Sálmos 119 - Dupade Uruode

¹ Pininaquei gajnengórone u udore ore uje que ore iyoguérique cuse aja dajesúode, ga jé ore chajna Pangarádejnai uru pirosobádode udore quigode iji jnumone.

² Pininaquei gajnengórone u udore ore uje ore susípise uté pijogúsorone daru quigode guio, ga ore chejna dáyipiedie aja uté úringárique pucueque.

³ Ga udore que ore pésu cucha noñátique to, uje ore chajna uté jmapiedie quigode gu.

⁴ Baroquei u ome yoque jeta yicoi bajmapié aréguedie udire quigode ga ca yicagóji ti yui ome udore uñeque.

⁵ Yáyipie jogadi jóroque jeta yejna yuja báyipie parénguenie udire úringáringui pipesudei gatuaque.

⁶ A ca cuchárique chinguíra dipoi taja yu jeta yáyipie jogate baroquéode quigode udore jeta yipésu gatuaque.

⁷ A yacãre babai jne ome yicotaqué ũrepísode uje tṍraji yáyipie ũrepise, ujetiga e yiraja barecujate iyiejnanie udire úringanie ũrei quigode.

⁸ A yipésu báyipie parénguenie quigode jne. ¡Jé ca ajíome yu iji te jmete!

⁹ ¿Ama jnacánique isocáringome re jeta uerate uté isocárique iji dacuecaringuei? Adi jé urásu jeta gosi isocade jé cunguésõri baruode quigode udore, Dupade á.

¹⁰ Yucué ua ome yáyipie jnese. Jé ca ajuéga jeta yicai quedéjnarique ome baroquéode udore úringáringo pigaicho.

¹¹ Yujuse baruode guio iji yáyipie, uje yigaidi u gu jeta jé ca yipésu cucha gajnarétique ome ua.

¹² Picotaque Opejã ua, Pangarádejná. Be ga o yiquique ome báyipie parénguenie udire quigode.

¹³ Yibijnani júdode u barecujate iyiejnanie quigode jnese uje tṍraji babijnani.

¹⁴ Yinína yu ome bapijogúsorone barúo quigode ga yachietaquéode ome baruode udore quigode sué cucha orerane gáyode jnese.

¹⁵ Yáyipie a jogate bajmapié aréguedie udire quigode jne gatuaque, ga a jé ca yamurase badode udore iji yedomitique aja yajesúode jne.

¹⁶ Báyipie garénguenie udire u uje érãtique yamurase ome úringanie pajmaránei; enga que toque ujeta yicadígui baruode udore.

¹⁷ Ajuse baroi uyu guio ujetiga qué yiqueca ga jecucha yi bojningane cucha udore quigode.

¹⁸ Be ga achẽre yedodie gai, jeta yimo báyipie pirosobádedie udire ueratígajnai.

¹⁹ Iji yúringai erámi unirísõre udé ga purása quedéjna yu; ga ca acose baroquéode udore quigode ome yu.

²⁰ Yáyipie jogate barecujate iyiejnanie úringáringui pirajai iji deréjnai údode.

²¹ Ua u uje banguíra baru dosógode aja dicotárechoquíode udore ore, uje bamangaquéode gajnesórone u, ga udore ore u uje ore cho cutuque ga ore chicáji te yui ome baroquéode udore quigode.

²² Ajócãre ore ichietabáitigade, iboyaquéode ore iji yejode. U gu uje e yipésu bapijogúsorone barúo udore quigode.

²³ Peduguéjna cuchábode ore pésu dajé quigode jeta ore cho yate marínga, jé baroi uyu yáyipie jogate báyipie parénguenie quigode gatuaque.

²⁴ Bapijogúsorone barúo gajnui u cucha pajmarátique ome yu. Ga yoquisórone upo baruode udore ore rĩ, uje ore cho payuquetotiguei quigome yu.

²⁵ Yáyipie catáji jnupuñúringane udore ome yáyuguhebátigade; atire yucuecaringuei yibai uje jé baru quicho udore ome yu gu.

²⁶ Uje yatata yadode ome ua ga bachajnai yu. Acate yu ome báyipie parénguenie udire quigode.

