Sálmos 29 - Dupade Uruode

Peduguéjnai David iradedie uña u.

¹ Gaté jogosórone uaque á, asíñome picotaquéode ome Pangarádejnai. Asíñome picotaquéode ome Pangarádejnai uté ome úringai nanganataque, jé aja ome úringai ujopíerãque cuchape.

² Asíñome picotaquéode ome Pangarádejnai uté ome i ueradéjnai uje jé tiógara dáringai pisígai gu. Abéroyo uágaja jnumi iji Pangarádejnai uté iquei ome uacáyipie ujñapeté ueratigai.

³ Pangarádejnai uté úringai dara déji yote quedéjna cuchábode udore gai. Ibisócho Dupa Ingoningarãi uté uruode ga cho guérique urúrique uje narare. Ibisócho Pangarádejnai uté uruode ga cho guéode uruode iji yote quedéjna cuchape dipeséode ore gai.

⁴ Pangarádejnai uté úringai dara que iyieque imenuringuejnai. Pangarádejnai uté úringai dara ingoningarã́quedaté.

⁵ Pangarádejnai uté úringai dara chibéro pore cuchábedie uje ore chojningame udire cédro. Iji uguíjnamui uje déji puniri Líbano uté ga cédrodatédie déji mu Pangarádejnai chusũrurase udire aja jnumi.

⁶ Uté pésu to ujetiga jogadi Líbano uté cho aquirájna abi uje chãrai riji gatéode; cucarani uté uje i tu Hermón, ga cho tóro ucatoque aceite uté uje cho dabai.

⁷ Pangarádejnai úringai dara uté cho ajnorápiedie uje chijñate dejode gai.

⁸ Pangarádejnai uté úringai dara pésu cochóya iji erãpetarei údode. Pangarádejnai pésu ga erãpetareque cuchábi uje i tu Cádes uté tãraráji jnumi.

⁹ Pangarádejnai úringai dara pésu ga erámoronie ore icadie tagúji ore, enga uté uruode chariguese porebúode aja jnumi ga e poti gaté poridie. Enga udore ore jnese uje ore déji uté iguíjna cuchábi ajei, ore chĩ́care uté ingoningájnadatéi.

¹⁰ Pangarádejnai uté chácariji dayaripi uté iji yote dequejnangóri uté gai; Pangarádejnai uté déji dáringai Peduguéjna Cuchape iji deréjna pitade jnese gatuaque.

¹¹ Pangarádejnai uté a chisíome petotiguei ome darasade udore ore jne; Pangarádejnai a chacacãre darasade udore ore ome pajesereringai jne.