Sálmos 1 - Dupade Uruode

Pininaquei ũrepísi isocade u udojo.

¹ Pininaquei gajnengóri tu jnani uté gosi uje que tangári jnani sijnángone ore áyipie quigode udore to, jé aja uje que nóna cucha gajnaréngone ipesusórone udore aja quedéjnane to, jé aja jnanione ore rĩ uje udore ore chujñieta Dupade ga jnani uté gosi que chácariji udore dosatique to.

² Mu uté gosi chijnorapise Pangarádejnai Dupade uru quigode ome re ga uté gosi que áyipie chicáji quedéjnarique ome dagaidode Dupade iroquéo jé iji dirode, dejade ore jnese uje que gosi chamurase udore iji dajénique gu.

³ Ga jnani uté gajnua tu poria uje pacáji tié edúdi ga adie cuse gatuaque iji siqueredie udire. Uje ijõre uaté gu, ga que acãratique doi ga caco iji poria uaté. Ga jnani uté ipesudode cucha tocade ga ueracho jnese.

⁴ Mu jnani sijnángone que ore atique cunguésõri udore gotique to. Uje jnani sijnángone ore cho jnacaraque togode gu uje emi chubúchu udore aja quedéjnane.

⁵ Ujetiga pajirique udore ore adode aja quigode enga a ore úringáringo máraque pijoque jne, enga a jé ca cuchárique déji jne jeta chãraque jnani sijnángone udore ome ore gajnei pujuyaqué uté jne. Enga a jé ca ore cho dajñare to jne iji jnani uréone ore charidi uté.

⁶ Uje Pangarádejnai chusípise jnani uréone udore ore guio aja ore ajesúode gu, mu jé basa ga jnani sijnángone udore ore ajnai uté dajeque chorei ore iji pitoringai.