²⁷ O yiquigome ujeta yiraja yijmapiéraque ome basoca arégode udore quigode, ga yáyipie a ca jnoji bátedatéode udore jne.

²⁸ Yáyuguhebátigade na yáyipie aja jnumi; be ga asíome petotiguei ome yu ome baruode udore.

²⁹ Angara dajeque tágode quitique ome yu, ga udore ca cunguésõri yu. Osõre yu, ga acate yu ome báyipie pirosobádedie quigode udore.

³⁰ Yajegaidi dajeque u uté uje ũrepise. Yicha barecujate iyiejnanie udire aja yiquei jeta yi quigode.

³¹ Yo pimesigode aja bapijogúsorone barúo, Pangarádejná. Ca ajuéga jeta pajegátigai chise yu.

³² A yayóna baroquéode udore aja quedéjnane jne, ujetiga yirajatigai jé quérã iji báyipiedie udire.

³³ Acate yu ome báyipie parénguenie quigode, Pangarádejná; ga yi udire quigode jeta yimánaja jnumi.

³⁴ Asíome pirajatigade ome yu jeta yujuse baru pirosobádode guio, ga a yejna yáyipie aja udore quigode jnese jne jeta yi quigode.

³⁵ Opísape baroquéode udore gabi quigome yu, uje yajmaránone u udore quigode gu.

³⁶ Orei yáyipie iji bapijogúsorone barúo udore yui, mu ca yáyipie jogadípise yamatatígo cucha uáso.

³⁷ Orei yedodie iji ti yui ome cuchade uje eruérãcho. Asíome yicaniratiguei ome yu jeta yi bajmapiedie quigode.

³⁸ Apésu ga bachagájade barúo tocade ome baroi uyu, uje basocade jé u udore ome ore uje ore dosóñime ua.

³⁹ Arame yu ome yajnéone puru dosócho uje yirosóñime udore yui; gu uje barecujate iyiejnanie udire uerate quigode.

⁴⁰ Cajmita to uje yajegaidípiso basoca arégode udore. ¡Báringai ũrepise cuse, ga ẽra yucuecaringuei ome yu!

⁴¹ Ajuéga bajnoraquédatéi ome yu, Pangarádejná, jé aja báringai Piquetasõre uje e bachaga yoqui ica.

⁴² Ga jé u ujetiga yichajnai ore ujñiequérigo ome yu jne, u gu uje yangureta baru quigode udore.

⁴³ Jé ca ajnime dara uréone udore iji yibijnani, uje yangureta barecujate iyiejnanie udire yui ome yu gu.

⁴⁴ A jecucha ga yipésu báyipie pirosobádedie quigode gatuaque jne iji deréjna pitade.

⁴⁵ Ga que cuchárique qué chigarupo yu jne rĩ, gu uje yucuegode u basoca arégode udore.

⁴⁶ A yujúdode u bapijogúsorone barúo udore ome peduguéjna cuchábode ore jne iji ore iquéode, enga a jé ca pinguíra dipótique aja yu jne.

⁴⁷ U gu uje yajmarápusu baroquéode udore quigode, uje yijnóra udore gu.

⁴⁸ Yijosi baroquéode quigode iji gaté, uje yijnóra udore quigode gu, ga yáyipie a jé jogate báyipie parénguenie udire quigode jne.

⁴⁹ Ajnusina baruode uje bango baroi uyu ica, ga udore u uje pésu ga yangureta udore yúode.

⁵⁰ Cuchade udore uje na yu aja jnumi marínga, yáyipie jogadípise baru qui casodica ga udore u uje chisíome yúringai ayoré pujnu ome yu rĩ.

⁵¹ Pujñiequé noñángone udore chaco yibai gu banguresórojmane udore ore, mu que yorei yáyipie iji ti yui ome baru pirosobádode udore.

⁵² Uje yáyipie déji barecujate iyiejnanie udire uje jé jogate aro erámi nanique, ga udire u uje chejñu yáyuguhebátigadatéode iji yúdode, Pangarádejná.

⁵³ Pájningai chĩreta yajei ga gose sijnángone udore ore uje ore noñome báyipie pirosobádedie udire iji te jmete.

