Sálmos 141 - Dupade Uruode

Peduguéjnai David iradedie uña u.

¹ Yibidi ua, Pangarádejná. Aguitóji gadoi. ¡Angári yibijnane jeta yutṍri ua!

² Ajuéga, ga yicatecãraitigade ome ua cho cucha ai papose unénique iji baquei, ga o cucha pẽrapaite pipotame yijmanecade udore to uje yãráji gaté, uje pisocabeque uté iji guedéjnoringáne gatuaque.

³ ¡Ajo yibijnani aja ñane, jeta o bañeraque cucha iji, Pangarádejná, ga ajuse yibijnani uté guio jeta jé ca cucha gajnaréngone tṍraji uté!

⁴ Jé ca ajuéga jeta yáyipie dépisi cucha gajnaréngone udore, ga jé ca yo yisaque cucha pisaguíji to udore ore isagode cucha gajnarécho, jeta yirate ore aja udore; ca ajuéga jeta yagu ore ajmaránone udore to.

⁵ Ajuéga jeta jnani ujñapetátique chiqueta yedodie ga chinguíra dasatique cucha aja yu, uje chijnóra yu gu, ga que yejnáreque; uje cho aseque puyai uje panire aja yójo to, uté isocai ome yu. Mu érãtique yimesẽre cucha gajnaréngone ipesusórone udore ore jmapié noñánguenie, ga yicatecãraitigade quigode a jecucha u udore ore jne, uje yetaguipise udore ore isocade udore.

⁶ A parãte sijnángone ore adode ajirisõre tágode udore ore aja cucarãte oroné uaté jne, ga a quene ore chiraja uje ũréo Pangarádejnai uru quigode udore.

⁷ Ga a ore cho oróneraque jne ujeta piráña uaté aja quedéjnane ga pépitamujná ejode. Ga adi jé u uje pisidique yocajnoquéode aja quedéjnane iji ducode uaté pijnani.

⁸ Mu yedodie jogadípise ua, Pangarádejná Dupade á. Ua u uje yucué báringárique Pãrésõre ome yu; ca ajuéga jeta íjnoque yátajasónique.

⁹ Ãraque yu ome udore ore ipesudedie dajuyai ome yu. Ajnime yu iji cucha gajnaréngone ipesusórone udore ujuya gajnéone cucha jmainie.

¹⁰ Ajuéga jeta sijnángone udore ore basája dajuyadie udire, jé basa ga yapídome.