Sálmos 101 - Dupade Uruode

Eduguéjnai David iradedie uña u ome Pangarádejnai

¹ Yiradedie achachagúgode u pijnoraquei jé aja pate ũrepísode quigode udore ore. Ga yiradedie u udiji ome ua, Pangarádejná, uje yicota ua.

² Yajegaidi u jeta jé ca yujuseque yu ome yijmapié aréguedie udire. Ga ¿Chorási rique jeta adójnanga yu? A jé ca piyaque yiyoguérique jne, uje jecucha yujuse yio gatuaque iji yiguíjna cuchábi jogadi.

³ A jé ca yicási yu ome cucha gajnarétique úringárique pajirique jne ga a jé ca udore dépisi yajénique jne. Ga yujnapise udore ore uje ore eteque pate arégode úringáringo pipesucho. A jé ca yujuéga yirosatígome udore ore jne.

⁴ A jé ca yáyipie jogadápo páyipie noñánguenie quigode jne rĩ ome yu. Ga a jé ca cucha gajnarétique úringárique pipesute dépoji yajénique jne rĩ.

⁵ Gosi a chedo dejominónique dojo ayoré mu pógu dedotigade udore ome dedotique dojo ayoré, ga a uyu u jne jeta yejna uté. ¡Que yujuéga yejóringome udore ore uje jé ore isígayode jé u re, jé aja ijoyatade ore to rĩ!

⁶ A yajire udore ore aja quedéjnane jne uje ũré ore ome cuchade jnese iji erámi udé, jeta jecucha ore pusi yirosadode gatuaque. Ga gusu ate arégode ore jeta yo yiróguiji udore ore to jne.

⁷ A jé ca yujuéga jeta udore ore uñeque pusi yiguíjnai jne uje ore etingarane u paringaquéode quigode. Ga yisocai a jé udé ome urupatáquechoquíode ore jne rĩ jeta jé ca yujuéga jeta udore uñeque chácariji yejórique to.

⁸ Iji durasedie jnese ga a uyu u jne jeta yipésu ga erámi chígabi ome ayoré ate gajnaréngone ore iji puniri tudé údode jnese jne. Ga a uyu upo jne rĩ jeta yipésu ga erã́ta erámi ome ayoré sijnángone ore iji Pangarádejnai idai Jerusalén udé to.