Sálmos 26 - Dupade Uruode

Peduguéjna David iradedie uña u.

¹ Pangarádejná, be ga ajire yadode aja quigode ga a araja jne uje ũrepise yu ome yisocade iji yucuecaringuei udé. Gusu Pangarádejnai uje yicha yanguretigai aja uté, ga yidota yu iji uté úringai pangurete jeta jé ca yo sebeque.

² Ajiripise yadode ga etingare yu ujeta ũré yu ome ua. Etingare yáyipie quigode jeta ũréo to iji yajei eruéode jnese.

³ Uje que yedóraque chamurase bosongaquédatéi aja quedéjnarique, ga yajna basoca uréone udore quigode iji jnumone.

⁴ Que yácariji jnani aringácachoquíode ore gari to, ga yetéquetí yo yijõra iji udore ore uje cachi ore cho ũré iji raque, mu ore pógu dasoca gajnaréngone iji dáyipiedie.

⁵ Yetaguipise daquiráquechoquíode udore ore aquiningane to rĩ uje ore chucué dáyipie noñánguenie iji daquiningane udore, jé aja ate gajnaréngone udore ore to uje que yáta yu aja ore.

⁶ A yuru yijmainie jne, ome yúringai ujñapetaque ome ua, ga jé u ujetiga yijose baseradéjna puyai uté yui ome yijmana ichadie, Pangarádejná.

⁷ A yejnapúsu yuruode jne ome bacotaqué gajnéone cucha úringane patatacho, enga a yatata bamaningone cucha pitijabácho jnese jne.

⁸ Pangarádejná, yijnorapise baguíjna cuchábi uje bayarite ueradi déji uté uje bagúsiji uté gatuaque ome bangoningájnai.

⁹ Jé ca ajuéga jeta yipatĩ́ora cucha gajnaréngone ipesusórone udore ore. Enga jé ca ajnime yucuecaringuei iji yu jeta yo udore ore uje ore jnátu dojode ayoré úringai chuque.

¹⁰ Uje pate noñángone quigode e dimane iji ore jmainie, ga ore jmanai ãrachua irágupúsu ome dapláta jeta ore chisíome padode ajirisónique, ga uté jé ca cho dajuñame ore jne.

¹¹ Mu ome yu, ga a yi yijmapié aréguedie udire údi jne. Be ga aqueta yu, enga angongara báringai osongáca aja yu.

¹² E yirídade ore purúja jnumi tirótigai, jeta jé ca yo pómiji jnutique. ¡A yugúsiji ore uáguedatéraque ajei ga a yacacãre Pangarádejnai uté ome yuru ueratígo jne!