Sálmos 16 - Dupade Uruode

David ipesudé u ujetiga pacadique ore ome.

¹ Dupade á, ajuse yio uje yicha yanguretigai aja ua ome yúringai pãreque.

² Yósi te iji yáyipie ome Pangarádejnai: –Ua u Yangarádejnai. Que cuchárique déji siñéngome yu jeta ueradome yu, mu gusu ua uje ujñapetai tu ua ome yu.–

³ Ome Dupade anguresórone uje ore déji jnumi udé, jé aja ate arégode, udore ore u uje ore pésu yajéchietaquéode.

⁴ Sijnángone udore ore ejnaréngone cucha a chajnera dádi gatuaque jne uje udore ore chayo ¡jmuc, jmuque! aja dangurenone dupa quedéjna udore quigade. A jé ca yẽra yẽrapáitique cucha piyo pijnimisóño ome ore angurenone dupa quedéjna udore, ga a jé ca yĩ́care udore ore íode to jne ome yibijnani uté.

⁵ ¡Urénga, Pangarádejná! Ua u uje yo yajneque cucha iji ua ga bátegoningáne basipísaja yu, ga bajnui tu cóparique uje yijopite uté, ga unéri tupúsu ua ome yu. Bajusípise yio gatuaque.

⁶ Uerate yajnepídi jnupe uté ome yu uje picaque uté eruéode, ga omitigai basipísaja yu. Jé ũrepise uje yajnéone cucha ueracho jnese uje beranome yu.

⁷ A yacacãre Pangarádejnai uté ome yuru ueradode jne, ome o quigode cucha udore ome yu; a dejaque dejátique marínga, yáyipie uaté jé chacate yu, ga cho yiquique.

⁸ Jecucha yicha Pangarádejnai uté aja yedominone iji yiquei gatuaque. Uje uté jogadi u yãrachua enga a jé ca pungurañaque yu jne.

⁹ Jecute pininaquei irágupúsu yáyipie, enga yibijnani uté chachietáji re. Jé aja to uje a yigosi jnese cho dajñare jne ome dáringai pãreque.

¹⁰ U gu uje a jé ca ajíome yáyipie iji jnaropié jne, enga a ca ajuéga to ujetiga batocaite puyai uté arione tarata aja jnumi jne.

¹¹ A acate yu jne ome dajeque pucuecaringué ajnasṍri uté jeta yajna uté to. Enga a yininaquei irágu yajei jne ujeta yugúsi bari. Uje cucha pajmaránone jnese jé jogate bãrachua iji deréjna pitade jnese.