Sálmos 143 - Dupade Uruode

Peduguéjnai David iradedie uña u.

¹ Angári yicatecãraitigade, Pangarádejná; ajuéga bangoninguinone ome yu jeta guesája gadoi ome yajei jochaquéode udojo. Ome báringai ũrepise achajnai yuruode, ome bajiritíga uréone udore.

² Enga jé ca ajire baroi uyu yadode aja quedéjnane, uje que ayoré uecárique déji ujetiga ũrepise ome datígo iji baquei.

³ U gu uje yumajósõri chajna yu aja quedéjnane; ga chusũrurase yucuecaringuei aja jnumi. Uté chicha yuja ijnangununie ajei, ga yo toque baja casodica ore uje ore nóña ga jnupabejna udore ore.

⁴ Jecute yáyipie betápisaja iji yajei. Yáyipie cho piñoñai isaguéraque.

⁵ Yujnusinamánone u deréjnane udore uje déji yoquiquiga cásodicáite. Yáyipie que chirame bate ueradode udore ore jnese uje bapésu udore. Yajmita bamaningone udore cucha ome bajmainie.

⁶ Yorei yijmainie iji gaté iji bei; ga yáyipie cajnóriji ome báringai pipotigate ome yu. Ga yajnui tu jnutique uje que guérique chutapo erã́tique iji uté rĩ.

⁷ ¡Aquejname yutaquéode udojo yui, Pangarádejná! ¡Cucha dacadode na yáyipie aja jnumi! Jé ca apógu bedodie ome yu, u gu jeta jé ca yo udore ore uje ore basája togode ore gajnei eruque.

⁸ Ajuéga jeta yudute bajnoraquédatéi ujnomei iji dúrasabía, u gu uje yicha yanguretigai aja ua. Acate yu ome dajei uté jetiga yajna, u gu uje yãrai yáyipie iji gaté ome ua.

⁹ ¡Pangarádejná, arame yu iji yumajosórone udore ore jmainie! Uje yucué báringai Pãrésõre ome yu.

¹⁰ Acate yu ome bajequigode, uje Yangureni Dupa u ua. Ajuéga jetiga Bajopié ueradé cho jnumi tirótigai quigome yu jeta jé ca yirípieraque gajnarengue iji uté.

¹¹ ¡Bei u gu, Pangarádejná, ujeta ajuse yucuecaringuei guio! Ome bajiritíga uréone ga ajnime yu iji yúringai pajópi uté jmainie.

¹² Ome bajnoraquédatéi anoningase yumajosórone udore ore, ga ejna yetesórone udore ore jnese, uje baroi tu yu gu.