Sálmos 118 - Dupade Uruode

¹ Acãcho Pangarádejnai gai uje paraguipise uté. Ga uté ijnoraquei jecucha déji gatuaque.

² Israélgosode ore chojningárasa: –Uté ijnoraquei érãtique chise deruénique.–

³ Aarón ájnape disi ejode a udore chojningárasa: –Uté ijnoraquei érãtique chise deruénique.–

⁴ Udore ore jnese uje ore dosóñime Pangarádejnai, ga ore chojningárasa: –Uté ijnoraquei érãtique chise deruénique.–

⁵ Yáyuguhebátigade u uje yibidi Pangarádejnai, ga uté chajnai yu ga chijnime yu iji udore jmainie.

⁶ Pangarádejnai déji yari, ga que yitodo. ¿Ore isocáriguiráse ome yu a? uje gusu erámi achamisõre ore.

⁷ Pangarádejnai déji yari, ga Yátajasṍri u uté; ga a yimo yumajosórone udore ore jne ome yúringai pujnuéngaisṍre.

⁸ Ueradi u ujeta yoco Yocãrésõri iji Pangarádejnai ome cucha dacadode jnese, ga jé ca yanguretágo yocujórique ayoré ome udore.

⁹ Omitigai u ujeta yicoi ga yoco Yocãrésõri iji Pangarádejnai uté, enga jé ca yoco yocangureníji peduguéjna cuchábode iji erámone udojo.

¹⁰ Punirone iji erámone ore chaparu yibai jeta ore socárome yu, mu a yejna udore ore jne ome Pangarádejnai uté i úringárique pĩcaraque.

¹¹ Ore chaparu yibai; jé ũrepise uje ore socárome yu, mu a yejna udore jne ome Pangarádejnai i úringárique pĩcaraque.

¹² Ore chaparu yibai, ga ore cho abéja chóguedíe iji yirosadode; mu udore ore cho pore ojnacúco papóseraque jeta jĩraque erã́ta ore jogadi. A yejna udore ore jne ome Pangarádejnai i úringárique pĩcaraque.

¹³ Ore chucuase yu aja quedéjnane ome dabosode dejo, mu Pangarádejnai chátaja yu.

¹⁴ Pangarádejnai u yetotiguei ga yachachagúgode gajnesṍri tu. ¡Uté jé u yiquetangóri!

¹⁵ Pibijnacaraidie chisa dabade iji ayoré uréone udore ore iguíjnane uje ore júdode u daninaquéode ome Pujnuéngaisṍri uté úringai pujnuéngaisṍre. ¡Pangarádejnai ãrachua u uje jnuéngai cuchade jnese!

¹⁶ ¡Pangarádejnai ãrachua cuchadaté ga picota uaté! ¡Pangarádejnai ãrachua u uje jnuéngai cuchade jnese!

¹⁷ A jé ca yitoi jne mu a yiqueca jne, ga a yo quique Pangarádejnai imaningone cucha udore jne.

¹⁸ Pangarádejnai chopise dajuñame yu, mu que juéga yu ome pitoringai.

¹⁹ Achẽre piagode udore gai iji Dupade iguíjnai yui uje ũrepísode u udore, ga yacája ajei jeta yacãre Pangarádejnai uté gai iji uté.

²⁰ Pangarádejnai joride u udaque, jeta ũrepísode ore pípidi u jne.

²¹ A yacãre babai jne, uje bachajnai yu gu, ga e yiquetasṍri u ua.

²² Ga Yiquetasṍri uté gajnua tu cucarané pichietabade uaté ome guiguíjnai orasórone udore ore, mu nóña ga cucarané ibijogue uaté iji guiguíjnai uté.

²³ Pimanicho udojo ome Pangarádejnai, ga yitijagópisa udojo.

²⁴ Diri tudé u uje Pangarádejnai pésu úringai ibijóguiji, ga yachietágoji jeta yinínango yógome imani uté.

²⁵ Pangarádejná, yijóchago bajei údi jeta aqueta yoque; yijóchago bajei údi jeta apésu ga uerate cuchade ome yoque, Pangarádejná.

²⁶ Pininaquei gajnesṍri u uté gosi uje di gu Pangarádejnai uté i ueradi. Yamacáco uaque iji Pangarádejnai iguíjna cuchábi uté ajei ome yocuru omone.

²⁷ Pangarádejnai u Dupade ga uté u uje chijñate yoquibai. Amátayo ñane jeta ajnáño ijnacojodie iji gatéode iji uacajochai jeta asáchoja ore aseradéjnai uté uje aquirájna ue gajnúone déji gatajidode.

²⁸ Yangureni Dupade u ua, jecute yacãre babai; yangureni Dupade u ua, jecute yijosi ua iji gaté.

²⁹ Acotáyo Pangarádejnai uté uje paraque gu. Uté ijnoraquédatéi érãtique eruénique erãpe cuse.