Sálmos 10 - Dupade Uruode

¹ Pangarádejná, ¿Cuchárique u gu a uje idája ua iji yu? ¿Cuchárique u gu a uje bapógu ua ome yu iji yajnéone dire uje páyuguhebátigade yore yibai?

² Ome dáringane ijoyataque ga ayoré ate gajnaréngone udore chajna ayoré piyágode ore iji jnumone ga que ore pota chirame dajnatique dojo ayoré. Mu ¡yipésupú ga ayoré ate gajnaréngone udore ore a ore ipesudedie trámpa jé igarique dapesusórone udore ore jne jõ!

³ Jnani ate noñai uté narare ga dicotare ome dajegaitígo cucha quigode. Ga uté irasigode u tãrarachugode ore isocade, uje uté jmapiedie jé u to gu; jé basa ga uté idojnóngamáni tupúsu Pangarádejnai uté.

⁴ Que jnani sijnai uté chucué Pangarádejnai uté ome re gotique to, uje chéngame detabi ome dajoyaquéode uje toji erámi gai ga chojninga iji dáyipie: –Que dupárique déji erã́tique.–

⁵ Jecucha noñanguipíso uté isocade gatuaque; mu idájapísiji gaté bajiritíga uréone ome uté, uje edominone chiságui; ga uté chietáyime detégode dojo ayoré udore jnese.

⁶ Ga uté chojninga: –A jé ca pijocayaque yu jne. Enga a ca yimo pujuréraque ome uyu gotique to iji deréjna pitade jnese.–

⁷ Ga uté chĩreta dabijnani ome damangaquéode, jé aja paringaquéode, jé aja pijosipiedie udire quigode; uté chicha dapoguiédedie pujurei jé aja pisijnaringuéone ore aja darei údi to.

⁸ Uté gapácadode u dacoyapídode iji pidáyode ejode; iji darodipídode udore, ga chujé dojórique ayoré udore, uje que ore ba gajnetique cucha cuse mu. Ga chacose re iji erámi ajei ome detique dojo ayoré yui, ujeta jmatátique chiramísara iquei enga cachodi jé u.

⁹ Uté pógu re, ga gajnua tu caraté quedéjnaraque uje chácariji daguíjnai ajei, ga chajire dejode ome dachẽratique cucha. Uje jnani acoyatai uté irodi tu gosi uje que chimo cuchárigo ome re, ujetiga chisa uté. Ga jé chisa jmatai uté, uje chimate aja dajuyágaidóde ducaricho ajei.

¹⁰ Jnani sijnai yui uté chajna jnumi ome dáringai cõrachuque, ga ejáguiji jmainie. Uje e josipíerane ore jnuéngai ayoré jmatai uté, ga jé u uje basája ore jmainie.

¹¹ Ga jnani josipíerãi uté chojningame re iji dáyipie: –Dupade a e chicadígui jõ. Uje e chaco dedodie gai; ga a jé ca chimo gotique to.–

¹² ¡Ãriji, Pangarádejná, Dupa Pujnuéngaisṍri á! Be ga asingare bajmanai aja gaté ome báringai irotacáca. Jé ca acadígui udore ore uje cuchade na ore aja jnumone.

¹³ ¿Cuchárique u gu a? uje jnani ate gajnarei uté dojnóngaja Dupade. Uje uté chojningame Dupade iji dáyipie: –Que toc ujetiga acha yu aja baquei jeta ajire yadode aja quigode.–

¹⁴ Mu que bamótique cucha dacate cuse, uje badójnangapísa gosi ipesudedie pujurei, jé aja gosi posode dejo ome dojode ayoréo, enga a opo udore ore oré jne rĩ. Udore ore yugode ayocáidi tu ua jeta ore noñome re iji bajmainie. Uje jecucha ua u disijádode ore átajasṍri.

¹⁵ Be ga abéro jnani sijnai uté jmanecai; apésu ga cucha gajnaréngone ipesusṍri uté adode choquípisiji guesi ome bajirigode acho, ga uté cho date gajnaréngone udore ore oré, jé aja ujetiga pejnaque jnese.

¹⁶ ¡Pangarádejnai uté Peduguéjna Cuchape iji deréjna pitade jnese gatuaque! Ga pĩroque Dupade guetesórone udore ore jnese jne iji uté uniri udé.

¹⁷ Pangarádejná, bamíningapísa jnani áyuguhebátade ore ajegaidode cucha udore quigode. Bapésu ore áyipie etotiguei jeta ore jnusi rángome cuchade. Ga e dimane bangoninguini ome udore ore yui.

¹⁸ Barota disijádode udore ore, jé aja ayoré ducañerájmane ore uje ore chejnáreque jnani josipíerane ore isocade ome re. Uje bagaidi u gu ujetiga jnani uté, uje cachi pipesute uté iji dachabei, jé ca pésapo daquiñiringuei ome ore rĩ.