⁵⁴ Báyipie parénguenie udire cho pachachagútique ome yu iji yúringai disorãque iji erámi tudé.

⁵⁵ Yáyipie déji bei iji dejade, Pangarádejná, ga jé u uje yipésu baru pirosobádode udore quigode.

⁵⁶ Yajneque bajmangaqué ueradode udore, uje yipésu basoca arégode quigode.

⁵⁷ Pangarádejná, yajneque ua. Yajo yuja yuru quigode ome ua jeta yipésu baruode udore quigode jne.

⁵⁸ Yucué báringárique pátajasṍre ome yáyipie jnese. Be ga osõre yu uje jé baru quicho ome yu ica.

⁵⁹ Uje yáyipie déji yadode, mu jĩraque yorei yúringai urugu iji bapijogúsorone barúo udore yui te rĩ.

⁶⁰ Yiquejnáji baroquéode udore úringáringo pipesucho yui jeta jé ca yãra yu iji cuchárique ome ua.

⁶¹ Uje ate gajnaréngone udore ore chigaru yu ome enuéjnane udore marínga, que yicadígui báyipie pirosobádedie quigode.

⁶² Dejnínga gatócoro marínga, jé yujnusina ua uje yo cuyuque, ga yacãre babai ome barecujate iyiejnanie udire úringanie ũrepísei quigode.

⁶³ Yo yijõráji udore ore jnese uje ore dosóñime ua; yojningane u udore ore uje ore pésu bajmapié aréguedie udire aja quigode.

⁶⁴ Bajnoraquédatéi chĩreta jnumi udé, Pangarádejná; o yiquique ome báyipie parénguenie udire quigode.

⁶⁵ Ua u uje batapísaja baroi tuyu, Pangarádejná, uje jé baru quicho udore ome yu ica.

⁶⁶ O yiquique ome bajiritíga uréone udore quigode jé aja pirajatigade jeta obiréjna ome yu, u gu uje yangureta baroquéode udore quigode.

⁶⁷ Uje cáma cuchade na yu aja jnumi, ga yicai te yui ome pate uréone quigode, mu jé iji de ga yujuse baruode udore quigode guio.

⁶⁸ Paraque ua, ga bapesudode cucha ueracho; ga acate yu ome báyipie parénguenie udire quigode.

⁶⁹ Dicotárechoquíode udore ore u uje ore chichaga cuchade aja yu ome darupatáringane, mu ome yáyipie jnese ga yipésu bajmapié aréguedie udire quigode.

⁷⁰ Udore ore áyipie cachi jogate ore, uje érãtique ore chécãre dáyipie quitique, mu ome yu ga yajmarápusu báyipie pirosobádedie udire quigode.

⁷¹ Jé uerate ome yu uje yejnáreque cuchade isagode; u gu jeta yiraja báyipie parénguenie udire quigode gu udore.

⁷² Ome yu ga báyipie pirosobádedie udire uje tṍraji babijnani, udire u orerenie ome yu, ga jnuéngai óro guebéode jé aja pláta guebéode ore ome dáringane orerã́cho. A udore ore batigárique de jórogui mil dipesérigo marínga, jé báyipie pirosobádedie udire sué gai.

⁷³ Bapésu yu ome bajmainie, ga jé u uje bamate yadode jnese iji yu. Asi ome payuquetotiguei ome yu jeta yiraja baroquéode udore quigode.

⁷⁴ Udore ore uje ore dosóñime ua ga jé u jeta ore chimo yu, ga a ore nína re jne; u gu uje yangurenone u baruode udore yui ome yu.

⁷⁵ Yiraja, Pangarádejná, uje bajiritigade udore ũrepise ua ome quigode; ga jé ũrepíso basocade udore uje bapésu yejnaréngone udore isagode ome yu.

⁷⁶ Urénga, omi tu jeta angongara bajnoraquédatéi uté aja yu jeta chinoningase yáyuguhebátigai uté iji yu, uje jé baru quicho udore ome baroi tuyu ica.

⁷⁷ Ajuégaba bosongaquei ome yu jeta qué yiquecape to; u gu uje yajmaránenie u báyipie pirosobádedie udire quigode.

