Sálmos 22 - Dupade Uruode

Piradé udaque gajnesṍri u piradedie irajasṍripísi. David ipesudé Sálmo u.

¹ Dupa yajnengóri á, Dupa yajnengóri á, ¿cuchárique u gu a, uje bajíome yu iji te jmete? ¿Cuchárique u gu a uje bácariji quedéjnarique ome yu, ga que ese yu jeta aqueta yu? ¿Chimo jóroque re uje idája ua iji yibijnane udojo ga que angári yujnacade quigode to á?

² ¡Urénga, Yudupade á! Yibidi jóroque ua iji deréjnai údode, mu que achajnai yu gotique. Que yo yagoyedie uja iji dejade to ome ua, mu jé bate badi uté ome yu uje que o cheme, ga que yutajnoquérique cuse ome yu gotique.

³ Mu yiraja uje puyaguipise ua. ¡Ga ua u uje israélgosode udore ore icotaquéode chaparu babai iji bayaridi tuté!

⁴ Uje yocayode udore ore angureni jé u ua nanique. Ore chicha danguretigai aja ua, ga barame udore ore.

⁵ Ore tibite ua ome dagoyedie, ga ore chise dáringane pijosipiedie jusécho: chamáñaje ore changureta ua ome re gu, enga que ore changureta ua bisideque gotique.

⁶ Mu uyu ga que ayorépo uyu to rĩ, ga yajnui tu júpuchaque quedéjnarique. Jnanione udore ore cho detéquedatéi iji yu, ga yujode ayoré ore chujna yu jnese.

⁷ Udore ore jnese uje ore chimo yu ga ore chujñieta yu. Ore pijnanone guesája yi, ga ore chungurase datoidie iji ome yu.

⁸ Ga ore chojninga: –Uté changureta jóroque Pangarádejnai yui ome re, jetiga chiqueta uté. Mu a yajico jeta Dupade doi ga chiqueta uté jne, uje chiese Dupade cho dedójnari iji uté gu.–

⁹ Mu ua u uje bajnime yu iji ité ajei nanique; bapésu ga yicha yanguretigai aja ua uje qué yugúsi ité ijnanie gai uje chacucãre yu.

¹⁰ Uje quene yibase nanique mu jĩraque pijoque yúringai pãreque ome ua; uje qué yugúsiji ité ajei, mu Yudupade jé u ua.

¹¹ Jé ca idája ua ome yu jne, uje pujuredie idógosiji yu gu. Ga que yátajasónique cuse gotique.

¹² Ga yumajosórone ore gajnúone u tóro dipeséode ome yu uje ore chaparu yibai; ga tórodaté etógode u udore ore uje ore garani tu puniri ujnomerãque Basán uté, uje ore cho to-to-to yibai.

¹³ Yetesórone udore ore chungare dabijnanone aja gadode, ga ore cho caraté quedéjnane uje ore pota chajnangarase yu aja dejode, ga ore chijna dajéode aja guesi.

¹⁴ Yajnui tu yotique uje pojnéngaja erámi. Enga cho jeta pijnimei yosocoroidie iji jogadode. Ga yiyobié gajnua tu dirijne ome dáringa dajachugué, uje mararataringuei chuságaja yipocáyadie udire ujade jnese.

¹⁵ Yetotiguei uté íjnonguiji yúdode, ga cho co dusígueraque uje chejna yetotiguei; ga yarei catája yibájapitai. Bãri yúdi aja pitoringai ijõri, Pangarádejná.

¹⁶ Udore ore uje ore chaparu yibai ga ore cho tamoco sijnátigo uje ore besája dajesúode. Ate gajnaréngone udore uáguedaté cho to-to-to yibai. Ga ore chichagu yijmanáyone, jé aja yirídade ore uje ore pésu udore edodie.

¹⁷ Yiraja yajnoquéode batigai jnese, uje que pimoque yitóroroi; ga yejominórone udore ore chajire yu, ga que ore cha timíninga yu gotique.

¹⁸ Ga ore chajuguína yiguidedie aja ñane, enga ore doi dajñaminone ome ñane iji yejode jeta yungónique chijna yiboradie udire iji.

¹⁹ Mu ua, Pangarádejná, jé ca bajai cuse iji yu. Yetotiguei á, be ga jĩraque ese yu ome báringai Yátajasṍre.

²⁰ Aqueta yucuecaringuei ome yajnéone jnosoco. Ajnime yucuecaringué ugurui iji yucajningasórone tamoco sijnácho udore ore etotiguei jmainie.

²¹ Arame yu ome caraté chagudie udire ore pijnanone udore. Arota yu ome aquirájna choqui aségode udore ore ue asícojnanie. ¡E bangári yuruode udojo!

²² A yujua bei uté ome yijorane ore. Iji yocuáguedie, ga a yicotai tu ua jne iji udore ore ujade.

²³ Uaque uje uacatodóyo Pangarádejnai, beyoi ga acotáyo uté to. Uaque, Jacob ájnape disi ejode uaque jnese, beyoi to ga asíyo uté gai. Ga arosóñiñome uté, Israel ájnape disi ejode uaque jnese.

²⁴ U gu uje uté érãtique chujna dequejnaréngone ipatigayai uté áyuguhebátiga gajnéone cucha udore, jé aja uje que chetaque uté. Ga que pógu denochai ome uté to. Uje chudute uté agoyedie, ga jé u uje tangári uté gosi.

²⁵ A yugúsi ore ujade iji ore uáguedaté uaté jne, mu yicotai u ua iji uté jne. A yimate yuru casodé taja guesi jne iji pedomite uási iquei uje ore dosóñime ua.

²⁶ Jmatágode a ore tagu dabosode jne ga subudé ore iji. Udore ore uje ore chucué Pangarádejnai a ore chicota uté jne. ¡Yipésupú ga báyipie ininaquéode jé jogate gatuaque jne jõ iji deréjna pitade údode!

²⁷ Iji erámi eruéode údode a ore jnusina Pangarádejnai jne, ga a ore chajni uté gai jne. A ayoré jogasurane ore iji punirone jnese a ore chichaga dagataidie aja jnumi iji Pangarádejnai uté iquei.

²⁸ Uje Pangarádejnai uté jé gajneque dáringai pujnuéngaisṍre, ga Peduguéjna cuchape uté ome punirone jnese jeta chajire udore ore yui.

²⁹ Ayoré ataque ponáyone iji erámi a ore pésu dajñamitique jeta ore taguíji ñane gari, ga a ore chicota uté, jé aja udore ore uje ore chajna jnumi ome dáringane áyuguhebátacho uje cuchade na ore aja jnumi, ga a ore chichaga dagataidie aja jnumi iji uté iquei; udore ore u uje ore chijnóra jóroque dacuecaringuei ome re, uje ore déji dacuecaringuei pijnanai uté.

³⁰ A disi ejórigo ore gaite uté iroquérigo jne. Ga a pujúcho Pangarádejnai uté adode ome disi ejode udore ore gatuaque.

³¹ Uje a ore di jne ga a ore chatata Pangarádejnai uté úringai ũré ome udore ore uje udore cáma base to, mu uté jé ipesute cuchade udore.