Sálmos 24 - Dupade Uruode

Peduguéjna Cuchábi David uté iradedie uña u.

¹ Jnumi udé jnese gajnengóri tu Pangarádejnai uté, jé aja jogosórone cucha, erãpe ponai, jé aja cucha uecade jnese uje cho dayaridi iji uté.

² U gu uje Pangarádejnai uté ipesute erámi udé iríbidi aja yote quedéjnane udore gai, jé aja uje ichajapite erámi tudé aja charidi iji yote quedéjnadaté bayáringai uté gai.

³ ¿Gosi urásu jeta choru Pangarádejnai jogadi uté cucarãte ójo? ¿Gosi urásu jeta cháguena gaté iji Pangarádejnai iguíjna puyai uté ajei?

⁴ Uté u uje icha jmainie ome cucha gajnaréngone, jé aja jeta gosi áyipie quigode uécho ome pisijnaringuéone. Ga jé ca uté gosi chorei dáyipie iji gaté ome ayoré gajnúone oredie to, jé aja jeta jé ca pésu daru iyiejnane ome daringaquéode gotique to.

⁵ A uté gajneque Pangarádejnai uté acacãrátiga omone jne, ga uté Iquetasṍri Dupade a chisíome uté úringai ujñapetaque ome uté gosi to jne.

⁶ Uté urása uréone udore ore isocai jé u uje ore chucué Dupade uté ome re; uje ore chucué benochai ome re, Jacob uté angureni Dupade, á.

⁷ ¡Arañoi uacatoidie iji gaté, Jerusalén jorídedie uaque á! ¡Beyoi ga piringarã uaque aja gaté, joride diyajmenie uaque iji Dupade Iguíjna Cuchábi á, u gu ujeta Peduguéjna Ingoningarãi tuté chacája pigabi uté ajei to jne!

⁸ ¿Ama gosi a, becarãi tuté Peduguéjna ingoningarãque? ¡Pangarádejnai uté u uje ubuñurãque, ga ujopíeránguejna uté! ¡Pangarádejnai uté u uje que pujnuéngai iji pocaningárique!

⁹ ¡Arañoi uacatoidie iji gaté, Jerusalén jorídedie uaque á! ¡Beyoi ga arañoi uacatoidie udire iji gaté, joride eyúgojmanie uaque iji Dupade Iguíjna Cuchábi á, u gu ujeta Peduguéjna Ingoningarãi tuté chacája pigabi uté ajei to jne!

¹⁰ ¿Ama gosi a, becarãi tuté Peduguéjna ingoningarãque? ¡Pangarádejna Dupa Pujnuéngaisṍripísi u Peduguéjna Ingoningarãi tuté!