Sálmos 110 - Dupade Uruode

Peduguéjna Cuchábi David ipesudé Sálmo udaque.

¹ Pangarádejnai uru quigode chósi te ome Yeduguéjnai uje Yangureni u uté: –Ácariji yãrachua iji de yirosadi jé aja ujeta yichajapite bamajosórone udore ore aja barídade udore údi jne.–

² A Pangarádejnai tẽra dapijoguto docogué ome ua jne iji Sión, uje íode uñai tu Jerusalén, ga docogué uaté imoi tu báringai ujopíerãque cuchape. ¡A Pangarádejnai uté pésu ga ajnué bamajósoningo ore gai jne jeta o baróguiji udore ore jnese jne!

³ A chise dínique ujetiga basoldate dipeséode udore ore dimane ome bajocaningárique yui ga ore cho piguidé pibiéji bangoningájnai jeta angongara báringai ujopíerãque cuchape iji bajocaningai uté. Uje diri chujé gaté ga gajnetui base iji erámi ga imoi tu uje ijõre basoldate dipeséode ore aja bajocaningai, ga érãtique ore enochai base gotique.

⁴ Pangarádejnai urúo daruode ga érãtique chécãrapo rĩ, uje chojninga: –Báringai sacerdote a jé jogate ua jne ome báringai yicatecãraisõre uje bacatecã́ri yu ome barasade ore. Ga bajnui tu yuruode júsõre bajai Melquisedec uté, uje jé cãraque re. Uje ore chojningame uté to "sacerdote."–

⁵ Pangarádejnai déji bãrachua ga a chise uté ájninga jogatique dire jne, ga jé u uje a pésu peduguéjnane udore ore pépitabúrique jne.

⁶ Iji deréjnai uté Pangarádejnai a cho dajuñame punirone achamisórone ore jnese, ga a chĩreta ore idáyode udore ome ore urása togode ajnoqueque dipesérigo; a uté pésu pasutedie ore jne, enga pépita iji uté jmainie iji erámi údode jnese.

⁷ Mu eduguéjna cuchábi uté a chóji tié qui jne uje chajo dajei qui aja. Ga jodi yote uté chisiapome etotiguei ome gaté rĩ.