Sálmos 138 - Dupade Uruode

Peduguéjnai David ipesudé Sálmo udaque.

¹ Yacãre babai, Pangarádejná, ome yáyipie jnese; iji dupa quedéjnane ore iquéode ga yicotai tu ua iji yiradedie udiji.

² Yichaga yigataidie aja jnumi iji baguíjna pirosobádi uté yui, ga yacãre bei ueradi gai uje érãtique bajnoraquédatéi eruénique cuse, jé aja báringai ũrepise. U gu uje bachajapite bei jé aja baruode udore ore aja cuchade udore ore gai jnese.

³ Iji deréjnai uté uje yibidi ua, ga bachajnai yu jeta õre yáyipie etotiguei.

⁴ Pangarádejná, peduguéjnane iji erámi údode a ore chicota ua jne, uje e ore chudute baruode uje tṍraji babijnani.

⁵ Ga a ore chicha bátedatéode aja dachachagúgode jne, uje cuchadaté Pangarádejnai uté ingoningájnai.

⁶ Pangarádejnai uté idájapise iji gatajnoquei uéchai, mu chidójnangapísa ayoré pajnotaguipísode ore; jé basa ga chajire dicotárechoquíode ore iji quedéjnai.

⁷ Uje yiriguiji pujuré gajnéone cucha ujade marínga, bajuse yucuecaringuei guio aja yajesúode; bãrai bajmanai iji gaté yui ome yumajosórone udore ore ájningamíe, mu bãrachua u uje chiqueta yu ome udore ore.

⁸ Pangarádejnai a pésu dáyipie quigode udore ome yu jne. Urénga, Pangarádejná, bajnoraquei uté érãtique chise deruénique jne. Jé ca ajíome bamaningone cucha iji te jmete uje bamanicho ome bajmainie gu.