Sálmos 140 - Dupade Uruode

Piradedie gajnesṍri u piradedie irajasṍripísi. Peduguéjnai David iradedie uña u.

¹ Pangarádejná, angara yijogatique ome jnani sijnángone udore ore; ga ãraque yu ome jõcaratáguebéode udore ore.

² Udore ore u uje ore áyipie déji cucha gajnaréngone úringane pipesucho iji dajei gatuaque, ga que udore ore áyipie jnoji daringarane pocaninga iji dirode jnese.

³ Ga udore ore chata darei ga jé chopise uga chagúrique arei; ga udore ore pijnanane jogotodie venéno jé chopise uga chagúode jogotodie venéno udire.

⁴ Pangarádejná, ajuse yio ome sijnángone udore ore jmainie; ãraque yu ome jõcaratáguebéode udore ore, uje ore pésu dáyipie quigode ome yu jeta ore chucuase yuja ta iji yiripie.

⁵ Dicotárechoquíode udore ore pógu dajuyaquéode ome yu, ga ore chungare enuéone udore iji dajuyadie uñanie, uje ore chicháji dajuyaquéode udore iji pipie dosadode ome yi.

⁶ Yósi te ome Pangarádejnai: –Ua u Yudupa; acha bangoninguini aja gadoi jeta angári yutaqué gajnéone cucha, Pangarádejná.–

⁷ Pangarádejná, Yangarádejnai tu ua, ga ua u uje barame yu ome cutejmai báringa ujopíerãque cuchape. Ua u uje baco yatoi gai ome báringai Parésõre uje yugúsi yijocaningai gai.

⁸ Pangarádejná, ca ajuéga sijnángone ore ipotigádode cucha ome ore; ca ajuéga jeta udore ore áyipie quigode jno dádi, jeta jé ca udore ore chicota re gaté ome cuchade.

⁹ Udore ore uje ore chaparu yibai, ga ore cho darúja yu ome daru noñángone uje tṍraji ore pijnani, apésu ga udore jé ore gajneque dajmongaqué gajnéone cucha udore ome yu, ujeta chaco udore ore gatoi gai.

¹⁰ Ga ajuéga ga guegueraque ditaguéode yore udore ore gai. Ajuéga ga parãte udore ore aja ejo pipotáraque chaquipie, jeta jé ca ore chisápo guetíguiji rĩ.

¹¹ Ca ajuéga jeta jnani jutaréquechoquírique chapite to iji erámi. Ajuéga jeta cucha gajnaréngone chuquéjnai jnani chigócabéi uté ga jĩraque udore sué uté gai.

¹² Yiraja uje Pangarádejnai chirota udore ore uje ore chejnáreque re ome cuchade uje chipatigase ore, jé aja udore ore uje que ore chimo cucháringome re, ga ũrepise ome ajiritigade ome darotaquéode quigode ome udore ore.

¹³ Que potigayaque ayoré ujñapetade udore ore jeta ore chacãre bei ueradi gai jne. Uréone udore ore u uje a ore ecáji bari gatuaque jne.