Sálmos 102 - Dupade Uruode

Picatecãraitigade udojo ojningai u dequejnaréngone ipatigayai uje chingo dáyuguhebátiga gajnéone cucha jnese aja Dupade.

¹ Pangarádejná, ¡angári yicatecãraitigade é! Yibidi ua gu jeta yisagode yiba chise ua ga jé átabaja yu.

² Jé ca apógu benochai ome yu ujeta yugúsiji páyuguhebátigade jmainie. Acha bangoninguini aja yi. Ga jĩraque achajnai yu jeta yibidi ua.

³ Uje yucuecaringuei jé cho pióti uje jĩraque íjnoque. Ga yajnoquéode iji yúdode cho pioque guegueraque ditaguérique iji yúdode.

⁴ Érãtique yáyipie chisápo datijínaquérique rĩ, uje cho ugarape betágueraque ome yu. Ga que chagúrique dépoji yajénique rĩ.

⁵ Yujnacade pésu ga yaoi toja yajnoquéode ga pipañáicho yajnoquéode iji yibai.

⁶ Yajnui tu sutiguéjnarique iji erã́petarétique, jé aja digorocórique uje cháji guiguíjna noñimérique.

⁷ Que motique dopoi yedóraque rĩ. Ga jé yajnui tupo chugúpẽre atĩ́atique rĩ uje gusúpusu iji guiguíjnarique ójo.

⁸ Yumajosórone que ore chimoque guedé batigárique uje ore chujñieta yu. Ga ore cho darúja yu ome daruode uje ore chĩ́care yi.

⁹ Puchucurúode basája yibosode cucha udore; ga yeducadode chimere riji yijódode cucha pocho.

¹⁰ Basa yu aja gaté gu ujeta acuase yu aja ta. Ga gose bájningamíe ome yu, uje bejna ua aja guesi.

¹¹ Yucuecaringuei jé péroji poréraque uje pipañaine iji guedéjnoringáne jnese. Ga yopise ugarabia uje beta ga chiririta.

¹² Mu ome ua, Pangarádejná, jé báringai Peduguéjna cuchape jogate ua. Enga a jé ca pamurañaque bei uté, ga jé chuságaja disi ejórigo ore ape ejórigo ore jnese jne.

¹³ A ãriji jne jeta angongara bosongaquérique aja Jerusalén uaté ome úringa pajnangaráña, uje e chise dajnei deréjna. ¡Ga gajnepídi guedé batiga e u jeta osõre uaté ome úringa pora aja gaté, uje e báyipie quicho ica ome uaté!

¹⁴ Barógode ore chijnóra cucaranenie iji Sión uaté, ga uaté urui chijõrorase ore áyipiedie.

¹⁵ Erámi unirisórone iji danirone a ore tãrara ome Pangarádejnai i úringai pĩcaraque. Ga peduguéjnane ore iji erámi údode jnese a ore todo ua ome bangoningájnai to jne.

¹⁶ U gu uje Pangarádejnai a chirópo Sión uaté aja gaté jne rĩ uje íode uñai u Jerusalén, enga a pipañáinapo Pangarádejnai uté ome ingoningájnai te rĩ.

¹⁷ A uté tangári ayoré jmataguipísode ore icatecãraitigade jne ga chajnai udore ore; enga que chujna ore icatecãraitigade quigode udore gotique.

¹⁸ A purusãracho udore quigode jne ome disi ejórigo ore ape gatérigo ore yui. Uje cáma ore basíji erámi to marínga, ore gajneque to jne jeta ore chicota Pangarádejnai Dupade uté.

¹⁹ Uje Pangarádejnai e chajire jnumi iji dayarite pirosobádejnai iji gatajnoquei uté; iji dayarite ejópisagójmai uté ga chajmita erámi.

²⁰ Uje gaidi u gu ujetiga chudute ore jurúgaibéode ujnacade, ga chirame udore ore uje ore gajneque pitoringai erase.

²¹ U gu jetiga pute Pangarádejnai uté i iji Sión uaté; ga ore chatata Pangarádejnai uté icotaqué gajnéone cucha iji Jerusalén uaté údode jnese.

²² Ga jé u jeta punirone achamisórone ore chamáta ñane aja uté, jé aja peduguéjna cuchábode, jeta ore chicota Pangarádejnai iji uté jne.

²³ Uje qué yiqueca ga Dupade uté chijna yetotiguei iji yari. Ga pésu ga dirode chayu iji ñane yúode, ga catadé yucuecaringuei iji erámi udé.

²⁴ Jecute yojninga: –Yudupá, ca bope yúdi uje cáma yisína yucuecaringuei iji erámi udé. Érãtique bejnáraque siqueré chise deruénique, uje jé bajogate erámi jé aja disi ejode ore gatuac.

²⁵ Ua u uje bapesute jnumi udé iríbidi nanique iji taningai. Ga bamaningone cucha erã́todie u bajmainie to ome gaté úringai pipesute.

²⁶ Uje a cuchade udore chise deruéode jnese jne, mu ome ua ga ¡betéquetí ese beruénique to! A udore ore chise deruéningo jne ga a ore cho bora piguidé ijaróraque jne. Ga a jé ore chopise boráraque uje pecãra pibié. Mu a ua uje écãre ga jé ore jogate dáringáringo pecãracho.

²⁷ Mu érãtique écãre basocárique to uje jé bate badi. Que ese bejnáraque siqueré eruénique to.

²⁸ Barógode a ore atígo jé isoca dasocai jne ome dáringáringo pãrécho. Ga a ore ájnape disi ejórigo a ore chapite iji bejórigo jne.–