Rut 3 - Dupade Uruode

Booz caniranguipise ome daguiosi casica acoté nanique uje uaté i tu Rut

¹ Ga chise diri nanique uje Noemia catecãrápoi dacaria gaté rĩ. Ga chojningame: –Ueradéjna jeta yucué bamanique ome ua jne, ga pininaquei jogadi tu ome ua jne.

² ¿Jé ca ueradi tu ome ua ya? ujetiga basai turásu yabai casica iguiosi tuté jne uje bajína irógode aja acade cucha diríca uje ore na diríca. Yudute to uje ore chisite danasugode jne iji ore idasupídebei. Ga yojningai Booz uté a moji ore idasupídebei jogadi jne iji dejai tudé.

³ Ga be ga apésu ua ome yui jne. Ẽ́sariji yodi jne, enga anírapo cucha ai unéri aja babai jne rĩ. Ga agui baguidé ueradéjnanie ome yui jne. Bo ga acáji ore idasupídebei mu ca ango ua aja Booz uté míraque jne. Enga arodape jne jeta ore cha daninaquei uje ore chóji dajotade, enga ore tagu dabose unérone iji, ga jé abágui.

⁴ Amíningapísa aja quedéjnane jne enga a arajapise mochátique jogatique ga jé u ujetiga abágui. Mu ujetiga ese uje mopise mu ca aringare. Mu ese ga asa itarãpei eruei iji mochádi eruei ga amóji guídedie jne. Enga arote jeta cho cuyuque jne ga a jé u jeta catecã́ri ua ga a chingo dáyipierigui ome ua ga be ajéningo quitígo jne.–

⁵ Rut tangaripísi dejo uruode ga chojningame: –Ejẽ́, a yangári baruode jne. Ga yibágui uté jne iji dejai tudé.–

⁶ Ga jé u uje Rut dopísi dejo uruode ga pésupúsu re ga jé chicáji Booz yui iji ore idasupídebei.

⁷ Ga Rut e di mu chajire ore iji quedéjnai. Ga chimo uje Booz qué ore taque ga ore chójiapo dajotai te rĩ ga ore cha chagu mu qué ore catecãrápoi ñane rĩ. Ga chimópise uje Booz irasiguipise re ome darógode ore. Ga chimo uje ore chague jmame ga ore chisite rágaja quedéjnane uje ore chucué damochátigo iji dati. Ga chimo uje Booz pésu damochádi iji irógode idasugode unucodé ejópisi. Mu uje e ore mopise jnese ga jé u uje Rut jno ga quĩrique digája darídedie eruéode. Ga que uñeque chunina guichárique. Ga jé u uje chise Booz ga chisa itarãpei eruei ga jé chãrai itarãpei eruei iji gaté ga jé u uje moji guídedie ga chaco itarãpei dabai to.

⁸ Ga e chise dejnínga gatócoro ga jé u uje Booz cho cuyuque ga chajire darídedie, mu chimo chequéraguiji. Ga tṍra rome.

⁹ Ga jé u uje Booz jĩraque catecã́ri chequé iji darídedie ga chojningame: –¿Ama ua goto a?– Ga jé u uje Rut chojninga: –Cachi barogué Rut uyu arĩa.– Ga Rut chojningápome Booz rĩ: –Jé areque jeta ójiji yari to uje yiyoquíjna casica iguiosipise ua gu. Jé tiógara jeta añuru yio to ga o bacoté iji yu.–

¹⁰ Ga jé u uje Booz chajnai Rut uruode: –Jé yajéode u to ga yacaranguipísome Pangarádejnai Dupade uje bango ua aja yu to. Ga a Dupade chatapísaja ua jne ome bacaniratiguéode udore. Yirajapise uje a ajnorapise babai ica ga bacuepoi iguiosode uyoque rĩ. Bamo uje jnacarode déji yocujade ga omipíso ore ome yu. Ayoré gajnareque udore uñane, jé ataque uñéngo to, enga bacuegode urásu udore uñeque ga orase babai iji uñeque. Mu jé arec uje bacuegode u babai casica iguiosipísode uyoque.–

¹¹ Ga Booz qué jnopo daruode údi gaté rĩ ga chojninga: –Ujnomerẽ́pise ua iji de yoquidai ga ore chojningame ua: 'Gapua tuaté ueradéjnapise adode iji yoquidai tudé.' Jecute ca o báyugu ua ome cuchárique ga a yípisi bojningane cucha jne.–

¹² Mu Booz chojningame Rut: –Yaníri tu uje babai casica iguiosipísi qué eca uje ore chojmarápise iji jnumi. Ga uté gajnei turásu jeta chóji bari to. Ga a uté chãraque ua ome yu jne, ga a ca toque jne jeta yóji bari. Jeoga juéga ua ome yu ga jé areque to.–

¹³ Ga Booz chojningápome Rut rĩ: –Ácarabíji de uje qué dejaque. Mu bo jne jeta e dire. Ga a yi jne enga yibágui babai casica iguiosipísi gajiné ga a yicatecã́ri jne ome áyipieraque quitique. Ga uté jeta pota ua ga a chóji bari jne. Jé basa a ca pota ua ga a yóji bari. Ga Dupade chiraja uje ũrepise yuruode udojo. Mu be ga amope jne, ga ajni to jetiga e dire.–

¹⁴ Enga Rut qué moji Booz guídedie jé aja direjnímei. E dire mu qué tota údi. Ga jé u uje Booz catecã́ri ga chojninga: –Bope jne uje qué tota erámi. Yigaidi tu gu jeta ca uñeque chimo ua aja bajesui.–

¹⁵ Ga Booz chojningame Rut: –Yipota jeta ejñu baguidé dañoré ga yĩra yacade cucha aja ajei jne ujeta bo údi aja bejo.– Ga a ore chuguhésirase gueranenie batigai jne enga a chisírase 40 kílos iquénique. Ga jé u uje Booz chicháji Rut guidoboi ga chojninga: –Be, ga ajnoque ga ajni to aja guidai.–

¹⁶ Uje Rut chise dejo ga jĩraque ejo catecã́ri iji garani ga chojningame: –¿Booz ajéningo cho ringome ua ya?– Ga jĩraque Rut chatata Booz uruode quigode jnese ome dejo.

¹⁷ Ga jé u uje Rut chisi ome Booz gueranone arroze quedéjna ome dejo. Ga chojningame: –E yijírase que, mu Booz chojningame yu: "Ayape, ga ajnoque yoquidasugode uñéngo jne ome bejo. Uje gajnareque jeta ca yatire Noemia icaniratiguei gai to uje irogue ua aja yu gu."–

¹⁸ Ga jé u uje Noemia chojningame dacaria: –Arodape yui jeta Booz pésu cuchade aja quigode. Uje a ca chajirape cuchárique, mu a jĩraque chicáji yabai casica iguiosode iji diri tudé gajneri, ga a jĩraque di pujnomérique údi iji yoque jne.–