Sálmos 18 - Dupade Uruode

Piradé udaque gajnesṍri u piradedie irajasṍripísi. David ipesudé u, uje Pangarádejnai iroi u uté; ga uté chirate piradé udaque achachagúgode ome Pangarádejnai iji diri uté uje Pangarádejnai chijnime David uté iji detesórone udore jnese jmainie, jé aja Peduguéjnai Saúl uté jmainie. Enga uruode chósi te:

¹ ¡Yijnóra ua, Pangarádejná, Yetotiguei Guẽrasṍri á!

² Pangarádejnai uté gajnua tu yãretóraque cucarané, ga gajnua tu pinamáraque ome yu to uje chaparu yibai; uté u yiramesṍri. Yudupade u uté, ga gajnui tu cucarãte poguétique ome yu uje que pijocayaque, enga a jecucha yangureta uté ome yu jne. Uté upo rĩ uje chicha raja gadoi ome yúringárique pãreque, ga uté úringai ujopíerãque cuchape chiqueta yu. Uté chopo poragadé yorícoraque ome yu rĩ, uje que toc ujetiga piyaque yuji uaté.

³ A yutṍri Pangarádejnai ome yu jne, uje uté u uje jé tiógarapísa picotaquéode ome re; ga jé u jeta yimo yúringárique piquetaque ome yumajosórone udore ore.

⁴ Pitoringai chigaru yu ome denuéjnai, enga cucha gajnareque uásejnáringo uje yore yibai pésu yisadodéringai.

⁵ Jnaropié uaté jé isoca to uje chijna enuéjnai ome yu jeta chigaru yu aja ñane. Pitoringai ujuya imotodie chiramísara yiquei.

⁶ Uje yácariji paguté joradie ajei enga yibidi Pangarádejnai; yinguíra yibijnanone aja Yudupade uté: enga uté chudute yibijnane iji daguíjna cuchábi ajei. Yibijnacaraidie chise uté iquei, ga e chacája uté angoninguinone.

⁷ Ga jnupe tãrarachuque cuchábi cuse, ga erámi cho cocho, cochóguiji gaté. Ga cucaranone iríbidóde coyotápoi dajogadode rĩ, ga ore tãrara ome uté ájningamíe.

⁸ Ga púyujnanie popío aja gaté uje tṍraji uté ujunane; pioque dequejnangóri tṍraji uté pijnani, ga ocaraidie pésu gueguerade ore úringane ditaguéo.

⁹ Uté chimochẽre gatajnoquei ga cho pítaque aja jnumi yui, enga uté doi jnumi; ga gue abuja cuchabe utatájna déji uté guídade údi.

¹⁰ Ga uté cháji querubíneone uñeque gai ome dáringai choque, uje gaté unirisórone uñai u uté; enga emi gajnui u chugúpẽre chotique ome Pangarádejnai uté jeta uté choru ujnóngone ga chója dajesúode.

¹¹ Uté chicha ijnangunu cuchabé aja dabai, ga cho dapoguiépidi iji uté. Ga cho dacárpa iji guecoré cuchábode jé aja gue abuja nañoré dipesedie, uje yodode irágu udire.

¹² Mu gue abuja nañorenie udire jno iji uté iquei ome uté úringai ajnorataque nanganataguipise, ga ebe cuchábedie tṍraji uté charidi, jé aja pioque guegueraque ditaguéode udore ore.

¹³ Pangarádejnai narare ga cho daruode iji guei usérere iji gaté. Dupa Pirosobate Pujnuéngaisṍri uté tṍra úringai dara aja guesi: ga ebe cuchábedie tṍraji, jé aja guegueraque ditaguéode udore ore.

¹⁴ Ga chichóngara dojodie ga yumajosórone ore chisite raja quedéjnane; uje chiroque ajnorápiedie aja ore ga jé chose ore.

¹⁵ Ga pipañaite yote quedéjna cuchábode údi iji penominone, jé aja uje erámi iríbidi chiqueta raja te ome barecujate dosógode, Pangarádejná, uje bajñarique cuchábi tṍraji bajunane ¡pu! ome ore.

¹⁶ Pangarádejnai iji gaté chayo dajmanecai údi aja jnumi yui jeta chisa yu, ga jé chorase jeta chijnime yu iji yote ajédaté cuchábode udore údi.

¹⁷ Ga uté chiqueta yu ome yumajósõre uajádi uté, jé aja yetesórone udore ore jnese, uje ore suérase yibai ome cutejmane detotiguejna.

¹⁸ Ore chajningare yiquei iji yigachopi dire uté, mu Pangarádejnai uté u Yãrésõri.

¹⁹ Ga uté chijnime yu ga jno yúdi aja guesi, ga chicha yu aja ugaredo cuchabé; chirame yu ome ore gu uje chachietáji yu gu.

²⁰ Pangarádejnai uté cho yoré ga gueranone jé chirate yijmapié aréguedie ome uté: uje chimo yu uje icha yijmainie ome pisijnaringuéone úringáringo pipesucho, jecute cho yoré.

²¹ Uje yejna yu aja yigaidode Pangarádejnai acho udore, enga que yi ga yicai siñéngome Yudupade uté ome yigajnarétigárique.

²² Uje uté arecujate iyiejnanie jnese déji yiquei, ga que yicha uté áyipie parénguenie aja ti yui ome yu gotique.

²³ Yujusípise yadode guio iji uté iquei to, enga que yicási yu ome pisijnaringuérique jeta yipésu.

²⁴ Jecute, Pangarádejnai uté cho yoré ga gueranone jé chirate yijmapié aréguedie ome uté: uje chimo yu uje icha yijmainie ome pisijnaringuéone úringáringo pipesucho iji uté edominone.

