Sálmos 135 - Dupade Uruode

¹ ¡Picotaque Opejã Pangarádejnai! ¡Acotáyo Pangarádejnai uté i! ¡Ga asíñome uacacotaquéode ome uté, Pangarádejnai irógode uaque á!

² Uje uaque u uje uacajuso Pangarádejnai uté iguíjnai guio, jé aja Yocudupade uté iguíjnai dosadode guio.

³ Acotáyo Pangarádejnai uje paraguipise uté; ajñiecacho ome uté enga acha uté i ueradi aja uacaradérigui achachagúgode; uje osongáca uté gu.

⁴ Uje Pangarádejnai jé ucueque Jacob uté gu uje jé ajegaite, ga cho dajnéngu Israel uté.

⁵ Yiraja gu uje Pangarádejnai uté cuchábejna. Yocangarádejnai uté u uje jnuéngai dupa uñane ore gai jnese.

⁶ Pangarádejnai uté ipesudode u dapotigátique cucha iji gaté, jnumi ore jnese, jeoga yote quedéjnai u, jeoga yodi uté údi jogonórone cucha u, uje jé gaite dáyipie quigode ome cuchade gu.

⁷ Uté u uje pésu gué abujadie ga chicáji gaté uje tṍraji jnumi eruéode, ga uté chiroque ajnorápiedie, guéode ore aja erámi, ga chijnime emi uté iji dajogapíode depósito udore.

⁸ Uté u uje pésu ga ore ape bajade toi iji Egípto uté; jnani chojmara, chojmarane ore ape bajade u uje toi, jé aja cuchisode ape bajade jnese.

⁹ Uté u uje chiroque dapijogúsorone cucha aja ua, Egípto á, jé aja cucha pitijabádode iji uacajade, jeta cho damajo Faraón, jé aja irógode ore jnese.

¹⁰ Punire dipeséode ore ĩrosṍri tu uté, ga chujé eduguéjna cuchábode ore.

¹¹ Uñai u Sihón uje amorréogosode ore eduguéjna cuchábi u uté; jé basa ga uñai i tu Og, ga basángosode ore eduguéjna cuchape uté; jé basa ga juéga chui ome cananéogosode ore eduguéjnane jnese iji udore ore uniri údode.

¹² Tẽra eduguéjnane udore ore gajnei jnupe ome darasade israélgose ore jeta jecucha jogate ome ore ape disi ejode ore.

¹³ Pangarádejná, eyúgojma bei; ga báringai ujnomerãque jé jogate ua iji deréjna pitade jnese gatuaque.

¹⁴ U gu uje Pangarádejnai uté a narare darasade ore gai, ga a osongaquei déji ome darógode ore jne.

¹⁵ Ayoré gajnúone uje ore déji punirone údode, pipesute udore ore ome plátadie, órodie ore, ga jnanione imanicho udore ore ome dajmainie.

¹⁶ Ore pésu pijnani, mu que toque darai tome; edodie déji, mu que chimo dajiritique;

¹⁷ Angoninguinone cuse mu que chudute cuchárique, ga que toc ujetiga tṍra dajñari aja guetique.

¹⁸ Ayoré gajnúone udore ore ipesusórone chopise dapesudode udore ore, jé aja udore ore jnese uje ore changureta ayoré gajnúone udore ore.

¹⁹ Israélgosode uaque á, ¡amacácho Pangarádejnai ome uacaru ueradode! Aarón ájnape disi ejode uaque á, ¡amacácho Pangarádejnai ome uacaru ueradode!

²⁰ Leví ájnape disi ejode uaque á, ¡amacácho Pangarádejnai ome uacaru ueradode! Uaque jnese uje uacarosóñiñome Pangarádejnai, ¡amacácho Pangarádejnai uté ome uacaru ueradode!

²¹ Jé tiógara jeta Pangarádejnai uté gajnéone picotaquéo tṍraji sióngosode ore, uje Pangarádejnai chácariji Jerusalén uté. ¡Acotáyo Pangarádejnai uté!