Sálmos 142 - Dupade Uruode

Peduguéjnai David áyipie quigode u uje déji cucarã́tedó. Picatecãraitigade u.

¹ Yinguíra yibijnani aja Pangarádejnai uje yicatecã́ri uté. Ome yibijnani ga yatata yajei jochaquéode ome Pangarádejnai uté jeta chosõre yu.

² Yuchẽri yetégode cucha iji guesi iji uté iquei. Yatata yujuré gajnéone cucha iji uté edominone.

³ Uje cuchade chácariji yáyipie údode uje nája jnumi ome úringa áyuguhebaté, mu baraja udore iji yiripie quigode. Udore ore chacose dajuya iji yúguhi iji yiquei.

⁴ Yajire yirosadi iji yãrachua mu que uñeque timíninga yu aja quedéjnarique gotique. Enga que yãrésonique cucha déji, ga que piyaque yunétique.

⁵ Yibidi ua, Pangarádejná, ga yósi tome ua: –Ua u Yãrésõri, ga jé yagutíyabádi upo ua rĩ iji uecade ore jogadi udé erãpe.–

⁶ ¡Angári yagoyedie ome ua, uje cuchade na yu aja jnumi! Ajnime yu iji udore ore jmainie uje ore chajna yu aja quedéjnane, u gu uje uajadipise udore ore ome yu.

⁷ ¡Ajnime yu iji yúringai pujurúgai ujetiga yicota bei! Ũrepísode a ore chaparu yibai ome basoca arégode udore ome yu jne.