Sálmos 25 - Dupade Uruode

Peduguéjna David iradedie uña u.

¹ Pangarádejná, ua u uje yorei yáyipie iji bari iji te.

² ¡Urénga, Yangureni Dupade á! Yedu yangureta ua ome yu, jecute ca ajuéga jeta pinguíraja dipoi aja yu. Ga jé ca ajuéga jetiga yetesórone ore sué yibai.

³ A jé ca pinguíraja dipoi aja gosi ujetiga chirote bei ome re, arĩa. Amóngara jeta udore ore tiógara dáringane dipócho gu uje ore tẽra rome dáringane aringácachoquí, uje que quitique cuse mu.

⁴ Angongara basocade aja yu, Pangarádejná, ga acate yu ome pigabode uje bajnane u udore.

⁵ O yiquigome báringai ũré uté, enga acate yu. Yangureni Dupa u ua gu, ga Yiquetasṍri upo ua rĩ, enga yirodi tu ua iji deréjnai údode.

⁶ Pangarádejná, be ga jé ca amurase bosongaquédatéi, bajnoraquei udore ore iji bajénique, uje ore jé jogate ao.

⁷ Mu be ga amurase yisijnaringuéone iji bajei uje yipésu uje qué disi urẽjájna yu ica, jé aja yisoca gajnaré casodica uje yagu baruode aja; ga ome bajnoraquédatéi uté ajnusina uyu, u gu uje paraguipise ua, Pangarádejná.

⁸ Pangarádejnai u uje chejna pipararinguei aja re, ga ujñapetaque uté to rĩ. Jecute Pangarádejnai uté cho jnani ate gajnaréngone udore ore quique ome pisoca uréone quigode.

⁹ Uté cho jnani pajnotágode udore ore quique ome cucha arégode udore quigode, jé aja uje chacate ore ome dasocade.

¹⁰ Pangarádejnai uté jmapiedie jnese chingongara uté osongaquei jé aja uté úringai ũré aja udore ore uje ore dopísi uru iyiejájnane quigode, jé aja uje ore suse uté pijogúsorone daru quigode guio.

¹¹ Pangarádejná, urénga, yipesudi cucha gajnareque querúpise. Mu be ga acadígui yipesudi uté pisijnaringué, u gu uje bajnóra bei ueradi uté úringai pisígai.

¹² ¿Ama jnanírique gosi a uje tõrorája Pangarádejnai uté iquei? A jnani uté u jne ujetiga Pangarádejnai chacate dáyipie gaidode cucha isocade ome uté gosi.

¹³ Ga gosi agutíyabádode cucha a chaparu uté gosi gai jne, ga jogadi u uje tijode cho jnángome uté gosi, ga uté ájnape disi ejórigo a ore cho dajnéngu jnumi ueratigai jne.

¹⁴ Pangarádejnai cho dajõranguipísode iji udore ore uje ore tõrorája iquei, ga chingo daru iyiejájnane aja ore.

¹⁵ Ga jecucha yajire Pangarádejnai uté iji yibai ga yitoji gai. U gu uje uté a chijnime yirídade udore iji ore ujuyágaidóde ducaricho jmainie jne.

¹⁶ Cajirape yu to, ga angongara báringai osongáca aja yu, Pangarádejná, uje gusúpusu yu, ga yáyuguhebátigade cucha udore nápisa yu aja jnumi.

¹⁷ Yáyipie ujuré gajnéone cucha jé chajnera dádi iji yu. Mu be ga arame yu ome yirañímeone udore cucha.

¹⁸ Cajmitape yáyuguhebátigade udore, jé aja yejnaréngone udore cucha, enga ãro yate gajnaréngone udore ore jnese.

¹⁹ Adójnanga uje yumajosórone udore e jiei ore; enga ore etétiga dequejnangórone que chajire re ome yu gotique to.

²⁰ Be ga ajuse yucuecaringuei guio, ga arame yu. Jé ca aminingara yu ome pajegátigai, uje yayója ua jeta ãraque yu gu.

²¹ Ajuéga ujetiga cucha ujñapetade, cucha arégode udore ore gãreque uyu, uje yirodi tu ua ome yu gu.

²² ¡Urénga, Dupade á, ajnime israélgosode udore ore iji ore gajnenie pujurei jnese!