⁷⁸ Yipésupú ga ijoyatade udore chajéngome erámi, jeta ore chinguíra dipoi aja re; uje udore ore pésu yejóporinguéone uje que quitique cuse mu. Mu ome yu, ga yáyipie que jnoji bajmapié aréguedie udire quigode jne.

⁷⁹ Udore ore uje ore dosóñime ua, ga omi tu jeta ore chicai gadoi ujetiga ore chiraja bapijogúsorone barúo udore quigode.

⁸⁰ Apésu ga yáyipie cáputapísiji báyipie parénguenie udire quigode, jeta jé ca pinguíraja dipoi aja yu.

⁸¹ Yáyipie cho sere ome báringai Piquetangore unerai; yirote baruode yui ome yu.

⁸² Yedominone íjnoque ome baruode udore úringane tocachucho yui. Ga yósi tome ua: –¿Cho rique jne jeta osõre yu?–

⁸³ Uje yajnui tu cucha aórique uje pijoyaque pijoyatique aja, ga pésu topié iji uté uje pióti jogate gu; mu que yicadígui báyipie parénguenie udire gotic.

⁸⁴ ¿Díningo cho ringome yu jne a? jetiga baroi uyu jé yirote báringárique yátajasṍre yui. Jé aja jeta ¿dirode cho rique? jeta ajire yumajosórone ore adode aja quigode.

⁸⁵ Ijoyatade udore ore chijócha derugode iji yirípiedie iji yiquéode; udore ore u uje que ore doi báyipie pirosobádedie quigode udore.

⁸⁶ Baroquéode udore ũré quigode jnese; mu jé sijnángone ore cho damajo yu, uje que quitique cusome yu. ¡Ga átaja yu!

⁸⁷ Yajni pĩroque ejoi ome udore ore iji erámi tudé; mu que yi ga yicadígui bajmapié aréguedie udire quigode.

⁸⁸ Atirépo yucuecaringuei yibai te rĩ ome bajnoraquédatéi, ujetiga yimate bapijogúsorone barúo quigode aja guesi uje tṍraji babijnani.

⁸⁹ Pangarádejná, érãtique baruode udore chécãre re iji dirode uñeque ga jecucha jogate gatajnoquei ome dáringane togójma.

⁹⁰ Báringai tuté ũré que eruénique cuse ga jé chuságaja disi ejode ore jnese; bachajapite jnumi uté aja jogadi nanique ga jé charite dayaridi uté gatuaque.

⁹¹ Uje bapesute cuchade udore iji jogadode nanique, ga jé jogate dajogadode jé iji deréjnane udojo; u gu uje bo baróchoji cuchade udore jnese.

⁹² Ujetiga jé ca yajmára báyipie pirosobádedie udire, ga yejnaréngone cucha a chimanirase yu aja jnumi.

⁹³ A jé ca yejñu bajmapié aréguedie udire iji yajénique jne. Batocaidedie u udire ujetiga asíome yucuecaringuei ome yu.

⁹⁴ Bajneque yu, ga aqueta yu; u gu uje yucué bajmapié aréguedie ome yu.

⁹⁵ Sijnángone udore ore chirote yiquei jeta ore chejna yu, mu a jé yidójnangapísa bapijogúsorone barúo quigode jne.

⁹⁶ Yimo cucha ueradode uje ueracho mu eruéode cuse; mu gusu baroquéode quigode uje érãtique chise deruénique to.

⁹⁷ ¡Urénga! Yijnorapise báyipie pirosobádedie udire. Ga yáyipie jogadípise udire iji deréjnai údode.

⁹⁸ Baroquéode quigode udore pésu yúringai áyuquetotinguerã́que ome yumajosórone ore, uje jecucha baroquéode quigode udore déji yari gatuaque gu.

⁹⁹ Yirajatigade orocoi ome yacadisórone ore jnese; u gu uje jecucha yáyipie déji bapijogúsorone barúo udore quigode.

¹⁰⁰ Yirajatigade sué choquíjnane udore ore irajatigade gai; gu uje yujusípise bajmapié aréguedie udire guio.

¹⁰¹ Yirídade cãra dajesúrique ome cucha gajnaréngone udore jnese gabode, ujetiga yujuse baruode guio.

