Sálmos 122 - Dupade Uruode

Piradé aja dajei iji Jerusalén yui. Peduguéjnai David iradé u.

¹ Pininaquei irágu yu uje ore chojningame yu: –Bo, ga yicagóji Pangarádejnai iguíjnai.–

² Yoquirídade qué déji bapiagoi ajei, Jerusalén á.

³ Jerusalén uaté úringa pora gajnui u pidánique úringárique pipesute jeta jé chojmara pidai uté iji jnumi.

⁴ Ga israélgosode ore uáguedie chicáji uaté, uje Pangarádejnai chojningame ore "yurasade;" ga páyipie u udire ome israélgosode ore jnese gu jeta ore chicáji uaté, ga ore chacãre Pangarádejnai uté i gai iji uaté.

⁵ U gu uje piyaripíode déji uaté jetiga pajirique padode aja quedéjnane iji te, ga David, ájnape disi ejode uñane jé ore charidode u udore.

⁶ Jecucha ajóchayo Dupade ajei údi ome pajesereringai to ome Jerusalén, ga uacajei jochaquéode chósi te: –Jé tiógara jeta jé ca cuchárique chona gosi gu uje chijnorapise ua, Jerusalén á.

⁷ Ga pajesereringai dérasi banama uaté ajei eruéode, jé aja jeta pajirique pejode gatuaque iji poragádedie udire ójodie jeta bajogasórone jé ca ore todo cucha dacatique yúrique iji uté.–

⁸ Yijnoraquei u ome yijogasúode, yijorane ore uje pésu ga yósi tome ua: –Yipésupú ga pajesereringai déji ua jne jõ, Jerusalén á.–

⁹ Yijnoraquei ome Yocudupa Pangarádejnai uté iguíjna cuchábi u gu uje yucuei cucha arégode ome ua, Jerusalén á.