Sálmos 19 - Dupade Uruode

Piradedie gajnesṍri u piradedie irajasṍripísi. Peduguéjnai David iradedie uña u.

¹ Gaté uté chatata Dupade cutejmane ingoningájna gatuaque. Ga gatajnoqueque cuchábi uté u uje chingongara ipesudode cucha uásejna aja yoque uje uté pésu ome dajmainie.

² Dire chojmara, chojmarane ore jute pujnoméone udore ome daquigaminóri dire gatuaque; dejaque chojmara, chojmarane udore ore isoca jé u to ome daquigaminóri dejacho udore jnese, uje ore chingongara payuquetotiguei udore quigode aja erámi.

³ Que ore narare ome darúpisode jeta yirajágo udore to, ga que pududique ore pusugúi jocarãi gotique to.

⁴ Mu udore ore ujnomei chubu erámi údode, ga que erámi ajidátaque cusosi jeta jé ca chudute ore uruode udore iji to. Ga Pangarádejnai uté cho guedé gaminóri cárpa iji gatajnoquei uté.

⁵ Ga guedé uté gajnui tu jnacánique uje chachietáji re uje quene chisa dacoté, ga tṍraji damochádi uté; ga guedé chopo jnani bayátique rĩ uje chóji gaté ome dagajñua yúrique, uje uneréjna ome gu.

⁶ Guedé tocade iji gaté uécha uñai ome dáringai urugu aja dajesui, ga chicáji gaté uécha uñai. Ga que togome cucha uñeque jeta doi ga pógu rome guedé uté jũruachúringai gotique.

⁷ Pangarádejnai uru pirosobádode acajnaquéode udore u uje eteque iyonguerãi, ga chisiapome gosi áyipie úringa icha ome gaté rĩ. Ga Pangarádejnai pijogúsorone darúo u uje ũrepíso, ga udore chisíome payuquetotiguei ome udore uje que urénga ore irajatigárique cuse mu.

⁸ Pangarádejnai jmapié aréguedie u uje cáputaji dajesui, ga pésu jeta gosi áyipie nína re gatuaque. Ga Pangarádejnai uté iroquéode u uje ueguipíso udore quigode, ga udore ajirisórone dírecaringuéi jogate ore edominone gatuaque.

⁹ Pangarádejnai uté úringai pirosobate jé ueguipise quigode to, ga jé jogate iji deréjna pitade jnese jne. Pangarádejnai ajiritigade u uje ũréo quigode, ga ujñapetácho jnese.

¹⁰ Uje udore unéningai sué óro gai; uje orerẽ́pise ome dáringa óro uegue marínga, jé sué gai. Ga suépo cutepéode udore unéningai gai rĩ, jé aja cutepéode dótiga uei gai uje ayedie basíji orai uté.

¹¹ Que gusu udore, mu baruode udore aquĩraquéode cucha cuse ome baroi tuyu, ga jé cucha pagutíyabácho udore quigode uje oré cuse jeta gosi suse udore guio.

¹² ¿Ama gosi déji a, ujetiga chiraja daparáringuéone cucha jnese? Aru yáyipie, ga anoningase yiyoguéode udore ore uje pipoguiécho.

¹³ Ãraque baroi tuyu jeta jé ca ducusuré yu ga yipotárasa pisijnaringuéone úringáringo pipesucho to. Jé ca ajuéga jeta pisijnaringuéone udore ore cho daróguiji yu. Enga a jé u jne jeta ca piyaque yiyoguérique gotique, ga ca máraque yu ome yipesutique cucha gajnaréquedatéo.

¹⁴ Yajéode u ujetiga pimeserãcho yuruode udore uje tṍraji yibijnani, jé aja yáyipie quigode udore ore iji baquei, Pangarádejná. Ua u Yãreto cucarané jé aja Yiramesõre.