¹⁰² Que yo cutúgome barecujate iyiejnanie udire, u gu uje e bacate yu ome.

¹⁰³ Yibijnani chajmárapúsu baru quigode udore, ga udore sué cutepeque pajmarátique gai ome yarei.

¹⁰⁴ Bajmapié aréguedie udire u uje yiraja yirajade cucha ome udire, jecute yetaguipise pisoca noñaque tágode jnese.

¹⁰⁵ Baruode gajnui u pioque papótique ome yirídade ga chijñate yirípiedie gai.

¹⁰⁶ Yijnime yurúñiejnane ga yajo yuja udore úringáringo pipesucho ome bajiritíga uréone udore quigode.

¹⁰⁷ Pangarádejná, e jiei uje yejnáreque yu. Ome baruode udore, ga asíome yucuecaringuei ome yu gaté.

¹⁰⁸ Amesẽre yeranone yicotaqué udojo ome ua, Pangarádejná; ga be ga o yiquigome barecujate iyiejnanie udire quigode.

¹⁰⁹ Yucuecaringuei isai urique iji cucha dacadode udore jmainie; mu que yamurase báyipie pirosobádedie udire gotic.

¹¹⁰ Sijnángone udore e ore pésu dajuyágaidóde cucha iji yiquei, mu que yo cutuque ome bajmapié aréguedie udire quigode.

¹¹¹ Bapijogúsorone barúo u uje yajnecho udore quigode gatuaque; jé ũré uje udore pésu yajéchietaquéi.

¹¹² Yorei yáyipie iji báyipie parénguenie yui jeta yi quigode gatuaque, jé aja ujeta yimánaja jnumi.

¹¹³ Yetaguipise jnanione udore ore uje ore áyipie quigode gare, mu yijnorapise baru pirosobádode quigode udore, Pangarádejná.

¹¹⁴ Ua u uje jecucha yacose yu iji barosadi, ga yicha ua aja yiquéode gatuaque. Yangurenone u baruode udore yui ome yu.

¹¹⁵ Acayoi siñéngome yu, sijnángone uaque á, uje yipotigádi u Yudupade iroquéode quigode ome yu jeta yañuru udore guio.

¹¹⁶ Átaja yu, uje jé baru quicho udore ome yu ica gu, jeta jé yiqueca jne, ga jé ca pajegátigai chise yu ome báringai pangurete.

¹¹⁷ Ãraque yu ujeta ca cuchárique chósi tiji yu; enga a jé yajmitápise báyipie parénguenie udire gatuaque jne.

¹¹⁸ Ua u uje bajia ti yui ome udore ore uje ore chayo báyipie parénguenie udire gai. Jé ũré uje udore ore pésu jórogu cucha dacadode ome dáringane aringáca.

¹¹⁹ Ayoré sijnángone jnese iji erámi ga bo cucha pasique gajnujna iji udore ore; jecute yijnóra bapijogúsorone barúo quigode.

¹²⁰ Yúdode cho ta-ta-ta uje yitodo ua, jé aja uje yitodo bajiritigade yui to.

¹²¹ Yipesudode u cucha uréone, cucha ueradode ore; jé ca ajíome yu iji udore ore jmainie uje ore cho dajosipié ome yu.

¹²² Ua upúsu yutocaidi ome yu jeta arodipise baroi uyu; ga ca ajuéga jeta ijoyatade ore cho dajosipié ome yu.

¹²³ Yitoji yajirigode gai gu jeta báringai Piquetangore pijógome yu, jé aja jetiga pimanique bojningane cucha ueracho aja jnumi uje bachagája yoqui.

¹²⁴ Jé ca ajuseque baroi tuyu ome bajnoraquédatéi, ga acate yu ome báyipie parénguenie udire quigode.

¹²⁵ Baroi u yu; asíome pirajatigai ome yu jeta yiraja bapijogúsorone barúo udore quigode.

¹²⁶ Deréjnai jé u ome ua, Pangarádejná, jeta jé be bajéningo, uje que ore doi báyipie pirosobádedie quigode gu.

¹²⁷ Jecute yijnorapise baroquéode udore quigode ga yijnoraquei sué óroraque gajnei yijnoraqué gai, uje icota jóroque dáringáraque óro ueradé mu.

