuse yio jne ome cucha pirosobádode udore jnese. Enga a aparu yibai jne ome baradedie udire uje udire ore achachagúgode chedo Báringai Piramesõre ome yu.

⁸ Pangarádejnai chojninga: "A yisíome yacajnaquéode quigode ome ua jne, jé aja jeta yacate ua ome pisoca uréone quigode jeta ajna iji jnumone. A yo baquique jne, ga a jé ca yedóraque chamurase ua iji yenomitique jne.

⁹ Ca o buricai, burica quedéjnami ore, uje que udore ore chiraja cuchárique. Uje jecucha ore chanire burica quedéjna pijnani erã́sori aja pijnani jeta ore chisa uté aja quedéjnane. Uje a jé ca ore chanire uté aja burica quedéjnai pijnani ga que tangári cuchárique, ga uté a jé ca chose bei jne."

¹⁰ A sijnángone udore ore chejnáringui jóroque cuchade jne uje chise ore, mu jé basa ga Pangarádejnai ijnoraquédatéi chaparu gosi gai uje uté chicha danguretigai aja uté.

¹¹ ¡Achietáyoji uaque, jnani uréone uaque é, beyoi ga anínaño uágome Pangarádejnai uté! ¡Ajñecacho aja uaquejode ome uacaninaquei, áyipie arégode uaque jnese é!