Rut 4 - Dupade Uruode

Chise diri nanique uje Booz cho dacoté iji daguiosi casica acoté uje uaté i tu Rut nanique

¹ Jecucha ga israélgosode ore isocabeque nanique uje ore chicha daquiningaméone aja dedáyode jorídedie iji ore idáyode eruéode. Ga Booz quítequiguíji jnanione aquiningamei jogadi uté to. Ga chácariji jnanione ore ujade to. Qué igasique mu jnani diji ore gari uje Booz ojningai tu uté uje Rut abai casica iguiosipise. Ga jé u uje Booz tibite gai ga chojninga: –¡Jo é! ¡Qué boji te á! Ácariji yejoi iji yiyaridi udé to ga yicatecã́ri ua jne.– Ga uté iguiosi pusi ejoi.

² Ga jé u uje Booz tibidi ore angaránone uñane iji dejode to ga chojninga: –¡Ácayobíji yoquiyaridi udé to á, ga angachobi yocuruode to jne á!– Ga pijnangaidode iji pangaránone chejna yijmanáyone ore, ga jĩraque ore chácariji ore ejoi to.

³ Ga jé u uje Booz catecã́ri daguiosi jnani uté tiji ore iquei uje Rut abai casica iguiosipise. Ga chósi tome daruode iji ore iquei. Ga chojninga: –Yoquiguiosi casica Elimelec acoté Noemia quene ore di iji daqui casicaite ore unire uje i tu Moab. Ga uaté pota jeta tẽra dabai casica gajnei jnupe to.

⁴ Yicatecã́ri ua iji de jeta apota jeta be oré tome. Uje yicatecã́ri ua gu uje ore iguiosipísi tu ua, ga jé tiógara jeta be oré tome. Jeoga ca be, ga yiji jne. Chamáñaje ore iguiosi tu yu to, mu ua u uje ore iguiosipísi tu ua. Ga be, ga ango báyipierigui aja yocangaránone, yocujode jnanío ore iji yoquiquei ujetiga etaque ga jé dóji, ga ore chiraja báyipiedie quitígo jnese.– Ga catecãraini uté chajnai Booz uruode ga chojninga: –Ejẽ́. A yiji Elimelec casica gajnei jnupe oredie jne.–

⁵ Mu Booz qué catecãrápoi gaté rĩ ga chojningame: –Mu barajapise israélgosode yoquijmapiedie to. Ujetiga be oré tome Noemia gajnei jnupe jne enga amiri tu jeta o bacoté iji baguiosi casica acoté to jne. Yojninga tu moábgoto uaté uje nóna dejo Noemia aja ne ica uje uaté i tu Rut. Bamo gu uje israélgosode yosṍco yoquiguiose togode, jecute yoco yocacoté iji ore acotedie, ga yocape bajai base ga yisíngome yoquiguiose toi jeta cho dabi iji to, ga jé basa abi uté cho dajnéngu dai gajnei jnupe iji yoquiquigáningo jne.–

⁶ Ga jé u uje Rut abai casica iguiosipísi chajnai Booz uruode ga chojninga: –Jé ũrepise ua. A jé ca yiji Elimelec casica gajnei jnupe oréraque jne. Uje que yipota jeta yo yacoté iji uaté, mu jé basa uaté atique chorase dajnéngu yigaidi jnupe. Jecute yisi ome ua ore gajnei jnupe jeta be orerángome jeta jé bajéo ome to.–

⁷ Ga israélgosode ore isocabeque nanique uje gosi pota tẽra dajnei jnupe ga chejñu dachiétique ga chisi ome gaisṍri gotique. Ga e ore eduguéjnane pañapísiji ore áyipiedie quigode ome ñane, ga e que toc jeta ore chécãrapo dáyipiedie ome ñane jne rĩ.

⁸ Ga jé u uje Elimelec casica iguiosipísi chejñu dachiédi ga chisi ome Booz ga chojninga: –Jináca. Yuchiédi udé imoi tu uje yisi ome yiguiosi casica gajnei jnupe ome ua ujetiga be oré tome.–

⁹ Ga jé u uje Booz chisa uchiédi ¡saque! Ga jé u nanique uje Booz uté nararápo rĩ ga catecã́ri eduguéjnane iji dejode, jé aja dojode jnanío ore iji dejode to rĩ, ga chojningame ore: –E uacadúcho uté uruode quigode to ga uruode pijogúsorone a u uaque jne. Ga uté juéga yiguiosi casica ore gajnéone jnumío ome yu to jeta yi oredie ome to. Ga yojningane udore ore íode u udojo: Elimelec casica, ujnacari casodica Mahlón, Quelión ore. Enga a yiguiosi casica acoté Noemia a gajnei yiplátarigui jne.

