Sálmos 109 - Dupade Uruode

Piradedie gajnesṍri u deyade ore ijñai uté. Peduguéjnai David iradedie uña u.

¹ Urénga, Dupade á, yicotaquéode gajnesṍri á, jé ca o paraque.

² Uje jnani sijnángone ore chedo yu ome dáringane urupatáquechoquío; udore ore arei u uje que chacho dáringai aringácachoquí, ga jno yúringai pedoque údi aja sona.

³ Ga udore ore chaparu yibai ome daráñiejane udore. Uje que yatique gajnaréngome ore mu ore chisa yu pórecajna.

⁴ Yijnoraquei ome ore oré tu yúringai pijmongarája ome ore, mu yicatecã́ri Dupade ome udore ore to.

⁵ Paraque yu ome ore mu ore cho yúringai paraque oré ome date gajnaréngone. Ore cho yijnoraquei oré iji detétigade ome yu.

⁶ Atṍri juez ate gajnaréngone udore uñeque jetiga chajire yumajósõri uté adode aja quigode. Enga apésu ga uñeque chácariji yumajósõri uté ãrachua ome dáringárique paguhétajasṍre.

⁷ Jeta Padode Ajirisṍri juez uté chajire jnani sijnai uté adode aja quigode ga apésu jetiga chojningame uté: –Máraque ua,– ga jé máraque. Ga uté ajei jochaquéode udore doi ga Dupade cho cucha dacate noñánguipísiji márai tuté icatecãraitigade quigode.

⁸ Yipésupú ga uté jé ca chisína dacuecaringuei iji erámi udé jne. Ga uté ujode ayoré uñeque chácariji charidi ome gajnepídi uté, jeta cho dajnéngu uté gajnéone cucha erase.

⁹ Jé upo rĩ jeta uté abode ore chise dáringane disijácho iji uté; jé basa ga uté acoté nóña ga chequeca iji uté.

¹⁰ Ga uté abode ore chisṍriji erámi údode bisideque jne, jeta ore chutai dojode ayoré aja dajesúode; ga ueratigai u jeta pijócãráque udore ore iji ore iguíjnai uje e guiguíjna ao uté gu ome úringai arímeque.

¹¹ Ga uté oidode déo iji dojode ayoré gari ga ore chijnime gari jogonórone cucha jne gu uté ijnose carubode udore; jé aja uje uté chejna daguesi ome dasagode dejo jeta ugúchade déji, mu ore chijnáji gari uje purása quedéjna udore ore ome uté gu.

¹² Ga uté que chimópo dáringárique posorángome dojórique ayoré jne rĩ; ga uté isocai jé chisa abode ore to uje que ujórique ayoré chosõre ore jne iji dáringai disijate uté.

¹³ Ga uté ájnape disi ejórigo ore a erã́ta erámi ome udore ore jne; ga jé ca páyipie gaidápo uté i to jne rĩ iji erã́tique udé.

¹⁴ Enga Pangarádejnai que chamurase udore ore dayode ore isijnaringuéone gotique; jé aja ore daté ate gajnaréngone jeta jé ca pĩroque udore to jne.

¹⁵ Yipésupú ga Pangarádejnai a jecucha chicha udore ore ate gajnaréngone aja denominone jne, jeta ca chicadígui udore, ga ca pujnusinápo udore ore jne rĩ iji erã́tique udé.

¹⁶ U gu uje jnani sijnai uté etéquetí posongaquérique déji ajénique, mu áyipie gaidode u dajmongaquéode ome dojode ayore jmatácho jé aja ore uje que ore chimo cucháringome re, jé aja uje pota chui ome udore ore uje cuchade na ore áyipie aja jnumi.

¹⁷ Uje uté irasique uje chamacãre dojode ayoré ome daru uajádode jeta cucha gajnaréngone chise ore, ¡ga omi tu jeta cucha gajnaréngone udore doi ga yore uté gai! Que uté ajegaite puru ueradode to ome dojode ayoré; ¡jecute ueradi u jeta puru omone udore ore jé aja pacacãrátigade ore idájapise udore iji uté!

¹⁸ Ga uté jé cho daguidé gajnujna iji damacaqué noñángone udore. Ga jé tiógara ujeta udojo chacája uté aoi ga cho yotique ome uté; jé basa ga chacája uté ajnoquéode ga cho asétique iji uté ajnoquéode udore.

¹⁹ Jé tiógara ujetiga uté chaco dabai ome daráñiejnane ga cho pepeque piguidíji udore. Ga jé chidota udore aja re ga chome pigarutique uje pidotája piráraque gatuaque.

²⁰ Jé tiógara ujeta Pangarádejnai cho oré udore aguhétajade cucha udore yibai ga oredie jé u udire, jé aja udore ore uje ore ipesudode u pejóporinguéone ome yu.

²¹ Mu ome ua, Pangarádejná, Yudupá, be ga jé ca ajuseque yu ome yĩcarai uté bei; ga arame yu gu uje bosõraquédatéi uté uerate.

²² Jé ũrepise uje jmataque yu, ga cuchade chona yu, ga yáyipie cho pajnangóngueraque ome cõráchatique jõ.

²³ Yiji ga yajnui tu purútique uje cho jnipe aja dajesui iji guedéjnoringárique. Jé yajnui tupo caríchatíque rĩ, uje jĩraque parãte uté aja jnumi.

²⁴ Yigataidie cho ta-ta-ta gu uje que jé yagu yibotique, ga yaoi toja yajnoquéode gai.

²⁵ Yugúsi gu ome udore ore jeta ore chujñieta yu; uje udore chimo yu, ga ore chijninguese datoidie ome yu.

²⁶ ¡Pangarádejna Dupá, Yangureni á, be ga átaja yu! ¡Aqueta yu ome bajnoraquédatéi!

²⁷ Apésu ga udore ore chiraja uje bajmainie u uje chiqueta yu. Ua upúsu uje bapesute udore, Pangarádejná.

²⁸ Ajuéga jeta udore ore chamacãre yu ome daru gajnarétigo, mu ua ga acacãre yu ome baru ueradode. Apésu ga yijmongarájasórone udore ore inguíraja pajegátigai aja re jne. Mu jé basa ga baroi uyu a yinína yu jne.

²⁹ Jé tiógara jeta yaguhétajasórone udore ore cho daba daguhétajade cucha udore ome yu gatuaque. Jé aja pajegátigai ga uté cho pepeque piguitique ome udore ore.

³⁰ Mu ome yu ga yachietaquéode garani u yibijnani ome Pangarádejnai ujeta yacãripise gai jne. A yicota Pangarádejnai iji ayorébuode udore ore edominone jne.

³¹ Pangarádejnai chácariji jmatágode udore ore ãrachua ome dáringai Parésõre. Gaidi u gu jeta chiqueta udore ore ome udore ore ijmongarájasórone ore ijmongaquéode.