Sálmos 12 - Dupade Uruode

Piradé udaque gajnesṍri u piradedie irajasṍripísi. David ipesudé Sálmo u.

¹ Pangarádejná, ¡be ga átaja yoque é! Uje que banguresõre ũrepítique dépoji de rĩ. Que jnani ũrénique dépoji erámi unirisórone udore ore ujade rĩ, uje e erã́ta erámi ome udore ore jnese.

² Uje jecucha udore ore chãra ñane iji udore, udore. Ore chisi ñane gáyode ome daru uerate bisidétigo, jé aja uje udore ore uruode gare ome dojode ayoré ore to.

³ Pangarádejnai uté a chejna udore ore jnese jne uje ore pijnanane chicota dojode ayoré ome daru uerate bisidétigo, uje cachi ore inejequéo, jé aja udore ore uje ore arei que chacho chisi dabai ome dajoyaquédatéode.

⁴ Uje udore ore chojninga: –Yocangureni tu yocarei ome yocúringane pujnuéngaisṍre jne. Yocajnecho yoquibijnanane, ga ¿gosi déji jeta doi ga sué yoquibánique jeta chiroque yógaja cuchárique?–

⁵ Pangarádejnai chósi tome daruode: –Uje jmatágode udore ore chejnáreque dáringane pumajo, jé aja uje ducañerájmane udore ore jnare gatuaque, jecute jé iji dé enga a yisingare yu, ga a ore chimo dáringane piquetacho ome re, uje ore jnátupúsu yui.–

⁶ Pangarádejnai uté ojningane cucha u uje ueque ome paringaquérique, ga eteque iyonguerãi. Uje uruode udore gajnui tu pláta guebetique uje déji ejo piquetáraque, ga ore chibore ga gare iji ti, jé aja ujetiga iguirode jnese tocade iji uté, ga pláta uegue uaté iji quigade.

⁷ Ua upúsu, Pangarádejná, ujeta ajuse ducañerájmane udore ore guio. Ga a jecucha ãraque ore ome diríe jogosórone udojo ore josipiedie iji deréjna pitade gatuaque jne.

⁸ Ujetiga pijosique jnani ate noñánguipísode udore ore iji gaté, enga qui tu ujetiga que paquĩraquérique déji ome jnani sijnángone udore ore, ga ore chacája ñane iji erámi údode ome dacuegode date gajnarécho.