¹⁰ Ga yojningane u eduguéjnane uaque jeta apáñañoji yuruode to. Uje a yo yacoté iji yiguiosi casica acoté jne. Yojninga tu moábgoto uaté to uje i tu Rut. Ga uaté abai toque bajai, a cho dajnéngu yocape bajátique to jne ga cho dabi iji jne, jé basa ga dai casica gajnei jnupe a jé gajnengápo to jne rĩ iji yiquigáningo. Ga a jé u jne jeta yiguiose toi tuté uje i tu Mahlón, ga uté i ujnomei a ca íjnoque to jne rĩ iji urasade ujade to. Uje e uacadúcho yuruode ga que toc jeta yécãre yáyipie quitique.–

¹¹ Ga jé u uje ore eduguéjnane chajnai Booz uruode ga ore chojningame ore: –Uacaruode udore pijogúsorone u yoque iji de.– Ga jé u uje ore chacacãre Booz uté ga ore chojningame: –¡Yipécopú ga bacoté tuaté jé chopise israélgosode yoquicodé cásidicáite gotórigui ore jne jõ, ga a jiérasi uacape disi ejórigo to jne rĩ! Yocojninganie u chequé bajedie udire uje ore íode u udojo: Raquel, Léa ore.– Ga jé u uje ore eduguéjnane qué jno daruode údi ome Booz uté ga ore chojninga: –¡Yipécopú ga ujnomerãque ua to jne jõ, Booz! Ga barasade ore tangári ua jnese iji yoquidai Belén udé uje yoquidai udé i uñai tupúsu Efráta.

¹² Enga apiérãque ua to jne ga bajnui tu jnani bajai Judá ujnacari Fares uje apiérãquedaté nanique. Uje Fares uté daté i tu Tamar nanique.–

¹³ Ga jé u uje Booz, Rut ore chisa ñane nanique. Ga jĩraque Dupade chatapísaja uaté nanique ga jĩraque jeque nanique.

¹⁴ Uje Rut ore abi e basosi nanique ga Noemia ujodie chequei ore irasé nanique ga ore chojningame: –¡Ueradipise Pangarádejnai Dupade isocade ome ua, yoquijõrámiá, Noemiá! Chamáñaje e chisi ome bájnami ome ua ga a uté u jne ujetiga chañurúpusu beo jne.– Ga ore chojninga: –Yipésupú ga ujnomerãque bájnami uté iji israélgosode yocujade jne jõ.–

¹⁵ Ga ore chojninga: –Jé chorase bacaria uaté to uje i tu Rut uje uaté chañurúpusu beo diríca. Ujetiga bajnacáningo batigai dérasi gare iji ti, mu ore icaniratiguéode a jé ca suérase uaté icaniratiguéode gai. Mu bacaria suaté suépise ore icaniratiguéode gai ome ua. Ga a jé adi tupo ome uaté abi to jne rĩ ga a jé chopise daté uaté icaniratiguéode ome ua to jne. Enga a gata ua to jne mu a barasé ua aja quedéjnane ome bájnami uté to jne.–

¹⁶ Noemia chañurúpusu ore abi guio ga dacode jé chopise jeta ape to uje chañurúpusu guio.

¹⁷ Ga Noemia ujodie chequei chimo ga ore chojningame: –¡Noemia e chumuña dabi to!– Ga ore pésusu ore ababi iábi ga iábi su Obed. Ga Obed uté abi cuse to nanique ga abi i tu Isaí, jé basa Isaí abi cusapo to rĩ ga abi i tu David.

Israélgosode ore eduguéjna cuchábi David gãrapíode jnani bajaque ore íode u udojo

¹⁸ Enga a qué yatataba David uté dáqui gatéode íode ome uaque to jne rĩ. Ga yojninga bajai tu Fares. Ga Fares uté ujnacari cuse nanique ga i tu Hezrón.

¹⁹ Jé basa Hezrón ujnacari cuse to nanique rĩ ga i tu Ram. Jé basa Ram ujnacari cuse to nanique rĩ ga i tu Aminadab.

²⁰ Jé basa Aminadab abi cuse to nanique rĩ ga i tu Naasón. Jé basa ga Naasón abi cuse to nanique rĩ ga i tu Salmón.

²¹ Jé basa Salmón ujnacari cuse to nanique rĩ ga i tu Booz. Jé basa Booz ujnacari cuse to nanique rĩ ga i tu Obed.

²² Jé basa ga Obed ujnacari cuse to nanique rĩ ga i tu Isaí. Jé basa Isaí abi cuse to nanique rĩ ga i tu yojningai David. Ga jé u uje David cho dáqui gatéode iji jnani bajade udojo jnese nanique.