¹²⁸ Jecute yajire bajmapié aréguedie udire bajaque jeta jé yirate udire ome úringanie ueradei; ga yetaguipise pigape tágode udore jnese.

¹²⁹ Bapijogúsorone barúo udore pitijabácho, jecute yujuse udore guio iji yáyipie.

¹³⁰ Baru pungarane udore u uje chisíome dírecaringuéi ome yoque; chisiapome payuquetotiguei ome uté gosi uje que urénga irajatigárique cuse mu.

¹³¹ Yáyipie chejna raja baroquéode quigode udore gu uje yajmarápusu udore unéningai ome yu.

¹³² Ajni yibai ga osõre yu, uje jecucha basocábeque ome udore ore uje ore chijnóra bei ueradi.

¹³³ Orei yirípiedie iji baruode yui uje bachaga udore aja gadoi, ga ca ajuéga yu ome cucha gajnaréngone jeta cho daróguiji yu.

¹³⁴ Arame yu ome jnanione udore ore ipesudedie pujurei; yigaidi u gu ujeta jé ca yujuseque bajmapié aréguedie.

¹³⁵ Ajñate baroi uyu yibai ome báringai nanganataque, ga o yiquigome báyipie parénguenie udire quigode.

¹³⁶ Yeducadode doi guesi iji yedodie ga cho tiéraque aja guesi, uje ¡chimo jóroque re! uje jnanione que udore ore chañuru báyipie pirosobádedie quigode guio.

¹³⁷ Pangarádejná, urénga, ũrepise ua enga ũrepise bajiritigade udore quigode.

¹³⁸ Ua u uje bachajapite bapijogúsorone barúo aja jogadode udore ga jé jogate dáringane ũrepíso, jé aja uje érãtique potigayacho udore quigode.

¹³⁹ Yejna yuja yúringai dojigaté ome baruode udore úringáringo pigaicho. U gu uje yumajosórone udore ore chicadígui baruode udore quigode.

¹⁴⁰ Bachagájadie udire báyipie quicho e petingarãi, mu jé isoca dasocai ome dáringanie ũrei; jecute baroi uyu yijnóra udire.

¹⁴¹ Ayoré atĩ́ape yu, ga pichietabaite yu, mu érãtique yicadígui bajmapié aréguedie udire.

¹⁴² Basoca uréone udore ujñapetácho quigode iji deréjna pitade jnese, jé aja báyipie pirosobádedie udire úringanie ũrei.

¹⁴³ Cucha dacate iménuone na yu aja jnumi ga yitécuna erámi gu udore, mu baroquéode udore u uje yajmára udore quigode.

¹⁴⁴ Bapijogúsorone barúo udore ujñapetácho quigode gatuac, tuaque. Asíome bayuquetotiguei quigode ome yu jeta yapite jne.

¹⁴⁵ Yejna yáyipie ome yúringai ugo ome ua, Pangarádejná. Achajnai yu, ga yipésu báyipie parénguenie aja quigode jne.

¹⁴⁶ Yúringai ugo gajnesṍri tu ua, Pangarádejná. Mu be ga aqueta yu, jeta yujuse bapijogúsorone barúo udore guio.

¹⁴⁷ Uje yĩriji iji dejaque utataringuemi ga yicha yúringai ugo aja yúringárique pátaja ome ua; yirote baru quitígo yui ome yu.

¹⁴⁸ Iji dejai údode, mu yitoji yajirigode gai uje érãtique moi doi yedodie, u gu jeta yáyipie jogadípise bachagájade baru quicho udore aja yu.

¹⁴⁹ Angári yibijnane ome báringai ijnorataque cuchape. Urénga, Pangarádejná, ajuse yucuecaringuei guio ome bajiritíga ũrepísode udore.

¹⁵⁰ Udore ore chirõre yu uje yumajosórone u ore ga ore eteque yúringárique pañeraque; mu idájapise ore iji báyipie pirosobádedie udire quigode.

¹⁵¹ Pangarádejná, uja ua aja de, ga baroquéode udore quigode ũrepíso jnese.