²⁵ Ujetiga posõrasõre gosi, ga bangongara báringai osõrataque aja gosi. Jé aja jeta ate ujñapetai tu gosi, enga jé basoca to, ujetiga uté gosi chimo báringai ujñapetaque ome re.

²⁶ Ome ayoré áyipie ichade udore ore, ga bangongara báringai ueque ome ore to; mu ome udore ore uje ducusuré ore, ga ore chimo bajosipié ome re uje barate ore.

²⁷ Baqueta barása pajnotágode udore ore; jé basa ga bajosi udore ore iji jnumi uje ore chajire darosadode caru, caru ome dáringane ijoyatácho.

²⁸ Uje ua upúsu uje bapésu ga David uyu yibioguéjnai tagu gatuaque ome badírecaringuéi uté. Pangarádejnai Dupade u uje chinoningase yijogonóri utataringué uté ga nóña ga díreca yejode gatuaque.

²⁹ Ome bátajaquéode ga yijose yumajosórone isoldate dipeséode udore ore. Uje ore ujuyaquéode déji dedáyode gai marínga, yiyója uéchai, ga gose Yudupade uté.

³⁰ Ga Dupade u uje isocade ujñapetácho. Pangarádejnai uruode udore e petingarãque, ga eteque iyonguerãi. Ga Dupade uté u uje chicha raja udore ore yúode jnese uje ore chicha danguretigai aja uté ome ore úringane pãrécho.

³¹ Uje ¿gosi u Dupade jeta unejángome Pangarádejnai uté? ¿Ga gosi u Cucarané Timingue uaté, ujeta jé cãra rome Yocudupade uté?

³² Dupade upúsu uje chadíja yuajatiguei aja yu, ga uté pésu yajesui ujñapetáringai ome yu.

³³ Uté pésu yirídade úringane ibisócho, jeta cho erámoro quedéjna guídogorodíe ome uaté úringa cugujnachugué, jé aja uje uté chicha yu aja cucarãte yorícojnaringo, mu que yirípieraque cho caru gotique.

³⁴ Dupade uté cho quique yijmanecade ome pocaningárique yui, ga jé yitiógara docojique iménui uje pipesute iji bronce jeta yayo uté údi, ga gose uté.

³⁵ Ua u uje basíome barotaquei ome uyu uje bacha ua aja gadoi ome yúringai piquetaque. Ga basa yu iji gaté ome bãrachua ga etoque yu iji gaté. Báringai pajnotaque u gu uje yipesudode cucha udore ueracho quigode uje tocade.

³⁶ Bapésu ga yirípiedie jogadi guesája iji yúdi, jecute yirídogorodíe que ore cho caru gotique, mu etógaja dajesui.

³⁷ Yajna yumajosórone ore iji jnumone ga yisína ore. Ga quene yajni gu uje e yejna udore ore jnese.

³⁸ Ga yajmare udore ore aja jnumi, ga íjnoque eti qué ore nijiápo rĩ. Enga udore ore cṍraja yirídogorodíe údode jnese.

³⁹ Ua u uje badota petotiguei aja yu ome pocaningai uté. Bapésu ga udore ore chajo raja jnumi iji yaróbuchai iquei, uje udore ore u uje ore iringarãque re ome dajocaningai ome yu.

⁴⁰ Ua u uje bapésu ga yumajosórone udore ore chisíome dedoboi ome yu ome dáringai bayaque, uje bagaidi u gu ujetiga yejna yetesórone udore ore jnese.

⁴¹ Ga ore tibidi jórogui dejode, mu que ore iquetasónique cuse. Ga ore tibidi jórogui Pangarádejnai uté, mu que chajnai ore gotique.

⁴² Yo yijarotique cucha iji ore, ga ore gajnui tu jnumi ijõri uje emi chubúchu aja quedéjnane; yojne ore aja yajesúode, ga ore cho dachabeque pojnetique aja dajéredie quigode iji yijmainie.

⁴³ Ga baqueta yu ome yurasade uñane ore jocaningai ome yu; jé aja uje bo erámi unirisórone ore asuté cuchabe iji yu. Purása quedéjnane udore ore uje que yiraja ore gotique to, mu udore ore doi yiroquéode to.

⁴⁴ Ujetiga quene ore chudute yujnomérique to, ga jĩraque ore doi yojningane cucha quigode to. Purása quedéjnane ore nejéru yúdode to uje ore chicha raja yúdi.

⁴⁵ Purása quedéjnane ore áyipiedie betája ome dasododéringai, ga ore pésu cochoidie iji raque uje ore doi guesode iji dacoyapídode udore ore.

⁴⁶ ¡Pangarádejnai qué eca, arĩa! ¡Picotaque Opejã uté uje Yãreto Cucarané u! ¡Yipésupú ga pisígai Yiquetasṍre Dupade uté jõ!

⁴⁷ Dupade uté u uje cho dajnutabádu yu, ga uté chicha purása quedéjnane udore aja yúdi.

⁴⁸ Ga uté u uje chiqueta yu ome yumajosórone udore ore. Pangarádejná, ua u uje bajosi yu iji gaté ome yetesórone udore ore; ga barame yu ome jnani ijmongarácachoquíode udore ore.

⁴⁹ Jecute a yicota ua iji erámi unirisórone udore ore ujade jne, Pangarádejná. A yicha bei ueradi aja yiradedie achachagúgode ome yicotaquéode ome ua jne.

⁵⁰ Ga ga jiei uje Pangarádejnai chátaja uté ga tẽra dajegaidi eduguéjna úringai pujnuéngaisṍre ome, ga chingongara dajnoraquédatéi aja dedopi uté, aja David, jé aja ape disi ejode ore jnese, iji deréjna pitade jnese.