Sálmos 3 - Dupade Uruode

David ipesudé Sálmo udaque uje chayome dajnacari Absalón nanique.

¹ Pangarádejná, baraja uje jiei yumajosórone uje ore cho damajo yu. Jiei yujode ayoréo ore uje ore chetaque yu to.

² Ga udore ore chojningame yu: –A jé ca Dupade chiqueta uté jne.–

³ Mu Pangarádejná, bajnui tu guebetique ome yu, uje pichajaque uté iji piquei ome jõcaratátigo ore õrachade. Yingoningájnai garani tu ua. Uje cuchade chácariji yúdode marínga, ua u uje bapesudápo yitijínaquéi rĩ.

⁴ Yinguíra yibijnani aja Pangarádejnai Dupade uté uje yutṍri jeta chátaja yu, ga chajnai yu iji dajogadi iji cucarãte puyai ójo.

⁵ Yiterẽta enga yimo marínga, yĩriji iji direjnímei ga que cuchárique chósi ti iji yu iji yúringai moque. Uje Pangarádejnai chãraque yu gatuaque gu.

⁶ Que yojórique cho jña gotique ome yumajósõre dipeséode uje ore chaparu yibai jeta ore cho dajocaningame yu.

⁷ ¡Pangarádejná, be ga átaja yu é! ¡Yangureni Dupá, aqueta yu ome udore ore! Ajé yumajosórone udore ore uredie ¡paque! jne. ¡Amochẽre jnani sijnángone udore ore patarane jne!

⁸ Pangarádejná, gusu ua uje baraja bajmapié ome yocúringáringo piquetacho. ¡Be ga acacãre barasade ore uyoque iji yocuniri udé údode ome baru ueradode!