¹⁵² E iyajmaque uje yiraja bapijogúsorone barúo quigode uje bachajapite udore aja jogadode, jecute jé jogacho dajogadode iji deréjna pitade údode.

¹⁵³ Ajire cucha dacadode uje na yu aja jnumi, ga ajnime yu iji udore jmainie, uje que yáyipie jnoji baru pirosobádode udore quigode.

¹⁵⁴ Be ga acha ua aja yi ome báringai yadode ajirisõre ũré, ga arame yu. Asíome yucuecaringuei ome yu gu uje jé bachagája yi ica.

¹⁵⁵ Udore ore úringárique piquetaque idájapísiji sijnángone udore ore. U gu uje que ore chucué báyipie parénguenie quitique.

¹⁵⁶ Cuchadaté bosongaquei, Pangarádejná. Asíome yucuecaringuei ome yu jeta jé cunguésõri bajiritíga uréone quigode.

¹⁵⁷ Jiei yajnasórone ore, jé aja udore uje ore cho damajo yu, mu que yicai siñéngome bapijogúsorone barúo udore quigode.

¹⁵⁸ Yajire udore ore uje íjnoque ore anguretigárique iji ore ga yujnapise ore, uje que ore doi baru pirosobádode quitique gotique to.

¹⁵⁹ Adójnangapísa uje yijnorapise basoca arégode udore. Añuru yucuecaringuei guio ome bajnoraquédatéi.

¹⁶⁰ Uje pisecarãte baru quigode udore, mu jé ũré quigode jnese, ga bajiritíga chojmara, chojmarane ore jnese ujñapetácho udore quigode, ga que eruénique erãpe cuse.

¹⁶¹ Peduguéjna ibijógode chajna yu aja quedéjnane, uje que yipésu cucha dacatique mu; mu yáyipie tijapísa re iji baruode udore iquei.

¹⁶² Yinína yu ome baru quigode udore, ga yajnui tu ayorérique uje chise cucha orerã́tigo.

¹⁶³ Yetaguipise purupatáringane ga yujnapise udore, mu yijnorapise báyipie pirosobádedie udire.

¹⁶⁴ Yicota ua ome bajiritíga uréone quigode, ga gare iji ti iji deréjna chojmarai gatuaque.

¹⁶⁵ Pajesereringai irágu udore ore uje ore chijnorapise báyipie pirosobádedie udire; enga que cuchárique doi ga chucuase udore ore.

¹⁶⁶ Pangarádejná, yirodi u báringárique piquetangore uté yui, ga yipésu baroquéode udore aja quigode.

¹⁶⁷ Yáyipie jnese chusípise bapijogúsorone barúo udore quigode guio; yijnoraquei que chajire re ome udore gotique.

¹⁶⁸ Yi bajmapié aréguedie, bapijogúsorone barúo udore ore quigode; u gu uje baraja yipesudode cucha jnese iji benominone.

¹⁶⁹ Ajuéga jeta yibijnacaraidie chise baquei, Pangarádejná. Asíome payuquetotiguei ome yu jeta jé cunguésõri baruode udore quigode.

¹⁷⁰ Ajuéga jeta yutaidode udojo chise ua iji bajogadi; ga arame yu, uje jé baru quicho udore.

¹⁷¹ Yibijnani a irágu jne ome picotaquéode uje qui tu ua; u gu uje báta báyipie parénguenie quigode aja yu.

¹⁷² Yarei a jé ca chacho ijñiecáca jne ome baru quigode; u gu uje baroquéode udore quigode ũrepíso jnese.

¹⁷³ Be ga acha bajmanai aja gadoi jeta chátaja yu, u gu uje e yajegaite basoca arégode udore quigode.

¹⁷⁴ Yajegaidípise báringai piquetangore, Pangarádejná, jé aja báyipie pirosobádedie udire, uje yajmarápusu quigode.

¹⁷⁵ Ajuéga jeta yiqueca ga yicota ua jne; ga bajuegádi urásu bajiritíga uréone udore jeta chátaja yu.

¹⁷⁶ Yajnua tu áyasa bijnángueraque uje chicai te yui; be ga acué baroi uyu, uje érãtique yicadígui baroquéode udore quigode.