Sálmos 149 - Dupade Uruode

¹ ¡Acotáyo Pangarádejnai uté! Aracho uacaradé icháraque ome Pangarádejnai, ga asíyo uté gai iji anguresórone, uacáguedie jogadode.

² Israélgosode a ore doi ga ore irasique re ome damanisṍri uté. Ga Sión abode udore a ore doi ga ore nína re ome Deduguéjna cuchábi uté.

³ A ore doi ga ore chicota uté i ome dagaitígo jobeyéo, ga ore chirate daradedie ome uté; ga ore chijna detígo árpa jé aja detígo cucha angoñerácho uje cho pãracãranie agoyedie ome dajñiecade udore.

⁴ U gu uje Pangarádejnai ninapúsu re ome darasade udore ore. Uté chisíome ayoré pajnotágode ore ueratigai ome ore gu uje ore chosi riji jnumi, ga ore chise dáringane pujnuéngaisóño gu uté.

⁵ Uté anguresõre uréone a ore doi ga que ore irasitigade chajire re ome dáringane ayoré ingoningarãcho; ga ore chirate daradedie uje pininaquei irágu ore ajéode gu, ga jé chise ore mochádode jogadode uje ore chirate udire.

⁶ A ore doi ga jĩraque ore tṍra daradedie aja guesi gu uje tṍraji ore pijnani, ga jnosocode déji ore jmainie uje udore uo jnese.

⁷ Ore gaidi u gu jeta udore ore cho dajnutabádu re jeta ore doi pocaningai ome punirone enga ore cho dajuñame pidáyode udore ore idaisórone.

⁸ U gu jeta pigarique ore eduguéjnane udore ore ome ojnaquérodie, jé aja ore eduguéjna obiréjnane uñane ore, jeta pigarique udore ore ome ojnaque noñángone uje pipesucho iji guebéode.

⁹ Ore gaidi u gu jeta ore gajnéone pujuyaqué tocade ome ore uje purusãracho ica ome udore ore yui. Ga uté anguresórone a ore chise dáringáringo ayoré ingoningarãcho jne, ga gose cuchade udore. ¡Acotáyo Pangarádejnai!