Sálmos 144 - Dupade Uruode

Peduguéjnai David iradedie uña u.

¹ Picotaque Opejã Pangarádejnai, uje gajnui tu cucarãte poguétique ome yu; ga uté cho quique yijmanecade ome pocaningárique yui, ga yijmainie dimane ome yúringai jõcarataque yui.

² Uté u yosõrasṍri, ga gajnua tu pinamáraque ome yu uje chaparu yibai; uté chopo poragadéraque ome yu rĩ; ga uté u uje jecucha chirame yu; uté jé upo rĩ uje chicha raja gadoi, ga yãrésõri u uté ome cuchade yúode. Uté u uje chicha pidáyode udore aja yúdi.

³ Urénga, Pangarádejná, ¿cuchárique u ayoré gotique, jeta báyipie jogadípise uté, jeoga ayorépitique ujnacari uté jeta ajire uté yui?

⁴ Jnanione ore gajnui u pujñarique pijnimi, ga udore ore ucuecaringuei jé cho purútique uje jĩraque jno.

⁵ Pangarádejná, amochẽre gatajnoquei ga cho pítaque aja jnumi yui, ga be jnumi. Ajocase cucaranone, ga popío iji jnumi.

⁶ Apésu ajnorátique jeta chachẽre jnumi, ga chisite udore ore aja quedéjnane. Ga achóngara bojodie, ga ejna udore ore.

⁷ Ayo bajmanecai údi aja jnumi yui. Aqueta yu, ga ajnime yu iji yote ajedaté cuchábode udore urui, uje jnani guichayade udore ore jmainie u.

⁸ Uje udore ore chuchẽre dabijnani gai ome darapatáringane, ga ore chisingare dajmanai iji dãrachua uje imoi tu uje ore chajo raja darapatáringane udore quigode úringáringo ũréo.

⁹ A yirate yiradé icha ome ua jne, Dupade á. A yijna yi árpa jne uje carubode chejna yijmanáyone ome yúringai ijñiecáca ome ua.

¹⁰ Ua u gu uje basíome peduguéjna cuchábode ore úringane pujnuéngaisóño ome ore. Ga ua u uje bajnime baroi David uyu iji yajnéone udore jnosoco jmainie.

¹¹ Aqueta yu ome jnani guichayade udore; ajnime yu iji udore ore ijnosocode jmainie, uje udore ore chuchẽre dabijnani gai ome darapatáringane, ga ore chisingare dajmana dãrachua uje imoi tu uje ore chajo raja darapatáringane udore quigode úringáringo ũréo.

¹² Ueradi u ujeta yocabode jé ore cho pore quéranguenie ome dáringane quérãcho iji ore úringai jnacaripíta. Omitigai u ujetiga yocabidie ore cho peduguéjna iguíjna cutadé timíngueringui jeta ore cho daparagádu udire ome domitigai.

¹³ Omitigai upo rĩ ujetiga cucha pagutíyabádode irágu piguíjnane udore uje pĩracho iji pejnane, ga cucha pacade udore déji jnese; ga yocachidedie áyasai jé ore chajnera dádi ga ore batigai chise mílnie, jé aja diez mílnie ore iji garáyode gatuaque.

¹⁴ Yipésupú ga yocachidode buey udore jé tiógara dajnutígo cucha iménuo gatuaque jõ. Jé aja jeta jé ca cuchárique chachẽre yoque ga jé ca pésu yocujuyaquéode edóraque jé aja jeta jno cuchárique údi aja dajesui. Enga jé ca pududique paguté jora gajnetique cucha ujnomérique iji yocũrajeque piagórique.

¹⁵ ¡Pininaquei gajnengórone u udore ore uje ore cho dajnéngu cucha arégode ucode! ¡Pininaquei gajnengórone u udore ore uje ore angureni Dupa u Pangarádejnai uté!