Sálmos 108 - Dupade Uruode

Eduguéjna cuchábi David iradedie uña u.

¹ Dupade á, yidota yu iji báringai pangurete ome yáyipie jnese. A yirate piradedie uje déji Sálmos, uje yicotaquéode gajnesṍri tu ua, ga yejna yuja ua.

² ¡Árpa, jé aja ore yugode cucha uñane, ãrijíño to! Ga yiringare dire icha di uté.

³ Pangarádejná, a yicotai u ua jne ome pidáyode jnese. Ga a yirate ore iradedie uje déji Sálmos ome punirone jnese.

⁴ Bajnoraquei sué gatajnoquei uté gai ome úringai cuchadaté. ¡Báringai ũré chise gatajnoquei uté to!

⁵ Urénga, Dupade á, yajéode u ujetiga pijosique ua iji gaté ome cuchade jnese iji gatajnoquei. Ajuéga ga bangoningájnai déji jnumi udé gai jnese.

⁶ Ujetiga barása bedójnarione udore chise dáringáringo piraméo, ga be ga aqueta ore ome bãrachu piquetato, ga achajnai yu.

⁷ Dupade déji dayarite pirosobádejnai uté uje chojninga: –A yajuguína pijogadi Siquem uté ome uaque jne, ga a jé u jeta yinína yu. Jé aja jeta yajuguína tuijnai ome uaque to jne uje uté i tu Sucot.

⁸ Yajneque Galaad uté, jé aja Manasés uté; jé basa ga Efraín uté isoldate dipeséode u uje gãreque puniri yui; ga Judá uté gajnua tu yoguéraque uje déji yijmanai ome yúringárique pangarate, uje Peduguéjna Cuchábi a tṍraji Judá uté jne gu.

⁹ Yacãra puniri Moab uté aja yesãrapié, uje imoi tu uje cucha bisideque gu. Jé basa ga yṍra yuchiédode aja puniri Edom uté gai, ga imoi tu ujeta yujnué ore gai jne. Jé basa ga a yibite filistéogosode ore gai ome yúringai Pujnuéngaisṍre jne.–

¹⁰ –¿Ama gosi urásu jeta chijnoque yuja ore inama uaté uéchaminóri pidai? ¿Ga gosi chorase Edom gabi dajeque quigome yu?

¹¹ ¿Ama Dupade, jé ca ua u a uje chucuase yógaja ti yui? Ga Dupade á, que ajínapo yógaja yoquijocaningárique rĩ.

¹² Be ga átaja yógome yocumajosórone ore, uje que cuchárique tṍraji jnanione yocátajaquéode ome ñane gu.

¹³ Mu pujnuéngaisṍre yoque jne, ga gose Dupade uté. A uté chuchiéjna yocumajosórone ore aja jnumi ga chĩro ore aja ti.–