Sálmos 11 - Dupade Uruode

Piradé udaque gajnesṍri u piradedie irajasṍripísi. David ipesudé Sálmo u.

¹ Yicha yanguretigai aja Pangarádejnai uté. Jecute sijnángone uaque á, uacaruode ¿quitiguirase ome yu a? uje uacojnichome uyu: –O chugúpenique ome báringárique choque aja cucarani uté ujeta acose ua iji uté.–

² Cajire to, uje jnani ate gajnaréngone udore ore na dojodie aja doji carubi jeta ore chayo doji údi iji dapoguiépidi ome dachotique cucha. Ga ore ichode u jnani áyipie ujñapetade udore ore.

³ Jnani uréone udore ore déji iribite etoi gai, uje iríbidi uté gajnui tu pajiritíga uréone quigode, jé aja pate arégode udore ore, mu ujetiga ore uniri angarate sijnángone ore chajnangarase ore iríbidi uté, ¿enga uréone ore isocárique erásome re?

⁴ Pangarádejnai uté déji daguíjna puyai iji dedáidatéi iji gaté. Pangarádejnai uté charipi ueradéjnai jogadi tu gatajnoquei. Ga toji erámi údode gai iji dajogadi uté, uje uté edodie chajmita ayoré chojmara, chojmarane ore adode.

⁵ Pangarádejnai uté chetingare jnani ate arégode ore úringane ũréo; jé basa ga sijnángone udore ore, jé aja udore ore uje ore irasigode u pijosipiedie quigode, ga Pangarádejnai uté chujnapise udore ore ome dáyipie jnese.

⁶ Ga Pangarádejnai a chiroque guérique aja ayoré sijnángone udore ore jne, ga tṍraji gaté ome ore uje cho guegueraque ditaguéode aja jnumi; jé gueranépo pioque ocaraidie, jé aja cucha ai iringótique, jé aja eme cuchape jũruachutique ome ore rĩ, uje cho udore ore oré ome udore ore, jeta jé ore cho dajnenguíji udore.

⁷ Pangarádejnai u ũrepísi, ga uté chijnóra pate uréone to. Jecute ayoré ũrepísode udore a ore pañaji uté enochai to jne.