Sálmos 17 - Dupade Uruode

David icatecãraitigade u udojo ome Dupade.

¹ Pangarádejná, angarami yajei jochaquéode udojo, uje ũréo. Adójnangapísa yagoyedie ome ua. Ga bangoninguinone guesája yicatecãraitigade yui, uje que yuruode udore tṍraji yibijnani gu yaringaquérique gotique.

² Ajuéga ujetiga bajiritíga uréone tṍraji baquei ome yadode udore, ga bedodie chajmitapise ujetiga cuchade udore cáputaji dajesúode ome dáringáringo ũréo.

³ Uje bajiripise yáyipiedie aja quigode, ga babágui yu iji dejade to jetiga adójnangapísa yijmapiedie udire. Uje betingare yu marínga, a jé ca ese cucha gajnarétique iji yu jne. E yipésu yáyipie gu ujetiga jé ca yujua yuru noñátique jne ome yibijnani.

⁴ Ome erámi unirisórone ore ipesudode cucha noñácho udore, ga gusu baruode uje tṍraji babijnani uje pésu ga jé yãraque yu ome jnani chigócabéi uté ajnane dajecho udore.

⁵ Ga yidota yirídade aja báringai pajnaque to, jeta jé ca yirída ajã́ronie carujnája ome ua.

⁶ ¡Urénga, Dupade á! Yibijnángaidí tu ua gu uje a achajnai yu jne; acha bangoninguini aja gadoi enga angarami yúringai dara.

⁷ Angongara bajnoraquédatéi uté ueratígajnai aja yu, uje ua u Cucha Piquetasṍri ome udore ore jnese uje ore chucué báringai Pãrésõre ome re, ga bedugadé u bãrachua ome udore ore umajosórone udore ore.

⁸ O bedójnariji yu, ga ajusípise yio. Ga apógu yu iji bajnóngone údi ome báringai irotacáca ome yu.

⁹ Acose yu ome sijnángone udore ore uje ore cho dajosipié ome yu, jé aja yetesórone udore ore uje ore jnátu yúringárique chuque yui, ga ore chaparu yibai.

¹⁰ Ugúcharã́que ore, mu ore etéquetí posongaquérique déji ore ajénique. Ga ore pijnani narare ome dáringai ijoyataque.

¹¹ Ore ajnapaite yógaja quedéjnane, ga e ore chaparu yocarodie gai; ore nijína dejode jetiga ore chinguíra yógaja jnumi.

¹² Ga ore cho caraté chaguhei potéraque uje jnátu dachẽratique cucha yúrique, ga jé ore gajnua tu caraté ucatógueraque uje chajo raja jnumi iji dapoguiépidi uté.

¹³ ¡Ãriji, Pangarádejná! Be ga ṍraji barani ome ore, ga anguíra udore ore aja jnumone. Ome bajnosocoi uté, ga arame yu ome jnani sijnángone udore ore.

¹⁴ Pangarádejná, ome bajmanai aqueta yu ome jnanione udore, ome udore ore uje ore gajnepídi déji erámi tudé ga gusu ore cho dagutíyabádode cucha iji erámi jogonórone cucha aja dacuecaringuei eruénique. Ua u uje bãreta ore icadie ome bañerane cucha pagutíyabácho udore ore. Ga ore abode nunaji udore to, enga ore noñome daquebéode iji cucha pagutíyabádode udore ore ome dape parátagabode sudore ore to iji daquigade.

¹⁵ Mu ome yu, a yimo benochai jne iji yúringai ujñapetaque uté údi. Ujeta yĩriji jne, enga a yajéchietaringuéi jogadi u, uje a quene yopise ua jne.