Sálmos 132 - Dupade Uruode

Piradé aja dajei iji Jerusalén yui.

¹ Pangarádejná, ajnusina David jé aja cucha dacate uajádode jnese uje chise uté.

² Uje chisíome daru iyiejájnane ome Pangarádejnai uté, ga jé chajo raja udore ome Pujnuéngaisṍri Jacob angaráni uté, uje chósi te:

³ –A jé ca yacája yiguíjnai jne, ga que yimópoji yimochápi gai gotique rĩ;

⁴ enga a jé ca yujuéga jeta yujuru yedodie gai ome moi, enga a jé ca yujuéga jeta yédabídie chise ñane,

⁵ ga yisocade u udore jé aja jeta yise pijogatique ome Pangarádejnai uté, jeta Pujnuéngaisṍri, Jacob angaráni charidi tu uté.–

⁶ Adójnacho uje yudúco Dupade uruode pi cajo uté ujnomei iji Efráta uté, uje íode uñai tu Belén; ga yico uté iji garáyode uje udore i tu Jaar.

⁷ –Boyo, yacágoja uté charite pirosobádejnai jogadi; ga yichajo yoquigataidie aja jnumi iji uté guídade jogapi iquei.–

⁸ Pangarádejná, ayague, ga acáji bayarite pirosobádejnai jogadi; acáji baruode pi uté cajo uje bapijogúsõri u uté ome báringai pirosobádejna cuchape.

⁹ ¡Apésu ga baruode júsorone sacerdote ore cho daguidéji cucha ũrepísode ore! ¡Apésu ga bajnorasórone udore ore chejnapúsu daruode ome dachietaquéode!

¹⁰ Uje bajnóra baroi David uté, ga jé ca o bedobóya bajegaidi peduguéjna uté jne.

¹¹ Ũré uje Pangarádejnai chisíome daru iyiejnane ome David ga que doi ga chijnapóji gari rĩ, uje chojningame uté: –Bape disi ejode uñeque a jé chabíji bayaridi uté jne.

¹² Ujetiga bape disi ejórigo ore dopísi yuru iyiejnane quigode, jé aja yuru yipijogúsorone quigode jeta yo ore quigome, ga ore ape disi ejórigo a jé ore gajnecho udore quigode to, ga jecucha ga ore cháji bayaridi uté jne.–

¹³ U gu uje Pangarádejnai ajegaidé u Sión uaté; ajegaidi u ujetiga pésu dayaritique iji cucarãte oroné uaté.

¹⁴ Uje chósi te: –A jecucha ga yiyaridi u uté gatuaque jne. U gu uje jé yáyipie quicho jeta yicha yijogate ueratique aja uté.

¹⁵ A jecucha ga yipésu uaté arétigarique jne ome cucha pibotique iji uaté ga jmatágode udore a ore nunaji arureque pibosode udore.

¹⁶ A yĩra piguidé gajnúraque aja yuruode júsorone sacerdote ore iji uaté jne uje imoi u ore úringane yiquetacho, ga uaté jogosórone yijnorasóño a ore chejnapúsu daruode ome dachietaquéode.

¹⁷ Ga jé u jne jeta yipésu ga David uté úringai eduguéjna qué chajnera dádi gaté; e yipota yapósi ome yajegaidi eduguéjna yui.

¹⁸ Ga uté umajosórone ore ga yadíjai u piguidé gajnua pajegátiga aja udore ore, mu jé basa ga a uté pi u ducayo nanganatátique jne.–